Prodaž u nieprazrystych umovach rasijcam biełaruskich pradpryjemstvaŭ «kateharyčna supiarečyć nacyjanalnym intaresam».
Ekanamičnaja situacyja ŭ Biełarusi i zamiežnapalityčnaja abstanoŭka vakoł jaje paśla 19 śniežnia 2010 hoda stvarajuć istotnuju pahrozu ekanamičnaj i palityčnaj niezaležnaści biełaruskaj dziaržavy.Pra heta havorycca ŭ zajavie Partyi BNF «Ab pahrozie niezaležnaści Biełarusi», pryniataj 21 maja na pasiadžeńni Sojma.
U pryvatnaści, havorycca ŭ dakumiencie, «Kreml i blizkija da jaho aliharchi atrymali najlepšuju za apošnija niekalki hadoŭ mahčymaść realizacyi svaich płanaŭ u dačynieńni da Biełarusi».
U zajavie padkreślivajecca, što
biełaruskamu hramadstvu amal nieviadomy źmiest pieramoŭ i damoŭlenaściaŭ, jakija byli dasiahnuty pamiž biełaruskimi ŭładami i Kramlom u apošnija miesiacy. «Adnak vidavočna, što ŭ abmien na palityčnuju padtrymku i zapluščvańnie vačej na najaŭnaść palitviaźniaŭ Kreml zapatrabuje prodaž rasijskim ułaśnikam najbolš efiektyŭnych biełaruskich pradpryjemstvaŭ i abjektaŭ infrastruktury»,— havorycca ŭ zajavie.
Sojm Partyi BNF ličyć, što prodaž u nieprazrystych umovach rasijcam biełaruskich pradpryjemstvaŭ i abjektaŭ infrastruktury «kateharyčna supiarečyć nacyjanalnym intaresam i stavić pad pahrozu niezaležnaść Biełarusi».
Partyja zaklikaje ES, ZŠA i mižnarodnyja arhanizacyi akazać na Kreml cisk, kab jon admoviŭsia ad namieraŭ vykarystać siońniašniuju situacyju ŭ Biełarusi «vyklučna dla ŭzbahačeńnia rasijskich aliharchaŭ i zadavalnieńnia ŭłasnych hieapalityčnych ambicyj».
Pry hetym Sojm partyi nahadvaje rasiejskamu kiraŭnictvu i biznesoŭcam, što
«pryvatyzacyjnyja damoŭlenaści, zaklučanyja nieprazrysta ŭ siońniašniaj ciažkaj dla naroda Biełarusi situacyi va ŭmovach mižnarodnaj izalacyi, vyklikanaj palityčnymi represijami režymu, buduć padlahać pierahladu ŭ budučyni».
Taksama Sojm vyznačyŭ datu čarhovaha źjezdu Partyi BNF: jon adbudziecca 3–4 vieraśnia. Na źjeździe płanujecca abrańnie kiraŭnictva partyi, a taksama pryniaćcie stratehii dziejnaści na dva hady.
Kiraŭnictva partyi płanuje padać zajaŭku na praviadzieńnie źjezdu ŭ Domie kultury traktarnaha zavoda.
Kamientary