Chakiejnaje «Dynama» — u plej-of KCHŁ

Vyjhraŭšy 18 lutaha ŭ matčy čempijanata Kantynientalnaj chakiejnaj lihi ŭ «Sałavat Jułajeva» (Ufa) 3:1 (0:0, 1:1, 2:0), minskaje «Dynama» (hałoŭny trenier — Marek Sikora) za tur da kanca «rehularki» zavajavała pucioŭku ŭ plej-of turniru. Adbyłosia heta taksama tamu, što siońnia nižaharodskaje «Tarpieda» prajhrała «Avanhardu» ź likam 1:3 i straciła šancy dahnać biełarusaŭ.

Šajby: (Pietrašak, 28, Štumpieł, 47, Dziamahin, 54 — Pankoŭ, 25)

«Dynama» zaniała ŭ Zachodniaj kanfierencyi 8-je miesca (u kamandy 74 bały ŭ 53-ch hulniach), «Tarpieda» — 9-je (70 bałaŭ).

Siońnia za hulnioj na «Minsk-Arenie» nazirali 14 961 čałaviek, da čarhovaha anšłaha nie chapiła ličanych sotniaŭ.

Na paślamatčavaj pres-kanfierencyi hałoŭny trenier biełaruskaha kłuba Marek Sikora, niahledziačy na pieramohu, vyhladaŭ zakłapočanym. Na pytańnie žurnalistaŭ, u čym pryčyna niespakoju, jon zaznačyŭ, što ŭźnikli prablemy ŭ jaho domie ŭ Čechii: prarvała trubu, i pałova doma akazałasia źniščanaj.

Tym nie mienš pan Sikora zajaviŭ, što

siońniašni vychad u plej-of pakul samy ščaślivy viečar u spartovaj bijahrafii.

«Ja vielmi bajaŭsia, što pastaŭlenuju pierad pačatkam siezona zadaču [vychad u plej-of] my nie vykanajem», — skazaŭ trenier. Na pytańnie, ci jość u jaho niejki recept rassłableńnia paśla hulni, sp. Sikora skazaŭ, što ŭ subotu pojdzie ŭ Opieru na «Madam Baterflaj».

Žurnalisty pry kancy pres-kanfierencyi zładzili čechu avacyju, a voś trenier ufimcaŭ Viačasłaŭ Bykaŭ naohuł admoviŭsia kamientavać hulniu.

***

«Dynama» jašče nieabchodna pravieści adnu hulniu ŭ rehularnym čempijanacie: u niadzielu suprać mahnitahorskaha «Mietałurha». Adnak supiernik pa 1/8 finału (h.zn. čverćfinał Zachodniaj kanfierencyi) viadomy:

heta lidar Zachada jarasłaŭski «Łakamatyŭ».

U sioletnim rehularnym čempijanacie «Dynama» i «Łakamatyŭ» hulali pamiž saboj čatyry razy. «Dynama» dvojčy vyjhrała: 3:0 (pieršaja pieramoha "Dynama" ŭ siezonie 2010/2011), druhi raz pa bulitach 1:2, i dvojčy prajhrała z roźnicaj u adnu šajbu (1:2, 2:3).

U plej-of kamandy hulajuć da čatyroch pieramoh.

Pieršyja dźvie hulni (23 i 24 lutaha), «Dynama» praviadzie ŭ Jarasłaŭli, treciuju i čaćviertuju (26 i 27 lutaha) u Minsku.

Nahadajem, što «Dynama» dva siezony nie mahło prabicca ŭ plej-of, pryčym u minułym siezonie straciła navat tearetyčnyja šancy za piać turaŭ da kanca rehularnaha čempijanatu.

• 0
• 0
• 0
• 0
• 0
• 0
• 0
• 0