Jak nam zachavać SND?

Mienski samit SND – pieršy ŭ hetaj arhanizacyi, kali skandalny aspekt zaćmiŭ palityčny. Ci nia jość skandał toj samaj novaj cudoŭnaj vyratavalnaj kancepcyjaj, jakaja moža zachavać SND?

Davajcie na chvilinku ŭjavim, što nijakaha skandału ŭ Miensku na hetym tydni nie było. Ni «pryponaŭ» žurnalistam «MK» i «'» na ŭvachodzie ŭ «čupa čups». Ni demaršu ichnych rasiejskich kaleh. Ni Pucina, jaki chavajecca ad abjektyvaŭ «česnych žurnalistaŭ», pakul tyja ŭ svaju čarhu, namahajučysia prataranić kare jahonych bodyhardaŭ, jenčać: «Što vy robicie, hady, u nas z vami adna sajuznaja dziaržava!»

Što ŭ takim vypadku my atrymali b ź infarmacyjnych stužak?

«Kiraŭniki dziaržavaŭ SND zahadali Savietu Ministraŭ zamiežnych spraŭ Sadružnaści raspracavać kancepcyju refarmavańnia arhanizacyi... samit sadziejničaŭ pašyreńniu rehijanalnaha supracoŭnictva... važny krok na šlachu abmienu pravavoj infarmacyjaj...»

U chicie suśviestnych navinaŭ takoha kštałtu pisulki sastupajuć miesca navat pres-relizu dyrekcyi Sidnejskaha zaaparku ab tym, što samka hipapatama razradziłasia tryma albinosami.

Samit, a z ulikam kryzisu SND, mahčyma, i ŭvieś prajekt postsavieckaj intehracyi, vyratavaŭ hučny skandał vakoł tych samych rasiejskich žurnalistaŭ.

Heta pavinna vyklikać u hałovach Rušajły i inšych adkaznych za ideju zachavańnia SND adpaviednyja mazhavyja kanvulsii.

Mahčyma VIP-skandały i jość novaj filazofijaj SND.

Pry hetym Rušajłu nia treba rabić staŭku na los.

Była b fajna za miesiac da nastupnaha kurułtaju lideraŭ Sadružnaści ŭ časopisie Rasiejskaj federacyi ciełaachoŭnikaŭ «Baciania-kambat» drukanuć artykuł «Rodzičy Rachmo-va nia mohuć źleźci z traŭki«. Paśla hetaha na samicie ŭ Dušanbe ciełaachoŭnikaŭ Pucina nie dapuskajuć u zalu pasiedžańniaŭ. U adkaz na heta ŭ znak karparatyŭnaj salidarnaści ŭsie ciełaachoŭniki zvalvajuć z samitu. Smak!!!

Z aktorami pytańniaŭ nia budzie: nia źnikli jašče prezydenty-fryki, jakija vierać, što sadružnaść maje budučyniu. Jany maralna hatovyja prajavić svaje aktorskija tałanty.

Naprykład, u Dušanbe adzin prezydent (zrazumieła, adpaviedna z scenarom) moža zapatrabavać adzinaj volnaj ekanamičnaj zony handlu eratyčnymi časopisami, druhi -- pašyreńnia abmienu infarmacyjaj ab tym, z kim hulaje Penelopa Kruz. U treciaha padčas samitu «vypadkova» z kišeni moža vytrusicca pakiecik z hrašyma. Čaćvierty chaj zajavić, što piaty jaho dastaŭ...

Inšym sposabam vy cikavaść da SND nie zachavajecie!

• 0
• 0
• 0
• 0
• 0
• 0
• 0
• 0