«Łukašenka-stajł». Hienprakuror Polščy vyjšaŭ publična pasiačy drovy i daŭ nahodu dla kpinaŭ
Ministr justycyi i hienprakuror Polščy Valdemar Žurek apublikavaŭ u sacsietcy X videa, dzie jon pakazvaje, jak pravilna siekčy drovy. Tak jon pavinšavaŭ prafiesijanałaŭ z Suśvietnym dniom lesaruba, jaki adznačajecca 12 listapada. Adnak navat polskija kamientatary adrazu ž uhledzieli ŭ hetym padabienstva z Alaksandram Łukašenkam, jaki taksama viadomy svajoj luboŭju da publičnaj demanstracyi hetaha zaniatku, piša Most.
«Siońnia my pavučymsia, jak dobra siačy drovy tak, kab nie pryčynić sabie škody i kab byŭ dobry efiekt. Siakiera — heta asnova. Dobry instrumient, dobry curban, roŭna ŭstalavany i roŭna narezanyja kałki. Vielmi zdorava. Trochi siły i troški vytrymki», — vučyć ministr, pierad tym jak prystupić da spravy.
Paśla jon pa-majstersku raśsiakaje kavałak dreva.
«Drovy siakuć — treski laciać», — dadaŭ jon i pavinšavaŭ lesarubaŭ.
Pozdrowienia dla Wszystkich drwali, dziś nasze święto!
12 listopada to Światowy Dzień Drwala pic.twitter.com/aoQPgsGRHd
Hety post nie abyšli ŭvahaj polskija apazicyjnyja palityki i žurnalisty. Vydańnie DoReczy (u sistemie polskich miedyja jano charaktaryzujecca jak pravaje) sabrała daścipnyja vykazvańni, u jakich kamientatary znajšli padabienstva pamiž Žurekam i Łukašenkam.
«Vučań pierasiahnuŭ nastaŭnika», — napisała deputatka Jeŭraparłamienta ad partyi «Prava i spraviadlivaść» Anna Zaleŭskaja i raźmiaściła fota Łukašenki pierad raskołatym napałam curbanom.
«Tyja samyja standarty. Šmit viadzie sacsietki Žureka?» — napisaŭ deputat ad taho ž «PiSa» Daryjuš Maciecki, majučy na ŭvazie polskaha sudździu Tomaša Šmita, jaki ŭciok u Biełaruś. I prykłaŭ videa, dzie Łukašenka pracuje siakieraj na čempijanacie pa bićci droŭ siarod biełaruskich žurnalistaŭ.
«Łukašenka-stajł», — prakamientavaŭ Jacek Lizinkievič, žurnalist inšaha vydańnia pravaha tołku Gazeta Polska.
Kamientary