Premija za čeles

Premiju «Inavacyja», zasnavanuju rasijskim Ministerstvam kultury i Dziaržaŭnym centram sučasnaha mastactva, prysudzili akcyi art-hrupy «Vajna», aktyvisty jakoj namalavali fałas na Liciejnym moście ŭ Sankt-Pieciarburhu.

U noč z 14 na 15 červienia 2010 hoda paśla razvodu mosta 65-mietrovy malunak padniaŭsia nasuprać budynka pieciarburhskaha ŭpraŭleńnia FSB.

Udzielniki art-hrupy pa pryz u 400 000 rasijskich rubloŭ, prysudžanyja ŭ naminacyi «Tvor vizualnaha mastactva», nie źjavilisia. Raniej Leanid Nikałajeŭ i Aleh Varotnikaŭ zajavili, što ich tvorčaści nie patrabujecca aficyjnaja ŭchvała.

U listapadzie minułaha hoda Nikałajeva i Varotnikava aryštavali za akcyju «Zamkavy pieravarot», padčas jakoj jany pieraviarnuli milicejskuju mašynu kala Michajłaŭskaha zamka ŭ Pieciarburhu.

Pakul jany znachodzilisia pad aryštam, brytanski mastak-hrafityst Benks arhanizavaŭ rasprodaž svaich pracaŭ. Vyručanyja srodki — 90 tysiač funtaŭ sterlinhaŭ (4,5 młn rubloŭ) — byli nakiravanyja na dapamohu aktyvistam «Vajny».

Z hetych hrošaj byŭ uniesieny zakład u pamiery 300 tysiač rubloŭ za kožnaha, paśla čaho ŭ kancy lutaha Nikałajeva i Varotnikava vypuścili na volu.

Praź miesiac rasijskija pravaachoŭnyja orhany raspačali kryminalnuju spravu ŭ suviazi z napadam na traich aktyvistaŭ «Vajny». Pa słovach paciarpiełych, tyja, chto na ich napaŭ, pradstavilisia supracoŭnikami kryminalnaha vyšuku.

Naminacyja akcyi art-hrupy na premiju «Inavacyja» supravadžałasia skandałam.

U piaciorku naminantaŭ ich uklučyŭ ekśpiertny saviet, siarod udzielnikaŭ jakoha — zahadčyk adździeła najnoŭšych płyniaŭ Ruskaha muzieja Alaksandr Baroŭski i dyrektar Multymiedyja Art muzieja (były Dom fatahrafii) Volha Śvibłava.

Paśla arhanizatary konkursu vyrašyli vyklučyć hrupu z šort-lista, matyvavaŭšy heta nievykanańniem jaje ŭdzielnikami farmalnaha patrabavańnia nakiravać u arhkamitet zhodu na ŭdzieł u konkursie ŭsich aŭtaraŭ akcyi.

Adzin z naminantaŭ, Juryj Avakumaŭ, zajaviŭ, što «rašeńnie arhkamiteta stavić uvieś konkurs pad pahrozu pravału, tamu što ciapier udzieł u konkursnaj vystavie robicca zusim nieprystojnym». Nie pahadzilisia z rašeńniem arhkamiteta i siabry žury, kuratary Kaciaryna Dziohać i Andrej Jerafiejeŭ.

Sami Leanid Nikałajeŭ i Aleh Varotnikaŭ na pres-kanfierencyi ŭ Sankt-Pieciarburhu skazali, što «nijakich papieraŭ pra zhodu padpisvać nie buduć».

U vyniku žury premii «Inavacyja» zajaviła, što vybirać budzie ź pieršapačatkovaha śpisu naminantaŭ.

• 0
• 0
• 0
• 0
• 0
• 0
• 0
• 0