Na nastupnym tydni ABSIE raskaža pra biełaruskija vybary

Vynikovy dakład mižnarodnych naziralnikaŭ Biuro pa demakratyčnych instytutach i pravach čałavieka (BDIPČ) ABSIE ab prezidenckich vybarach u Biełarusi budzie apublikavany ŭ pačatku nastupnaha tydnia.

U papiarednim zaklučeńni, abnarodavanym 20 śniežnia ŭ Minsku, naziralniki zaznačyli, što vybary ŭ Biełarusi pa-raniejšamu nie adpaviadajuć standartam ABSIE.

«Prezidenckija vybary pakazali, što Biełarusi ŭsio jašče treba budzie prajści značny šlach, kab pačać adpaviadać svaim abaviazacielstvam u miežach ABSIE, chacia byli zrobleny niekatoryja kankretnyja palapšeńni», — havaryłasia ŭ dakumiencie.

Naziralniki zaznačali, što dzień hałasavańnia «byŭ azmročany zatrymańniami bolšaści kandydataŭ u prezidenty i socień aktyvistaŭ, žurnalistaŭ i pradstaŭnikoŭ hramadzianskaj supolnaści».

«U toj čas jak hałasavańnie ŭ dzień vybaraŭ u cełym atrymała stanoŭčuju acenku, praces značna pahoršyŭsia padčas padliku hałasoŭ: pavodle acenak naziralnikaŭ, amal pałova hałasoŭ (pad nazirańniem) padličvałasia drenna abo vielmi drenna.

Kiraŭnik karotkaterminovaj misii naziralnikaŭ ABSIE i delehacyi PA ABSIE Toni Łojd padkreśliŭ, što «hetyja vybary nie zmahli dać Biełarusi novy start, u jakim jana mieła patrebu». «Praces padliku hałasoŭ nie byŭ prazrystym. Narod Biełarusi zasłuhoŭvaje lepšaha. U pryvatnaści, ciapier ja čakaju, što ŭrad budzie adkazvać za aryšty kandydataŭ u prezidenty, žurnalistaŭ i pravaabaroncaŭ», — skazaŭ Łojd.

U svaju čarhu kiraŭnik doŭhaterminovaj misii nazirańnia BDIPČ ABSIE Hiert Chinrych Arenc zajaviŭ: «Ja vielmi spadziavaŭsia, što hetym razam my zmožam dać bolš pazityŭnuju acenku. Na žal, heta niemahčyma ŭ śviatle niedachopaŭ u padliku hałasoŭ i žorstkaha adkazu ŭładaŭ na ŭčarašnija demanstracyi».

Pasoł Arens zaklikaŭ ułady Biełarusi zachoŭvać prychilnaść abaviazacielstvam u miežach ABSIE i nie spyniać demakratyčnyja reformy, nieabchodnyja dla pryviadzieńnia vybaraŭ u adpaviednaść ź mižnarodnymi standartami.

Pry hetym naziralniki ABSIE zaznačyli, što padčas kampanii ŭsie kandydaty ŭ prezidenty mieli mahčymaść bieśpieraškodna danieści svaje pasłańni da elektaratu. Jany, u pryvatnaści, mahli źviartacca da elektaratu naŭprost padčas dvuch teledebataŭ i biaspłatnaha efirnaha času, vydzielenaha im biez cenzury, ale ŭ abmiežavanym abjomie.

Tym nie mienš dziejny prezident i astatnija kandydaty spaborničali ŭ niaroŭnych umovach, padkreślili naziralniki.

• 0
• 0
• 0
• 0
• 0
• 0
• 0
• 0