Stała viadoma imia mužčyny, jakoha fiederalnyja ahienty zastrelili ŭ Minieapalisie. U horadzie znoŭ uspychnuli pratesty

Supracoŭniki Pamiežnaha patrula ZŠA (USBP) u subotu, mienš čym praz try tydni paśla śmierci Rene Hud ad ruk supracoŭnika Imihracyjnaj i mytnaj palicyi (ICE), zastrelili mužčynu ŭ Minieapalisie. U horadzie znoŭ pačalisia pratesty, piša BBC. 

Ułady paviedamili, što zahinuły — 37‑hadovy Aleks Preci, hramadzianin ZŠA, jaki žyŭ u Minieapalisie i pracavaŭ miedbratam u miascovaj balnicy dla vieteranaŭ.

Ministerstva ŭnutranaj biaśpieki ZŠA (DHS, tudy ŭvachodziać USBP i ICE) zajaviła, što ŭ zahinułaha byŭ pistalet i jon nibyta supraciŭlaŭsia, kali fiederalnyja ahienty sprabavali jaho abiazzbroić.

Pavodle słoŭ hubiernatara štata Miniesota Cima Uołza, videazapisy ź miesca zdareńnia dakazvajuć, što hetaja viersija źjaŭlajecca nonsensam.

«Kolki jašče žycharoŭ, kolki jašče amierykancaŭ pavinny pamierci ci atrymać ciažkija traŭmy, kab hetaja apieracyja [baraćby ź nielehalnaj mihracyjaj] skončyłasia?» — zajaviŭ mer Minieapalisa Džejkab Frej na pres-kanfierencyi.

Ministarka ŭnutranaj biaśpieki ZŠA Kryści Noem raskrytykavała Freja i Uołza, abvinavaciŭšy ich u tym, što jany stali na bok «ludziej, jakija parušajuć zakon».

Prezident ZŠA Donald Tramp abvinavaciŭ ułady Minieapalisa i štata Miniesota ŭ «padbuchtorvańni da miaciažu».

Pavialičyć

Noem paviedamiła na pres-kanfierencyi, što Aleks Preci padyšoŭ da fiederalnych ahientaŭ z 9‑milimietrovym paŭaŭtamatyčnym pistaletam. Paśla taho jak aficery pasprabavali jaho abiazzbroić, jon pačaŭ «reahavać ahresiŭna».

Adzin z aficeraŭ, pavodle słoŭ ministra, adkryŭ «abarončy ahoń», pakolki bajaŭsia za svajo žyćcio i žyćcio inšych aficeraŭ.

Palicyja Minieapalisa zajaviła, što zahinuły vałodaŭ zbrojaj na zakonnych padstavach.

Hubiernatar štata Miniesota Cim Uołz raniej zaklikaŭ prezidenta ZŠA Donalda Trampa nieadkładna vyvieści tysiačy supracoŭnikaŭ ICE i pamiežnaj achovy, dasłanych u Miniesotu ŭ miežach kampanii pa baraćbie ź nielehalnaj imihracyjaj.

«Ja tolki što razmaŭlaŭ ź Biełym domam paśla čarhovaha žachlivaha incydentu sa stralboj z boku fiederalnych ahientaŭ hetaj ranicaj. Miniesota sytaja pa horła. Heta ahidna. Prezident pavinien spynić hetuju apieracyju. Vyvieści ź Miniesoty hetyja tysiačy ahresiŭnych i niepadrychtavanych supracoŭnikaŭ. Zaraz ža», — napisaŭ Uołz u X.

Što viadoma pra zahinułaha Aleksa Preci?

37‑hadovy Preci pracavaŭ miedbratam u adździaleńni intensiŭnaj terapii ŭ balnicy dla vieteranaŭ u Minieapalisie; jon dałučyŭsia da pratestaŭ paśla hibieli Rene Hud.

«Jon hłyboka kłapaciŭsia pra ludziej i byŭ vielmi zasmučany tym, što adbyvałasia ŭ Minieapalisie i pa ŭsioj terytoryi ZŠA z ICE, jak i miljony inšych ludziej, — skazaŭ jaho baćka, Majkł Preci, ahienctvu Associated Press. — Jon ličyŭ, što ŭdzieł u pratestach — heta sposab vykazać svoj kłopat pra inšych».

