Jeŭraparłamientaryi zaklikali Jeŭrasajuz prypynić vydaču viz biełaruskim čynoŭnikam, adkaznym za parušeńni padčas prezidenckich vybaraŭ. Pra heta havorycca ŭ sumiesnym zaklučeńni ŭdzielnikaŭ dyskusii,
što prajšła padčas pasiadžeńnia kamiteta pa zamiežnych spravach Jeŭraparłamienta ŭ Brusieli 12 studzienia.
Vykładajučy pałažeńni dakumienta, kiraŭnik kamiteta pa zamiežnych spravach Habryel Albiercini zaznačyŭ: prezidenckija vybary ŭ Biełarusi nie adpaviadali mižnarodnym standartam. Jeŭraparłamientaryi asudzili represii ŭ dačynieńni da mirnych demanstrantaŭ 19 śniežnia ŭ Minsku, a taksama aryšty i zatrymańni ŭ Biełarusi. Jany zaklikajuć ES pierahledzieć adnosiny ź Biełaruśsiu.
Udzielniki dyskusii prapanavali pradoŭžyć vizavyja sankcyi biełaruskim čynoŭnikam da vyzvaleńnia palityčnych źniavolenych. Pry hetym košt viz dla zvyčajnych hramadzian Biełarusi prapanoŭvajecca skaracić.
Jeŭraparłamientaryi taksama prapanoŭvajuć Jeŭrasajuzu akazać finansavuju padtrymku biełaruskim ŚMI i NDA, padtrymać hrantami studentaŭ ź Biełarusi.
Aprača taho, prapanavana pierahledzieć parłamienckija adnosiny ź Biełaruśsiu ŭ miežach Parłamienckaj asamblei Uschodniaha partniorstva (Jeŭraniest).
Jeŭraparłamientaryi asudzili zakryćcio ofisa ABSIE ŭ Minsku.
Staršynia Jeŭraparłamienta Ježy Buziek padčas dyskusii padkreśliŭ: ES pavinien zahavaryć u adzin hołas i patrabavać vyzvaleńnia biełaruskich palitźniavolenych.
«Varta pamiatać słovy Jevy Niaklajevaj pra toje, što ŭ nas jość klučy ad turmy, dzie znachodzicca jaje baćka», — skazaŭ jon.
Siarod prapanoŭ, jakija zasłuhoŭvajuć uvahi, kiraŭnik Jeŭraparłamienta adznačyŭ zaklik da praviadzieńnia ŭ Biełarusi paŭtornych vybaraŭ.
Buziek, u svaju čarhu, prapanavaŭ vyklučyć Biełaruś ź mižnarodnych spartyŭnych mierapryjemstvaŭ — takich jak Alimpijada i Kubak śvietu.
Jon taksama prapanavaŭ nakiravać u Biełaruś misiju, kab rasśledavać padziei, źviazanyja z prezidenckimi vybarami, i abmierkavać biełaruskuju situacyju na siesii ŭ Strasburhu na nastupnym tydni. Nieabchodna abmierkavać i pytańni supracoŭnictva ź Biełaruśsiu ŭ miežach Jeŭraniesta, miarkuje Buziek.
Pra važnaść padtrymki hramadzianskaj supolnaści Biełarusi kazaŭ u svaim vystupleńni jeŭrakamisar pa pytańniach pašyreńnia i Jeŭrapiejskaj palityki dobrasusiedstva Štefan Fiule. Jeŭrasajuz, pavodle jaho słoŭ, pavinien «adkryć kanały pramoj dapamohi NDA, ŚMI i studentam, a taksama ablehčyć dla biełarusaŭ mahčymaści pajezdak u ES».
«Ułady pavinny nieadkładna vyzvalić zatrymanych i spynić kryminalnuju spravu ŭ dačynieńni da ich, kali chočuć paźbiehnuć sankcyj. Heta pytańnie niekalkich dzion, a nie tydniaŭ», — padkreśliŭ jeŭrapiejski palityk.
Čakajecca, što situacyja ŭ Biełarusi paśla prezidenckich vybaraŭ budzie abmiarkoŭvacca na siesii Parłamienckaj asamblei Savieta Jeŭropy ŭ Strasburhu 24–28 studzienia.
Palityčnaje rašeńnie Jeŭrasajuza pa sankcyjach u dačynieńni da biełaruskich čynoŭnikaŭ
pavinna być pryniata 31 studzienia na naradzie ministraŭ zamiežnych spraŭ krain ES.
Kamientary