Palityčny handal ŭnutry Eŭraźviazu, abo Jak kitajski abutak uratavaŭ Biełaruś ad sankcyjaŭ

Jość pahroza, što kitajski abutak moža pierabje namiery Eŭraźviazu nakłaści handlovyja sankcyi na Biełaruś. Pavodle infarmacyi čynoŭnikaŭ Eŭraźviazu, Italija, u adpaviednaści z klasyčnymi praviłami palityčnaha handlu ŭnutry EZ, vykarystoŭvaje pytańnie Biełarusi, kab damahčysia svajho ŭ anijak nia źviazanaj z našaj krainaj sprečcy pra antydempinhavyja myty.

26 vieraśnia aficyjny Rym ašałamiŭ Brusel, kali ŭstrymaŭsia ad hałasavańnia za ŭviadzieńnie sankcyjaŭ suprać Biełarusi. Svaim rašeńniem Italija dazvoliła Polščy, Litvie i Łatvii zablakavać prapanovu vyklučyć Miensk z Ahulnaje systemy preferencyjaŭ (GSP) u handli.

Ale kali zhadanaja trojka krainaŭ praciviłasia rašeńniu z pryčyny pieraściarohaŭ, što heta moža nehatyŭna adbicca na handli, pradstaŭniki EZ śćviardžajuć, što matyvam Italii było adpomścić Vialikabrytanii, Niamieččynie i Švecyi za toje, što jany zablakavali prapanovu EZ uvieści myty na tanny kitajski abutak, jaki pahražaje isnavańniu italjanskich vytvorcaŭ abutku.

Jak kaža adzin eŭrapiejski dyplamat, «isnuje džentelmenskaje pahadnieńnie, što dziaržavy-siabry EZ buduć abaraniać svaich vytvorcaŭ. Paŭnočnyja krainy, jakija impartujuć abutak, parušyli hetaje pahadnieńnie, i ciapier krainy EZ, što vyrablajuć abutak, viaduć ataku na ichniuju palityku ŭ inšych sferach».

Pytańnie skasavańnia systemy ahulnych preferencyjaŭ u handli dla Biełarusi jašče raz razhladaćmuć 12 kastryčnika, ale jašče da hetaha ambasadary EZ sustrakajucca 3 i 4 kastryčnika, kab pasprabavać pryjści da pahadnieńnia ab tak zvanych kitajskich «antydempinhavych» mytach.

Aficyjny pradstaŭnik Eŭrakamisii zajaviŭ, što «palityčnyja nastupstvy buduć vialikija», kali Italija budzie nadalej prytrymlivacca takoj linii ŭ biełaruskim pytańni padčas hałasavańnia 12 kastryčnika, bo vyklučeńnie z GSP hruntujecca na 18-miesiacovym raśśledavańni parušeńniaŭ aficyjnym Mienskam mižnarodnych pahadnieńniaŭ ab pravoch prafsajuzaŭ.

«Pazycyja Italii całkam nieprymalnaja, – paviedamiła krynica z Eŭrakamisii. – U tym sensie, što Eŭraźviaz musić pryznać, što biełaruski režym praktykuje hrubyja parušeńni».

Sa svajho boku, Italija rašuča admaŭlaje lubuju suviaź pamiž kitajskim i biełaruskim daśje, śćviardžajučy, što, ustrymlivajučysia padčas hałasavańnia, jana choča pakinuć Miensku apošni šaniec, kab pačać hulać pavodle praviłaŭ «bizuna i piernika».

Italjanski pradstaŭnik zaznačyŭ: «Ci možna sabie ŭjavić, kab levacentryscki ŭrad Ramana Prodzi štości rabiŭ by ŭ piku mierkavańniu mižnarodnaha prafsajuznaha ruchu?»

Sakret bruselskaha Polišynela

Toj fakt, što krainy-siabry EZ handlujucca, sastupajučy ŭ adnoj spravie naŭzamien za pazytyŭnaje rašeńnie inšaje, anijak nia źviazanaje spravy, – ahulnaviadomy sakret palityčnaha pracesu ŭ Eŭrapiejskim Źviazie.

Pry kancy 2005 h. Brusel burliŭ čutkami, što Francyja dała svaju zhodu na pryznańnie za Makiedonijaj statusu krainy-kandydatki na ŭstupleńnie i na pačatak pieramovaŭ z Turcyjaj ab dałučeńni ŭzamien za zhodu Vialikabrytanii ź planami reformy biudžetu EZ.

U 1992 h. Vialikabrytanija pahadziłasia dazvolić Francyi ŭpisać u Damovu ab Eŭrapiejskim Źviazie pałažeńnie pra Strasburh jak siadzibu Eŭrapiejskaha parlamentu naŭzamien zhody Paryžu na mahčymaść dla Londanu nie prymianiać sacyjalnaha zakanadaŭstva EZ.

«Kali ty daješ mnie zhodu na heta, ja paźniej pahadžusia z taboju ŭ tym – voś tak pracuje Eŭropa», – padsumavaŭ eŭrapiejski dyplamat, papiaredžvajučy, što pazycyja Italii ŭ biełaruskim pytańni moža być tolki pačatkam padpolnaje abutkovaje vajny.

❏

Za bolš detalovaj infarmacyjaj pra žyćcio Eŭropry źviartajciesia da ŭeb-bačyny belarus-europe.info.

Teleprahrama «Akno ŭ Eŭropu» tranślujecca na kanale RTV i praz kabelnaje telebačańnie štoniadzielu a 17-j i z paŭtoram u paniadziełak (a 5.00), aŭtorak (12.00), čaćvier (5.00) i subotu (2.00).

Štotydniovaja radyjoprahrama «Akno ŭ Eŭropu» tranślujecca na Eŭrapiejskim Radyjo dla Biełarusi na častotach AM i FM, praz spadarožnik i ŭ Siecivie a 8-j ranicy (AM: AM: 612 kHz, spadarožnik: 11013 Mhz, FM: 103.4 a 5.40).

Hetyja prahramy finansujucca Eŭrakamisijaj.

• 0
• 0
• 0
• 0
• 0
• 0
• 0
• 0