Kudy i za kolki možna palacieć ź Minska na Novy hod

Važna: usie ceny aryjencirovačnyja i raźličany na dvaich. Paznačanyja nižej rascenki padali turahienty.

Jehipiet: pravieranaja kłasika

U hetym źmienlivym śviecie jość niešta viečnaje. Dla turyzmu heta Jehipiet. Jon pa-raniejšamu ŭ topie napramkaŭ dla adpačynku na navahodnija śviaty.

Košt tydnia žyćcia ŭ čatyrochzorkavym hateli ŭ Šarm-el-Šejchu startuje ad $1700 (prykładna Br5000), dla piacizorkavaha rychtujcie minimum $2400 (Br6800). Jość varyjanty «ŭsio ŭklučana» i «ŭltra ŭsio ŭklučana».

Jasna, što 21‑hradusnaje mora — heta nie miaža letucieńniaŭ. Ale bolš pryjemna, čym nadvorje za aknom u Minsku.

Tempieratura: pavietra — 24-26° C, vada — 21° C.

Čas u darozie: Churhada — 6 hadzin 10 chvilin, Šarm-eš-Šejch — 6 hadzin.

AAE: raskoša i fiejervierki

Kali mara — zahadać žadańnie pad fiejervierk, hodny Knihi rekordaŭ Hiniesa, i sustreć Novy hod u atmaśfiery raskošy, to možna razhledzieć AAE. Mora tut, darečy, ciaplejšaje, čym u Jehipcie.

Viadoma, heta nie pra «ŭsio ŭklučana», ale i takija varyjanty taksama jość. Naprykład, čatyrochzorkavy atel u Ras-Al-Chajmie na 8 dzion abydziecca ŭ rajonie $3180 (Br9250). Kali brać tolki śniadanki, vychodzić bolš biudžetna — $2690 (Br7800).

A za «piaciorku» ŭ Dubai (taksama tolki sa śniadankami) daviadziecca zapłacić kala $3500 (Br10 300).

Tempieratura: pavietra — 26-28° C, vada — 23-25° C.

Čas u darozie: Dubaj — 5 hadzin 45 chvilin.

Azija: daviadziecca palotać

Tajłand

Pramyja rejsy sa stalicy Biełarusi startujuć tolki ŭ studzieni (Minsk — Pataja — z 8 studzienia, Minsk — Pchukiet — z 11 studzienia). Tamu, kab apynucca ŭ karaleŭstvie mienavita ŭ «samuju čaroŭnuju noč u hodzie», daviadziecca lacieć praz Maskvu.

U hetym vypadku možna znajści tury ŭ rajonie $2300 (Br6700) za 12 načej. Razmova idzie ab samych biudžetnych atelach u Patai. Plus treba dadać vydatki na darohu da Maskvy.

Što datyčycca pakietnych turaŭ z vyletam ź Minska ŭ studzieni, to ceny prykładna takija: 12 načej sa śniadankami ŭ ateli katehoryi 3* u Patai abyducca ŭ $2780 (Br8095), Pchukiet budzie prykładna na $200 daražejšy.

Nahadajem, što Tajłand spraściŭ vydaču viz dla biełarusaŭ. Ciapier ich možna chutka aformić u aeraporcie. Ale nie zabudźciesia pra ličbavuju kartu. 

Tempieratura: pavietra — 31-33° C, vada — 28-30° C.

Čas u darozie: 10‑11 hadzin.

Vjetnam

Na čartary ź Minska da Fukuoka biletaŭ na kaniec śniežnia ŭžo nie znajšli. Kali studzień taksama padychodzić, to samy biudžetny varyjant pačynajecca ad $3600 (Br10 500) za 12 načej, śniadanki ŭvachodziać u košt.

Pavialičyć

Ale kali mara — sustreć Novy hod kala Paŭdniova-Kitajskaha mora, to možna razhledzieć vylet z Maskvy: tury ŭ Niačanh na 11 načej startujuć ad $2300 (Br6700).

