Tramp sustreŭsia ŭ Biełym domie z Zochranam Mamdani. Jany pavodzili siabie jak najlepšyja siabry
Prezident ZŠA Donald Tramp 21 listapada pravioŭ u Avalnym kabiniecie Biełaha doma niečakana ciopłuju sustreču z abranym meram Ńju-Jorka Zochranam Mamdani, ź jakim raniej mieŭ vostryja publičnyja kanflikty. Raniej Tramp nazyvaŭ Mamdani «stopracentnym kamunistyčnym łunatykam» i «poŭnym psicham», a Mamdani adkryta krytykavaŭ administracyju Trampa jak «aŭtarytarnuju». Ciapier ža abodva demanstravali na publicy najlepšyja adnosiny.
Na sustrečy abodva palityki zasiarodzilisia na abmierkavańni ahulnych prablem horada, asabliva na pytańniach dastupnaha žylla, i paźbiahali asabistych napadak. Tramp adznačyŭ, što ŭražany palitykam, jaki raniej nazyvaŭ jaho administracyju aŭtarytarnaj, i paabiacaŭ padtrymku ŭ pracy nad harantavańniem biaśpiečnaha i mocnaha Ńju-Jorka.
Mamdani, jaki ŭstupić na pasadu ŭ studzieni, u svaju čarhu padkreśliŭ, što sustrakaŭsia z prezidentam mienavita dla abmierkavańnia mahčymaściaŭ zrabić Ńju-Jork bolš dastupnym dla žycharoŭ. Jon adznačyŭ, što sustreča była skancentravanaja nie na roznahałośsiach, a na ahulnaj mecie słužeńnia horadu.
Sustreča adkryła novyja palityčnyja mahčymaści dla abodvuch palitykaŭ: niahledziačy na papiarednija vostryja stasunki, jany prademanstravali družalubnuju atmaśfieru i žadańnie supracoŭničać. Tramp paabiacaŭ nie ŭvodzić u dziejańnie raniejšyja pahrozy pra abmiežavańnie fiederalnaha finansavańnia Ńju-Jorka, a žurnalisty adznačyli niečakanuju ciopłaść i ŭzajemnuju pavahu padčas abmienu kamientarami.
Karotkaja napružanaja paŭza ŭźnikła tolki tady, kali prahučała pytańnie: «Spadar Mamdani, ci paćviardžajecie vy, što ličycie Trampa fašystam?». Mamdani pačaŭ było tłumačyć: «Ja kazaŭ pra…». Ale Tramp pierabiŭ jaho, pa-siabroŭsku palapaŭšy pa ruce: «Usio narmalna, možaš skazać «tak». Tak praściej, čym tłumačyć. Ja nie suprać». Mamdani ŭ adkaz kiŭnuŭ.
«U jaho jość šaniec zrabić niešta sapraŭdy vialikaje, — zajaviŭ Tramp. — Kali jon dabjecca pośpiechu, heta dapamoža fiederalnamu ŭradu, i my budziem dapamahać jamu. […] Ja lublu Ńju-Jork, ja adtul rodam. Być meram Ńju-Jorka — heta kruta, ja b taksama z zadavalnieńniem!»
Ciapier čytajuć
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary