Były pradziusar «Łaskavaha maja» Andrej Razin chavajecca ad rasijskich sudoŭ u ZŠA
Stała viadoma, što były pradziusar hurta «Łaskavy maj» Andrej Razin, jaki znachodzicca ŭ miždziaržaŭnym vyšuku pa spravie ab bujnym machlarstvie, ciapier chavajecca ŭ ZŠA i nie płanuje viartacca ŭ Rasiju. Pra heta paviedamiła TASS sa spasyłkaj na rasijskich siłavikoŭ.
Jak śćviardžajuć rasijskija siłaviki, niahledziačy na najaŭnaść u siabie, akramia rasijskaha, jašče i tureckaha hramadzianstva, Razin ciapier pakinuŭ Turcyju i znachodzicca na terytoryi Złučanych Štataŭ.
Sam Andrej Razin raniej zajaŭlaŭ u videazvarocie, što jon nibyta znachodzicca ŭ Turcyi pad abaronaj miascovych uładaŭ i što, naadvarot, u Turcyi adkryli kryminalnuju spravu suprać tych, chto inicyjavaŭ jaho pieraśled u Rasii. Jon śćviardžaŭ, što tureckija śpiecsłužby nibyta pierachapili razmovy ŭdzielnikaŭ «zmovy» suprać jaho.
Jak śćviardžajuć rasijskija śledčyja orhany, Razin prysvoiŭ hrošy, jakija pavinien byli atrymać kampazitar i paet Siarhiej Kuźniacoŭ u jakaści aŭtarskaha ŭznaharodžańnia za pieśni «Łaskavaha maja». Śledčyja ličać, što Razin karystaŭsia padroblenaj damovaj, jakaja dazvalała jamu atrymlivać licenzijnyja vypłaty, vydajučy siabie za zakonnaha ŭładalnika pravoŭ.
Advakat, jakaja pradstaŭlaje siamju pamierłaha try hady tamu salista «Łaskavaha maja» Juryja Šatunova, śćviardžaje, što Razinu inkryminujuć machlarstva ŭ asabliva bujnym pamiery, za što jamu pahražaje da 10 hadoŭ pazbaŭleńnia voli i štraf da adnaho miljona rasijskich rubloŭ (kala 12 650 dalaraŭ). Ekśpiertyza acaniła naniesienuju škodu prykładna ŭ 500 miljonaŭ rubloŭ (kala 6,35 miljona dalaraŭ). Paciarpiełaj pryznanaja ŭdava Kuźniacova.
Hurt «Łaskavy maj» stvaryŭ Siarhiej Kuźniacoŭ u 1986 hodzie ŭ Arenburhu. Juryj Šatunoŭ byŭ jahonym frontmenam da raspadu kalektyvu ŭ 1992 hodzie. Paśla hetaha Šatunoŭ žyŭ u Hiermanii i zajmaŭsia solnaj karjeraj. Jon pamior u červieni 2022 hoda ad infarktu, a praź niekalki miesiacaŭ nie stała i Kuźniacova.
U Rasii abjavili ŭ vyšuk byłoha pradziusara hurta «Łaskavy maj» Andreja Razina
MAZ dla «Łaskavaha maja». Jak u Minsku stvaryli i stracili ŭnikalny hruzavik
Andrej Razin: «Škadavaŭ, što nie było Alaksandra Ryhoraviča, jaki ŭsich by pierasadžaŭ»
Pradziusar «Łaskavaha maja» aburyŭsia Šnuravym i paskardziŭsia ŭ SKR
Kamientary