Sańnikaŭ: Zaklučeńnie ekśpiertaŭ ABSIE pa spravie Aleha Biabienina nieabjektyŭnaje
Zaklučeńnie ekśpiertaŭ ABSIE pa spravie ab hibieli žurnalista Aleha Biabienina nieabjektyŭnaje. Takoje mierkavańnie vykazaŭ kandydat u prezidenty Biełarusi, lidar inicyjatyvy «Jeŭrapiejskaja Biełaruś» Andrej Sańnikaŭ, u kamandzie jakoha pracavaŭ Biabienin.
Jak paviedamlałasia, u apublikavanym siońnia zaklučeńni ekśpiertaŭ ABSIE skazana: vyniki ŭskryćcia i rečavyja dokazy, sabranyja na miescy zdareńnia, «vyrazna śviedčać, što pryčynaj śmierci stała samahubstva praz paviešańnie». «Acenka i analiz ekśpiertaŭ taki, kab na padstavie dokazaŭ i dastupnaj dla ich infarmacyi jany pryjšli da vysnovy, što niama pryčyn dumać, što Biabienina paviesili paśla śmierci», — havorycca ŭ paviedamleńni ABSIE.
«Nie liču heta zaklučeńniem pa spravie ab hibieli Aleha Biabienina, bo jany (ekśpierty) daśledavali papiery adnoj viersii i nie mieli mahčymaści daśledavać samu spravu. Tamu ja liču, što heta znoŭ pačynajucca niejkija palityčnyja hulni, pra jakija my, napeŭna, chutka daviedajemsia. Ja budu zajmacca rasśledavańniem, bo heta moj abaviazak, i ja ŭpeŭnieny, što rasśledavańnie budzie praviedziena», — zajaviŭ palityk.
Jak adznačyŭ Sańnikaŭ, ekśpierty naviedvali miesca zdareńnia, ale, pavodle jaho źviestak, znachodzilisia tam kala 15 chvilin. «Čamuści ŭ spravazdačy nie havorycca, što miesca zdareńnia nie było apiačatana ŭ noč, kali znajšli cieła, nijakich dadatkovych ekśpiertyz nie pravodziłasia. Heta značyć tut idzie viersija, jakuju my čuli ad aficyjnych krynic», — skazaŭ kandydat u prezidenty.
Pavodle słoŭ Sańnikava, asabista jon z ekśpiertami nie razmaŭlaŭ, ale siabry i kalehi, jakija hutaryli z ekśpiertami, havaryli ab svaich sumnieńniach adnosny aficyjnaj viersii śmierci Biabienina. «Ale heta taksama nie adlustravana ŭ zaklučeńniach», — zaŭvažyŭ palityk.
Ciapier čytajuć
«Vitold kazaŭ: «Nu što vy, što vy…» A mianty paśla kryčali pra mora kryvi». Palitviazień z susiedniaj kamiery raskazaŭ pra śmierć Ašurka3
Kamientary