Pavodle słoŭ baćki, syn telefanavaŭ baćkam «prykładna dva tydni tamu» i skazaŭ im, što viedaje, što nie pavinien «rabić nijakich duraściaŭ» padčas pratestaŭ.

«Aleks byŭ dobrym čałaviekam, jaki ščyra kłapaciŭsia pra svaju siamju i siabroŭ, a taksama pra amierykanskich vieteranaŭ, za jakimi jon dahladaŭ u jakaści miedbrata adździaleńnia intensiŭnaj terapii ŭ špitali dla vieteranaŭ u Minieapalisie. Aleks chacieŭ źmianić hety śviet da lepšaha», — havorycca ŭ zajavie jaho baćkoŭ, Majkła i Śjuzan Preci, jakaja była abnarodavana paźniej.

Na miescy stralby na poŭdni Minieapalisa, na Nikalet-avieniu i prylehłych vulicach, sabralisia sotni pratestoŭcaŭ. Supracoŭniki fiederalnych siłavych orhanaŭ razhaniali ich u tym liku pry dapamozie ślezaciečnaha hazu. Na miescy hibieli Preci ŭźnik stychijny miemaryjał.

Nieŭzabavie paśla taho, što adbyłosia ŭ Minieapalisie, pa sacsietkach raźlaciełasia videa, na jakim niekalki čałaviek u kamuflažy i maskach zmahajucca na tratuary haradskoj vulicy z čałaviekam u cyvilnym, valać jaho na ziamlu, a zatym adzin ź ich robić šeść strełaŭ: spačatku adzin i praź siekundu jašče piać zapar.

Jašče na adnym videa, źniatym z mašyny z adlehłaści na niekalki dziasiatkaŭ mietraŭ, samo miesca zdareńnia nie vidać, ale vidać ludziej u kamuflažy, jakija biahuć da jaho, a zatym čuvać vosiem strełaŭ.

Zahinuły byŭ zastreleny prosta pierad budynkam z vyvieskami «Amierykana-afrykanski siamiejny centr» i «Novy amierykanski centr raźvićcia».

Sienatar ad Miniesoty, člen Demakratyčnaj partyi Emi Kłobušar praz sacsietki paraiła Trampu i jaho paplečnikam z Respublikanskaj partyi pahladzieć hetyja videa, a kanhresmienaŭ-respublikancaŭ zaklikała nie maŭčać i «spynić saŭdzieł» u tym, što adbyvajecca.

Daradca Trampa Styvien Miler u adkaz abvinavaciŭ kiraŭnictva Miniesoty ŭ pravakavańni miaciažu.

«Unutrany teraryst sprabuje zabić supracoŭnikaŭ fiederalnych pravaachoŭnych orhanaŭ — i vy voś tak na heta reahujecie? […] Vy i ŭsio demakratyčnaje kiraŭnictva štata raździmajecie połymia miaciažu z adzinaj metaj — spynić departacyju nielehałaŭ, jakija ŭvarvalisia ŭ našu krainu», — napisaŭ Miler u sacsietkach.

U tym ža klučy vykazaŭsia ŭ svajoj sacsietcy Truth Social i sam Donald Tramp.

«Mer i hubiernatar svajoj napyšlivaj, niebiaśpiečnaj i nachabnaj rytorykaj raspalvajuć miaciež! […] Dajcie našym patryjotam z ICE rabić ich spravu. 12 000 nielehalnych inšaziemcaŭ-złačyncaŭ, mnohija ź ich schilnyja da hvałtu, aryštavanyja i vyviezienyja ź Miniesoty. Kali b jany zastavalisia tam, vy b ubačyli niešta našmat horšaje, čym toje, čamu źjaŭlajeciesia śviedkami siońnia!» — napisaŭ Tramp.

U tym ža poście prezident ZŠA, nie pryvodziačy dokazaŭ, abvinavaciŭ palitykaŭ-demakrataŭ u kiraŭnictvie Miniesoty ŭ tym, što jany pakryvajuć kradziež miljardaŭ dołaraŭ, a taksama ŭ tym, što jany nie dajuć miascovaj palicyi achoŭvać fiederalnych ahientaŭ, jakija pravodziać aryšty imihrantaŭ.

• 2
• 0
• 2
• 17
• 2
• 4
• 15
• 0