Statkievič: Siońnia kančatkova stała zrazumieła, što vybaraŭ u Biełarusi niama

zajaviŭ 14 śniežnia ŭ Homieli kandydat u prezidenty Mikałaj Statkievič.

U navučalna-mietadyčnym centry, raźličanym na 250 miescaŭ, sabralisia pryblizna 400 čałaviek, mnohim daviałosia stajać u prachodach i kala sceny. Statkievič pryjechaŭ u Homiel razam ź inšym kandydatam u prezidenty Dźmitryjem Usam. Pierad pryjezdam kandydataŭ u zale prajšło vystupleńnie barda Volhi Ciareščanki, jakaja vykanała pieśni na biełaruskaj movie ŭłasnaha sačynieńnia, a taksama na vieršy Sieržuka Sokałava-Vojuša i Łarysy Hienijuš.

Na sustreču z kandydatami pryjšli pradstaŭniki miascovaj «viertykali» i BRSM, jakija sprabavali adciahnuć uvahu na siabie, patrabavali vykłaści prahramu, šumieli, hrukali nahami.

«Chamstva — jano taksama kapirujecca, jak i nizkaja kultura, jakaja idzie źvierchu»,

— prakamientavaŭ Statkievič vychadki ekscentryčnych dam, jakija kryčali i zabiahali na scenu.

Jon paviedamiŭ prysutnym, što ŭžo siońnia naziralniki fiksujuć masavyja falsifikacyi, i zaznačyŭ, što heta čakałasia, bo 99% členaŭ vybarkamaŭ — ad dziejnaj ułady. Pavodle słoŭ Statkieviča, daterminovaje hałasavańnie — kanał dla falsifikacyj. Jon zaklikaŭ hamialčan hałasavać u dzień vybaraŭ, a taksama ŭklučycca ŭ vybarčy praces i zarehistravacca niezaležnymi naziralnikami.

Statkievič paabiacaŭ, što 19 śniežnia jon budzie na Kastryčnickaj płoščy ŭ Minsku i nie padviadzie tych, chto na jaho spadziajecca.

Hamialčanie pytalisia ŭ Statkieviča ab jaho mahčymych kantaktach ź dziaržaŭnymi čynoŭnikami, losie biełaruskaj movy, uspaminali źnikłych palitykaŭ.

Dźmitryj Us paviedamiŭ ab tym, čamu i jak treba źmianić vybarčaje zakanadaŭstva, ab pryncypach farmiravańnia ŭčastkovych kamisij.

«Vydatnyja ŭražańni, cudoŭnyja ludzi, jakija pryjšli sami, a nie pa raznaradcy, cudoŭnaja sustreča,

navat strašna za toj davier i tyja spadziavańni, jakija ludzi ŭskładajuć na mianie i inšych kandydataŭ, na pieramieny. U ludziej źjaŭlajecca nadzieja, pakul aściarožnaja. Vielmi važna realizavać hetuju nadzieju, kab ludzi potym nie adčuvali, što im zdradzili», — zajaviŭ Statkievič.

Asablivaściu sustrečy jon nazvaŭ «kolkaść prysłanych siudy orhanami ŭłady vybarščykaŭ». «Ale heta nie pieraškadžaje mnie. Jany, hetyja damy ad adukacyi, jakija pavinny być intelihientnymi, svaimi krykami prynižajuć siabie», — zajaviŭ palityk.

Kažučy ab mierapryjemstvie 19 śniežnia na Kastryčnickaj płoščy, kandydat vykazaŭ mierkavańnie, što treba «prymusić uładu paśla hetaha dnia ličycca ź biełaruskim narodam — jak minimum, jak maksimum — u Biełarusi źjavicca bolš prystojnaja ŭłada».

• 0
• 0
• 0
• 0
• 0
• 0
• 0
• 0