Lidskija ŭłady abvierhli čutki pra aryšt hienieralnaha dyrektara AAT «Lidaahraprammaš» Viktara Kruhłaha. Ale paćvierdzili, što kryminalnyja spravy ŭzbudžany.
Lidskija ŭłady abvierhli čutki pra aryšt hienieralnaha dyrektara AAT «Lidaahraprammaš» Viktara Kruhłaha. Ale paćvierdzili, što kryminalnyja spravy ŭzbudžany.
U Interniecie źjaviłasia infarmacyja, što Viktar Kruhły aryštavany, uzbudžana kryminalnaja sprava, a rabotnikam pradpryjemstva było prapanavana padpisać list na adras Hienieralnaj prakuratury z prośbaj vyzvalić dyrektara «Lidaahraprammaša». Abnarodavany navat vytrymki z hetaha lista: «Rabočyja, ITR, słužboŭcy pracavali na svaich miescach pa 10—12 hadzin, časam biez vychadnych na dabravolnych pačatkach... Kožny razumieŭ, što jahonaja praca patrebnaja dla vyratavańnia ŭradžaju i vykanańnia charčovaj prahramy krainy. Rabočyja zavoda kazali, što my možam pracavać stolki, kolki treba, hałoŭnaje — kab uradžaj 2006 h. byŭ vyratavany... Tamu my z abureńniem pačuli, što niechta piša paskvili, što nas prymušali pracavać i nam nie płacili zarobki za pazaŭročnuju pracu. Što srodki, adpuščanyja na vyrab kambajnaŭ, pajšli na inšyja mety — dakładna skazać nichto nie moža, na jakija, ale mietał — nie toj jakasci, jakoj treba było, choć zakuplaŭsia pa tendery. U suviazi z hetym na zavod začascili pravierki, dublirujuć adna adnu, adryvajučy česnych pracaŭnikoŭ ad asnoŭnaj pracy. Kantralujučymi orhanami było praviedziena 38 pravierak... Kalektyŭ pradpryjemstva ličyć, što nakirunki pracy kiraŭnictva zavoda vybrała pravilnyja i prosić dać mahčymaść pradpryjemstvu bolš šyrokija paŭnamoctvy ŭ vykananni pastaŭlenych zadač nie va ŭron jakasci, a ŭ miežach zakona. U suviazi z čym prosim Vas spynić kryminalnuju spravu ŭ adnosinach da dyrektara V.V.Kruhłaha jak nadumanaje z metaj destabilizavać pracu zavoda».
Jak by tam ni było, ale 30 studzienia dyrektar «Lidaahraprammaša» Viktar Kruhły znachodziŭsia ŭ Minsku, pra što «Narodnaj voli» paviedamili ŭ pryjomnaj kiraŭnika. Bolš detalovuju infarmacyju pra situacyju na pradpryjemstvie daŭ namiesnik staršyni Lidskaha rajvykankama Ivan KŁIMOVIČ, jaki kuryruje pramysłovaść rehijona.
«Kamitetu dziaržkantrolu ŭžo dadziena daručeńnie razabracca, chto zajmajecca vykidam dezinfarmacyi, — kaža Ivan Klimovič. — Sapraŭdy, uzbudžany dźvie kryminalnyja spravy i pravodziacca rasśledavanni. Adna sprava ŭzbudžana pa kamandzirovačnych raschodach, druhaja — pa tendery, pa zakupkach mietału dla vytvorčasci. Nijakich złoŭžyvańniaŭ, prynamsi, nijakaj apieratyŭnaj infarmacyi pra toje, što niechta za štości atrymaŭ chabar, niama. Byvaje tak: u kramie kupili alej daražejšy, a vam kažuć, što inšy alej — tańniejšy i lepšy. Dyk jaki alej kuplać? I ŭ hetym vypadku atrymałasia, što zakupili ŭsio narmalna, adnak nie vykanali niejkija farmalnasci — voś vam i kryminalnaja sprava. Nijakich złoŭžyvańniaŭ niama. U nas jość davier da hetaha dyrektara, jakoha my i pastavili».
Ivan Klimovič padkreslivaje, što padobnaja infarmacyja vielmi škodzić reputacyi rehijona. Za apošnija dva hady, jakija prajšli paśla ŭźjadnańnia rajona, siaredniemiesiačny tavaraabarot dasiahnuŭ 31 miljona dołaraŭ (dva hady tamu tavaraabarot składaŭ 20 miljonaŭ dołaraŭ). Rost z dalokim zamiežžam składaje 132 pracenty, z Rasijaj — 122 pracenty, z krainami SND — 124 pracenty. My aryjentujemsia na dalniaje zamiežža, budujem sumiesnyja pradpryjemstvy: «Biełteksoptyka», zavod kieramzitavaha hraviju (z Łatvijaj), inšyja. A padobnaha kštałtu vykidy infarmacyi padryvajuć reputacyju rehijona», — adznačyŭ Ivan Klimovič.
Sam Viktar Kruhły paviedamiŭ «Narodnaj voli», što budzie źviartacca ŭ prakuraturu z prośbaj znajsci tych, chto raspaŭsiudziŭ praz Interniet infarmacyju pra jaho aryšt. Padrabiaznasci ŭzbudžanych kryminalnych spraŭ, adnak, kamientavać nie staŭ.
Fota http://lidagro.by/
Kamientary