Heta adzin z samych papularnych kurortaŭ krainy: doŭhija plažy, ciopłaje mora, nasyčany padvodny śviet, vyspy, chramy, haračyja krynicy — karaciej, budzie čym zaniacca.

Tempieratura: pavietra — 25-28° C, vada — 24-26° C.

Čas u darozie: kala 10‑11 hadzin.

Šry-Łanka

Uciačy ad pieradnavahodniaj mituśni možna na trapičnuju vyspu ŭ Indyjskim akijanie — były Cejłon. Minimalny košt za 7 načej u ciaple pačynajecca ad $3790 (Br11 000) — śniadanki ŭklučany.

Viza biełarusam patrebna, ale aformić jaje prosta: pa prylocie — $60 (Br180) na darosłaha abo zahadzia anłajn — $50 (Br150).

Samalot ź Minska dastavić vas u mižnarodny aeraport Matała, raźmieščany na poŭdni vostrava. A dalej iduć plažy, čajnyja płantacyi i vosiem abjektaŭ Suśvietnaj spadčyny JUNIESKA, jakimi Šry-Łanka vielmi hanarycca.

Tempieratura: pavietra — 27° C, vada — 29° C.

Čas u darozie: aryjencirovačna 9 hadzin 30 chvilin.

Kitaj (Chajnań)

Na navahodnija vakacyi možna adpravicca na samy paŭdniovy kurort Kitaja — vostraŭ Chajnań. Košt startuje ad $2590 (Br7500) za 9 dzion, śniadanak uklučany.

Chajnań — heta nie tolki plažy: možna prahulacca na jachcie, pabyvać na vostravie małpaŭ, naviedać centr budyzmu, akvapark, termalnyja krynicy i zaapark-safary.

Tempieratura: pavietra — 25° C, vada — 24° C.

Čas u darozie: 10 hadzin 20 chvilin (nazad — na hadzinu daŭžej).

Indyja (Hoa)

Na śniežań volnych kvitkoŭ užo nie znajšli, ale na studzień jość. Startavaja cana — ad $2400 (Br6800) za 15 načej. Viza abaviazkovaja, praściej za ŭsio jaje aformić anłajn za $25 (Br73).

Jość tury z vyletam ź Minska i pierasadkaj u Deli. Možna abrać čysta plažny varyjant, kali ŭ stalicy vy nie zatrymlivajeciesia i adrazu adpraŭlajeciesia na ŭźbiarežža.

A jość mahčymaść kupić zborny tur i pahladzieć Deli, Ahru z Tadž-Machałam i ružovy horad Džajpur — kłasičny «załaty trykutnik».

Hoa — samy maleńki štat Indyi, ale adzin z samych zapatrabavanych u turystaŭ. Poŭnač — dla tusovak, poŭdzień — dla adpačynku i cišyni.

Tempieratura: pavietra — 32° C, vada — 28° C.

Čas u darozie: 9 hadzin 30 chvilin (biez uliku stykoŭki).

Blizki Uschod

Katar

Kali chočacca pravieści śviaty la Piersidskaha zaliva i pahladzieć na adnu z samych bahatych krain śvietu, to Katar — vydatny varyjant.

Pavodle słoŭ turahientaŭ, napramak stanovicca papularnaj alternatyvaj AAE.

Pavialičyć

Znajšli tury na 30 śniežnia. Ceny na 12 dzion u hateli sa śniadankami startujuć ad $2200 (Br6300). Paŭpansijon možna znajści za $2430 (Br7060).

Tempieratura: pavietra i vada — 24°C.

Čas u darozie: kala 6 hadzin.

Aman

Ujavicie: 360 soniečnych dzion u hodzie, plažy jak na Maldyvach, tropiki ŭ duchu Šry-Łanki — i heta ŭsio Aman.

Tur u Sałału ź Minska startuje ad $3080 (Br8950). Stolki daviadziecca zapłacić za 11 dzion u trochzorkavym hateli sa śniadankami.

Tempieratura: pavietra — 25-28° C, vada — 23-25° C.

Čas u darozie: krychu bolš za 7 hadzin.

• 0
• 0
• 0
• 0
• 0
• 0
• 0
• 0