Kolkaść achviar pažaru ŭ žyłym kompleksie ŭ Hankonhu raście. Pa spravie ab pažary zatrymany try čałavieki
U vyniku maštabnaha pažaru ŭ žyłym kompleksie Wang Fuk Court na poŭnačy Hankonha, pavodle apošnich danych, zahinuli 44 čałavieki, sotni ludziej pa-raniejšamu ličacca źnikłymi bieź viestak.
Ułady Hankonha paviedamili pra zatrymańnie troch čałaviek pa padazreńni ŭ nienaŭmysnym zabojstvie ŭ suviazi z pažaram, paviedamlaje Bi-bi-si.
U palicyi paviedamili, što zatrymanyja — mužčyny va ŭzroście ad 52 da 68 hadoŭ — pracujuć u budaŭničaj kampanii, jakaja pravodziła ŭ budynku ramont. Dvoje z zatrymanych źjaŭlajucca kiraŭnikami kampanii, jašče adzin — inžynier-kansultant.
Ułady zajavili, što na vonkavym baku budynkaŭ byli znojdzieny materyjały, jakija, pa ŭsioj bačnaści, nie źjaŭlajucca vohnieŭstojlivymi.
«U nas jość padstavy mierkavać, što kiraŭnictva kampanii prajaviła hrubuju chałatnaść, što pryviało da hetaj trahiedyi i vyklikała niekantralavanaje raspaŭsiudžvańnie ahniu, u vyniku čaho adbyłasia maštabnaja katastrofa», — zajaviŭ pradstaŭnik palicyi.
65‑hadovy žychar žyłoha kompleksu skazaŭ AFP, što pražyŭ u im bolš za čatyry dziesiacihodździ, a mnohija ź jaho susiedziaŭ byli pažyłymi ludźmi.
«Vokny byli zakryty z-za ramontnych rabot, [niekatoryja žychary] nie viedali, što adbyŭsia pažar, i susiedzi pa telefonie paviedamili im, što treba evakujavacca, — skazaŭ jon. — Ja ŭ šoku».
Pažar, jaki achapiŭ siem z vaśmi karpusoŭ vyšynnaha žyłoha kompleksu, tušyli bolš za 700 čałaviek. Na ranicu paśla trahiedyi pažarnyja ŭsio jašče sprabavali łakalizavać niekalki ačahoŭ uzharańniaŭ.
Pryčyna pažaru nieviadomaja, jon uspychnuŭ u toj momant, kali ŭ ŽK pravodzilisia ramontnyja raboty.
U čaćvier ranicaj kiraŭnik administracyi Hankonha Džon Li zajaviŭ, što 279 čałaviek ličacca prapaŭšymi bieź viestak, choć paźniej pažarnyja paviedamili, što ŭstanavili kantakt ź niekatorymi ź ich.
Li skazaŭ, što bolš za 900 čałaviek znajšli prytułak u miescach časovaha raźmiaščeńnia.
Jak paviedamlaŭ kitajski dziaržaŭny telekanał CCTV, lidar KNR Si Czińpin vykazaŭ spačuvańni siemjam zahinułych i paciarpiełych ad pažaru.
Pra ŭzharańnie stała viadoma ŭ 14:51 pa miascovym časie ŭ sieradu. Pažaru byŭ prysvojeny piaty, najvyšejšy ŭzrovień niebiaśpieki. Palicyja evakujavała žycharoŭ bližejšych budynkaŭ.
66‑hadovy Hary Čen, jaki pražyvaŭ u druhim błoku kompleksu Wang Fuk Court, raskazaŭ ahienctvu Reuters, što kala 14:45 (6:45 GMT) pačuŭ «vielmi hučny huk» i ŭbačyŭ, jak u susiednim budynku ŭspychnuŭ pažar.
«Ja navat nie viedaju, što zaraz adčuvaju. Ja prosta dumaju pra toje, dzie budu spać hetaj nočču, tamu što, vierahodna, nie zmahu viarnucca dadomu», — kaža jon.
Niekatoryja žychary kompleksu byli aburany tym, što pažaru ŭdałosia dasiahnuć takich maštabaŭ, i krytykujuć reakcyju ŭładaŭ.
«Kali adbyvajecca lasny pažar, jany zadziejničajuć viertaloty i skidajuć vadu, a čamu tut hetaha nie robiać? Jak možna dapuścić, kab inšyja budynki praciahvali hareć?» — kaža 60‑hadovaja žycharka ŽK pa imieni Pun.
«My žyviem zusim pobač z pažarnaj častkaj, i my dumali, što ahoń udasca chutka patušyć, ale ciapier jon raspaŭsiudziŭsia. Ja tak rasčaravanaja», — skazała jana ŭ intervju haziecie South China Morning Post.
Ciapier čytajuć
«Franak, adnosiny pamiž ludźmi mohuć budavacca nie tolki na manipulacyjach». Prakop‘jeŭ daŭ vodpaviedź Biaspałavu. I Viačorku39
Kamientary