Kaleśnikava raskazała, u čyjoj kvatery i jak jana ciapier žyvie
Na svajoj sustrečy z žurnalistami ŭ Bierlinie byłaja palitźniavolenaja Maryja Kaleśnikava siarod inšaha raskazała, jak u jaje ciapier naładžany ŭ Hiermanii pobyt, piša Deutsche Welle.
Pa słovach Kaleśnikavaj, nievialikaja studyja z pryhožym vidam na Bierlin, abstaŭlenaja pradmietami mastactva, naležyć siabram Maryi. Sama byłaja palitźniavolenaja pakul jašče šukaje sabie ŭłasnaje žyllo ŭ Bierlinie. Kaleśnikava havoryć, što budzie žyć u stalicy Hiermanii, a nie ŭ Štutharcie, dzie žyła raniej — usio ž u Bierlinie bolš mahčymaściaŭ.
Pavodle słoŭ Maryi, biurakratyčnyja pytańni ŭ Hiermanii jašče nie da kanca vyrašanyja. U Hiermanii jana znachodzicca na padstavie zaprašeńnia niamieckaha ŭrada — Maryi ŭžo vydali Reiseausweis (pašpart dla zamiežnikaŭ) ź vizaj, jaki dazvalaje joj padarožničać. Ale statusu biežanca, jak jana ŭdakładniła, u jaje niama.
«Usie astatnija dakumienty ŭ pracesie, robiacca. Mianie ŭ hetym vielmi padtrymlivaje niamiecki bok, ja im vielmi ŭdziačnaja. Z bankam pytańni taksama vyrašajucca (padčas turemnaha źniavoleńnia Maryi zabłakavali rachunak u niamieckim Commerzbank. — Red.)».
U Hiermanii Maryja, pa jaje słovach, adčuvaje siabie ŭ biaśpiecy: «U mianie niama achovy tut, ale ja prytrymlivajusia peŭnych pravił». U finansavym płanie jaje zaraz u pieršuju čarhu padtrymlivaje siamja, dapamohi ad niamieckaha ŭrada na hety momant jana nie atrymlivaje. «U mianie jość mahčymaść pracavać i, viadoma ž, ja budu pracavać».
Jak i inšyja vyzvalenyja biełaruskija palitviaźni, Maryja atrymała vypłatu ad BySol.
Paśla intervju niamieckim miedyja Maryju stali časta paznavać na vulicach Bierlina, u pieršuju čarhu nie ruskamoŭnyja ludzi.
«Padychodziać i kažuć pra padtrymku Biełarusi, što jany vierać, što jana budzie svabodnaj. Ja da hetaha nie vielmi pryvykła, choć, viadoma, raduje, što ludzi paznajuć i adrazu kažuć pra Biełaruś».
Kamientary
I heta vielmi kaštoŭna. Kaho jašče ź biełarusaŭ, akramia Sabalenka i Domračavaj, paznajuć zvyčajnyja niemcy na vulicy?