Jak stała viadoma «Našaj Nivie», zatrymany hienieralny dyrektar navukova-technałahičnaj asacyjacyi «Infapark» Uładzimir Baśko. Heta znakavaja fihura dla biełaruskaha IT, adzin z baćkoŭ-zasnavalnikaŭ Parka vysokich technałohij.
Najbolš imavierna, što da jaho pryjšli pa spravie «Softkłuba».
Pra zatrymańnie Uładzimira Baśko «Našaj Nivie» stała viadoma ź niekalkich krynic. Apošni raz Baśko byŭ anłajn u pačatku listapada, a apošni raz publična źjaŭlaŭsia ŭ siaredzinie kastryčnika na forumie «BankIT — 2025». Na mierapryjemstvie abmiarkoŭvali vykliki i dasiahnieńni ŭ śfiery infarmatyzacyi bankaŭskich pasłuh.
Surazmoŭcy «Našaj Nivy» źviazvajuć zatrymańnie Uładzimira Baśko sa spravaj «Softkłuba», ale dakładny sens pretenzij da jaho nieviadomy.
Uładzimir Baśko — heta znakavaja fihura biełaruskaha IT.
Jon nie prahramist, a funkcyjanier — adzin z baćkoŭ-zasnavalnikaŭ Parka vysokich technałohij, najlepšaja fihura dla razmovy ź dziaržavaj ad asoby kalektyŭnaha ajcišnika.
Baśko stajaŭ la vytokaŭ «Infaparka» — arhanizacyi z pačatku 2000-ch, jakaja abjadnała kiraŭnikoŭ maładych ambicyjnych kampanij ź jašče niezrazumiełaha dla dziaržavy rynka. Tam byli i JERAM, i «Ajtranzišn», i toj ža «Softkłub».
Na bazie «Infaparka» farmiravalisia idei i patrabavańni haliny, jakija ŭ vyniku pierakładvalisia na zakony — pa kabinietach biehaŭ Baśko, — i dapamahali raści ŭsiamu siektaru.
Aŭtarytet Baśko ŭ 2023‑m vykarystała dziaržava, pryznačyŭšy jaho ŭ Kamisiju pa viartańni, jakaja pavinna prymać pakajańni biełarusaŭ, vymušanych pakinuć radzimu praz palityčnyja represii.
Znakamitaj stała razmova Uładzimira Baśko z Łukašenkam u 2021 hodzie. Baśko ŭ čałabitnych farmuloŭkach zahavaryŭ pra sychod Łukašenki z pasady prezidenta, ale — «ja vas prašu», — z zaklikam zastacca «harantam niezaležnaści».
Łukašenku dumka nie spadabałasia, jon pierabiŭ Baśko słovami «nikudy ja nie pabiahu».
Nahadajem, sens spravy «Softkłuba» ŭ tym, što byccam by isnavała karupcyjnaja zmova pamiž kampanijaj-pastaŭščykom IT-rašeńniaŭ i mieniedžarami šerahu bankaŭ. Jany nibyta atrymlivali adkaty za łajalnaść da kankretnaha pastaŭščyka, ale ŭ pracesie jašče i kreatyŭna niedapłačvali padatki, što i stała pieršasnaj pryčynaj uvahi orhanaŭ.
Čytajcie taksama: Stała viadoma sutnaść spravy Softkłuba
Zatrymańni pačalisia 23 kastryčnika 2025 hoda z aryštu hienieralnaha dyrektara i stvaralnika kampanii «Softkłub» Uładzimira Sirotki.
Čytajcie: Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP
Praz try dni, 26 kastryčnika, siłaviki pryjšli da staršyni praŭleńnia Ceptar Banka Alaksandra Ihnatava. Paźniej stała viadoma ab prablemach u staršyni banka VTB Uładzimira Lichadzijeŭskaha, a taksama ab zatrymańniach mieniedžaraŭ siaredniaha źviana ŭ Pryjorbanku. Byŭ zatrymany eks-kiraŭnik RRB-Banka Vital Drankievič, u minułym sam śledčy. Taksama viadoma pra zatrymańnie byłoha vykanaŭčaha dyrektara Banka raźvićcia Arcioma Maroza.
Čytajcie taksama: Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia
Kiraŭnictva «Softkłuba» abvinavačvajuć, jak viadoma «Našaj Nivie», va ŭchileńni ad padatkaŭ i dačy chabaru. Nijakaj aficyjnaj infarmacyi pra hetuju spravu jašče nie było.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary