Vyzvalenyja katalickija śviatary Hienrych Akałatovič i Andžej Juchnievič

Hienrych Akałatovič byŭ asudžany na 11 hadoŭ, Andžej Juchnievič — na 13 hadoŭ.

Niepasredny i važki ŭdzieł u pracesie prymali prefiekt Dykasteryi pa spravach Uschodnich kaściołaŭ kardynał Kłaŭdya Hudžeroci, Apostalski nuncyj u Respublicy Biełaruś Ińjacya Čefalija i staršynia Kanfierencyi katalickich biskupaŭ Biełarusi arcybiskup Juzaf Stanieŭski, paviedamlaje KKBB.

Vałožynskaha ksiandza Hienrycha Akałatoviča zatrymali ŭ listapadzie 2023 hoda. Siłaviki abvinavacili jaho ŭ «zdradzie dziaržavie». 30 śniežnia 2024 hoda mužčynu asudzili da 11 hadoŭ kałonii.

U pasłańni da viernikaŭ, jakoje śviatar dasłaŭ z-za krataŭ, jon napisaŭ, što, pa mierkavańni śledstva, udzielničaŭ u «špijanažy na karyść Polščy i Vatykana». Akałatovič tady padkreśliŭ, što nikoli nie byŭ nijakim špijonam, što jon — słuha Boha, a sudziać nasamreč nie jaho adnaho, a ŭsiu Katalickuju carkvu ŭ Biełarusi.

U čakańni suda Akałatovič pavodziŭ siabie vielmi badziora i rašuča, niahledziačy na prablemy sa zdaroŭjem: 65‑hadovy mužčyna pieranios infarkt, i ŭ jaho vydaleny straŭnik u suviazi z ankałahičnym zachvorvańniem.

«Za ŭsimi navinami sačyŭ, Ukrainu padtrymlivaŭ, łajaŭ pastajanna Łukašenku i Pucina ŭ kamiery. Tam usie bajalisia i słova skazać, bo prasłuchoŭka ŭ kožnaj kamiery i ludzi siadziać, jakija [padsłuchoŭvajuć]. A jon zusim nie bajaŭsia ničoha», — raskazvaŭ pra śviatara sukamiernik, jaki vyjšaŭ na svabodu raniej za jaho. 

U vypadku śviatara z Šumilina, Viciebskaja vobłaść, Andžeja Juchnieviča, jaho spačatku zatrymali pa «palityčnych» administracyjnych artykułach, ale paźniej abvinavacili ŭ złačynstvach, jakija tyčacca seksualnaj niedatykalnaści niepaŭnaletnich.

U takich vypadkach Katalickaja carkva zvyčajna pravodzić ułasnaje rasśledavańnie na pradmiet mahčymaha parušeńnia śviatarom normaŭ Kodeksa kananičnaha prava — hałoŭnaha kaściolnaha «zakona». Jak stała viadoma viernikam z kampietentnych krynic, kananičnaje rasśledavańnie nie pravodziłasia, pakolki heta niemahčyma z-za taho, što śviatar znachodzicca pad aryštam.

U toj ža čas viernikam dakładna viadoma, što kiraŭnictva dyjacezii «nikoli ni ad kaho nie atrymlivała skarhaŭ» na ajca Andžeja Juchnieviča.

Pra sutnaść abvinavačvańnia i najaŭnaść jakich-niebudź dokazaŭ viny śviatara hramadskaść nie daviedałasia, bo sud prachodziŭ u zakrytym režymie. 

«Ryma-katalicki kaścioł na Biełarusi vitaje pazityŭnyja tendencyi dziaržavy ŭ mižnarodnym paradku, adnaŭleńnie dyjałohu pamiž Respublikaj Biełaruś i ZŠA, a taksama ŭzmacnieńnie kantaktaŭ z Vatykanam. My rady vizitu ŭ Biełaruś vysokaha pradstaŭnika Papy Rymskaha Lva XIV kardynała Kłaŭdya Hudžeroci ŭ kastryčniku 2025 hoda i dasiahnutym damoŭlenaściam. Jon daŭni siabar Respubliki Biełaruś, šmat zrabiŭ dla Katalickaha kaścioła ŭ našaj krainie, a taksama dla raźvićcia dziaržaŭna-kaściolnaha i mižkanfiesijnaha dyjałohu.

Jaho vizit nadaŭ pazityŭny impuls dla dalejšych kantaktaŭ, važnym vynikam jakich stała rašeńnie prezidenta Respubliki Biełaruś u znak miłasernaści i pavahi da Papy pamiłavać i vyzvalić katalickich śviataroŭ, jakija adbyvali pakarańnie ŭ miescach źniavoleńnia», — havorycca ŭ paviedamleńni Kanfierencyi katalickich biskupaŭ Biełarusi».

Paśla 2020 hoda spravy pa artykułach ab «zdradzie dziaržavie» časta majuć palityčny charaktar. Abvinavačvańnie ŭ «zdradzie dziaržavie» vykarystoŭvajecca dla pieraśledu praciŭnikaŭ režymu Alaksandra Łukašenki i dyskredytacyi niezaležnych ad režymu struktur.

• 25
• 0
• 0
• 1
• 0
• 0
• 0
• 1