Zahadka sudziejskaj chvaroby

Abviaščeńnie prysudu ŭ spravie Mikoły Statkieviča, Dźmitryja Vusa, Alaksandra Kłaskoŭskaha i inšych pieraniesienaje, pavodle aficyjnaj versii — u suviazi z chvarobaj sudździ Ludmiły Hračovaj.

Ale ci hetaja pryčyna sapraŭdnaja?

Mahčyma i tak. Ale ŭ krainie, dzie ŭsio palityka, zanadta vialikaja spakusa bačyć u lubych padziejach palityčnuju podbiŭku i palityčny raźlik. Tym bolš, što padstavy dla takoha pohladu jość. Navat toje, što abviaščeńnie prysudaŭ było pryznačanaje na piatnicu, a nie na nastupny dzień paśla apošnich słovaŭ padsudnych, mieła vidavočnaje i zusim nie jurydyčnaje tłumačeńnie: naŭrad ci kiraŭniki ŭradaŭ pa mienšaj miery niekatorych krain SND byli b zadavolenyja, kali b padčas ich prysutnaści ŭ Miensku abviaščalisia prysudy byłym kandydatam u prezydenty Biełarusi.

Ciapier abviaščeńnie prysudu na pracesie, na jakim prakuror paprasiŭ biesprecedentna žorstkich pakarańniaŭ, iznoŭ pieraniesienaje.

Nia vyklučana, što sudździa Hračova vyrašyła parušyć kruhavuju paruku ŭzakonienaha biezzakońnia, nie zachacieła być vincikam represiŭnaj mašyny, nie zachacieła brać hrech na dušu.

Tym bolš, što raniej jana padobnyja pracesy nie viała, ŭ śpisie nieŭjaznych u EZ nie fihuruje, a tut davodzicca zaćviardžać samyja žorstkija prysudy.

Viała praces sud́dzia Hračova, asabliva nie paturajučy abvinavačanym, ale mahčyma na stadyi vyniasieńnia prysudu ŭźnik čałaviečy faktar. Jana, vidać, nie była hatovaja kinuć vyklik systemie, admovicca publična ci apraŭdać padsudnych. Ale nia vyklučana, što i ahučyć abvinavaŭčy prysud — taksama. U vyniku sytuacyja akazałasia padviešanaj.

Vyklučać takuju versiju nie vypadaje, ludzi — ŭsio ž ludzi, a nie vinciki, ŭsiakaje zdarajecca.

Ale ŭsio ž bolš vierahodnaj ujaŭlajecca inšaja, pavodle jakoj

pryčyna pieranosu abviaščeńnia prysudu — nie maralnyja pakuty sudździ, a palityčnyja raźliki tych, chto vyznačaje prysudy.

Jakraz padčas pasiadžeńnia premjeraŭ krain SND, a dakładniej, padčas pieramovaŭ z rasiejskim premjeram Uładzimiram Pucinym stali kančatkova viadomymi ŭmovy, na jakich Rasieja daje hrošy Biełarusi.

Umovy hetyja nia nadta spryjalnyja dla aficyjnaha Miensku, hrošaj dajuć značna mienš, čym spadziavaŭsia biełaruski bok, pryčym vydzialeńnie hrošaj supravadžajecca roznymi ŭmovami, składanymi dla biełaruskich uładaŭ. Nasamreč nia tak užo i važna, ci prymušajuć Miensk pradavać «familnaje srebra» ajčynnaj pramysłovaści rasiejskim kampanijam ci, jak pra toje kazaŭ rasiejski ministar finansaŭ Alaksiej Kudryn, prymušajuć pradavać kamu zaŭhodna — važna toje, što takaja maštabnaja pryvatyzacyja budzie aznačać złom usioj biełaruskaj sacyjalna-ekanamičnaj madeli, jakaja stolki hadoŭ była pradmietam honaru biełaruskaha kiraŭnika.

Zrazumieła, što rabić heta vielmi nia chočacca. I alternatyvy ŭ pryncypie jość. Možna źviarnucca pa hrošy ŭ MVF i da Zachadu. Praŭda, tam chutčej za ŭsio taksama zapatrabujuć pryvatyzacyi, ale mahčyma ŭ mienšych pamierach i na bolš prymalnych umovach.

Ale ŭ ciapierašniaj palityčnaj sytuacyi hetaja alternatyva — nia bolš čym mara. Ad Zachadu aficyjny Miensk zaraz kali čaho i moža dačakacca, to ekanamičnych sankcyj, a nie ekanamičnaj dapamohi. Pryčym viadomaja i cana pytańnia — palitviaźni.

Praściej za ŭsio biełaruskija ŭłady mahli b vyrašyć prablemu, asudziŭšy i pamiłavaŭšy ŭsich da adnaho fihurantaŭ spravy 19-ha śniežnia. Ale bajusia, što na heta nia chopić navat nie humannaści i vielikadušnaści, u najaŭnaści jakich biełaruskija ŭłady naahuł nie padazrajucca, a chałodnaha raźliku. Što taki šyroki žest nasamreč pryniasie bolš, čym handal palitviaźniami ŭrazdrob, ad čaho partnery chutčej za ŭsio zaraz prosta admoviacca.

Ale, hledziačy pa ŭsim, niejkija formuły handlu va ŭładnych kabinetach ciapier jak minimum abmiarkoŭvajucca.

Zrazumieła, nie sudździoj Hračovaj.

• 0
• 0
• 0
• 0
• 0
• 0
• 0
• 0