Sapsavaŭšy vyhlad Trajeckaha pradmieścia, Čyž biarecca za Rakaŭskaje?

Toje, što chlebakambinat № 1, jaki znachodzicca pasiarod Rakaŭskaha pradmieścia ŭ Minsku, źbirajucca znosić, daŭno nie źjaŭlajecca sakretam. Jon trapiŭ u płan vynasu pradpryjemstvaŭ z terytoryi stalicy za kalcavuju darohu, ale pracy nijak nie pačynajucca — banalna niama hrošaj. Tym nie mienš, pavodle infarmacyi «NN», patrebnyja srodki ŭžo znojdzienyja.

Ich hatovy dać patencyjny inviestar — «Trajpł» na čale z sumnaviadomym Juryjem Čyžom…

Apošni punkt niekranutaha Mienska

Rakaŭskaje pradmieście — ledź nie apošniaja kropka ŭ centry horada, da jakoj nie dabralisia ruki «restaŭrataŭ» i «rekanstruktaraŭ», jakija pracujuć u styli ahrareniesansu. Zakrytaje ad šuma vulic hihanckim žyłym domam, u skład jakoha ŭvachodzić handlovy dom «Na Niamizie», pradmieście ź jaho cichimi vułačkami i starymi domikami zastajecca adnym ź lubimych miescaŭ amataraŭ staroha Minska.

Hety rajon adnosicca da samych staražytnych u stalicy — pieršyja pasialeńni źjavilisia tut jašče ŭ XI stahodździ.

Ciapier staryja damy zaniali ofisy i restarany.

Za niekalki dziasiatkaŭ mietraŭ ad chlebazavoda znachodzicca viadomy «Rakaŭski brovar», jaki, darečy, naležyć Juryju Čyžu.

Chlebakambinat staŭ lišnim

Zhodna z hienieralnym płanam Minska, chlebazavody № 1 i № 2 (na Krapotkina, 33) «nie adpaviadajuć patrabavańniam Hienieralnaha płana i padlahajuć transfarmacyi vidaŭ vykarystańnia». Inšymi słovami, na ich miescy možna zrabić što-niebudź bolš patrebnaje — čarhovy hatel ci ofisny centr.

Umovy, jakija vysoŭvajucca dla inviestaraŭ, hučać surova.

I jašče adzin hatel

Tym časam UP «Minskhrada» (majsternia «Minskprajekta») prydumaŭ, što možna pabudavać u Rakaŭskim pradmieści.

Ideja nie była aryhinalnaj — čarhovy elitny hatel.

Čytajem apisańnie.

«Apartamient-hatel «Rakaŭskaje pradmieście» ŭklučaje:

— žyłuju častku ahulnaj płoščaj 15 000 m² (kolkaść žylcoŭ 190–250 čałaviek);

— błok servisnaha absłuhoŭvańnia ahulnaj płoščaj 2000 m²:

— choł z recepcyjaj, kaviarniu, bar, SPA- i fitnes-centr, biznes-centr z kanfierenc-załaj,

— pryjomnyja punkty chimčystki i pralni, apteka, vuzieł suviazi;

— nievialiki ŭbudavany dziciačy sadok;

— pamiaškańni «Biełprambudbanka» 800 m².

U dvuch padziemnych uzroŭniach z atryumam znachodziacca adpačynkovy centr (internet-kafe), aŭtastajanka na 300 mašynamiescaŭ i spadarožny servis dla klijentaŭ padziemnaj aŭtastajanki, a taksama restaran z mini-piakarniaj ahulnaj płoščaj 1000 m²».

U apisańni ŭdakładniajecca, što vytvorčyja i składskija pabudovy, jakija nie achoŭvajucca dziaržavaj, padlahajuć znosu, jak i budynak «Biełprambudbanka» i administracyjny budynak «Minskchlebprama».

Takim čynam, dziaržaŭnyja architektary prapanujuć usunuć pasiarod nizkapaviarchovaha — i hetym miłaha sercu — Rakaŭskaha pradmieścia zabaŭlalny centr, vyšynia jakoha budzie varjiravacca ad troch da siami pavierchaŭ! Varta ŭzhadać imiony stvaralnikaŭ prajekta. Heta architektary Valancina Pryhoda, Anatol Siaredzič, Uładzimir Citoŭ, Volha Fiłatava, inžynier Ludmiła Špileŭskaja i dyzajnierka Alena Nikicienka.

Zły hienij minskaj historyi

Zrazumieła, što staryja budynki pasiarod kvartała, jakija achoŭvajucca dziaržavaj, patencyjnamu inviestaru «Trajpłu» stajać jak kostka ŭ horle. Viadoma ž,

jany buduć psavać chaj-tekavy raj u pradmieści.

Čynoŭniki pakul što nibyta ŭpirajucca, ale nakolki chopić ich siłaŭ, kali ŭličyć, što na supraćlehłym baku rynha znachodzicca Juryj Čyž?

Miljaniera možna ličyć złym hienijem histaryčnych kvartałaŭ Minska. Jahony 23-paviarchovy žyły kompleks «La Trajeckaha» sapsavaŭ vyhlad adnajmiennaha pradmieścia, ciapier, vidać, čarha dajšła i da Rakaŭskaha…

Staršynia Tavarystva achovy pomnikaŭ Anton Astapovič tłumačyć, što

choć Rakaŭskaje pradmieście i nie ŭvachodzić u centr horada, jano achoŭvajecca zakanadaŭstvam.

Nijakich achoŭnych zon pakul nie stvorana, a hrošy inviestara padbirajucca da Rakaŭskaha pradmieścia ŭsio bližej.

Atrymać aficyjny kamientar ad «Trajpła», na žal, nie vyhladaje mahčymym. Raniejšyja sproby kamunikavańnia z asobaj, adkaznaj za suviazi z presaj, zvodziłasia da adpraŭleńnia elektronnych listoŭ. Ni na adzin ź ich adkazu tak i nie było.

• 0
• 0
• 0
• 0
• 0
• 0
• 0
• 0