Biełaruś i Rasija 25 listapada padpišuć pahadnieńnie pa hazie i «Biełtranshazie»

25 listapada Biełaruś i Rasija padpišuć šerah pahadnieńniaŭ u hazavaj śfiery, paviedamiŭ 23 listapada žurnalistam pieršy namieśnik prem'jer-ministra Uładzimir Siamaška.

Pavodle jaho słoŭ, u pryvatnaści płanujecca padpisać biesterminovaje mižuradavaje pahadnieńnie ab farmiravańni cen na haz dla Biełarusi i taryfaŭ na tranzit, pahadnieńni ab kupli-prodažu 50% akcyj AAT «Biełtranshaz» i kantrakt na pastaŭki hazu ŭ Biełaruś na 2012–2014 hady.

Na prośbu BiełaPAN nazvać canu na rasijski haz dla Biełarusi Siamaška skazaŭ: «Vy ŭsio daviedajeciesia, kali dakumienty buduć padpisany». Pry hetym, kamientujučy infarmacyju ab źnižeńni ŭdvaja cany na haz u rasijskich ŚMI, jon zaznačyŭ:

«Kali rasijskija ŚMI pišuć pra 150 dołaraŭ, značyć jany viedajuć, pra što pišuć».

Što da koštu pakieta akcyj «Biełtranshaza», Siamaška nahadaŭ: u 2006 hodzie była praviedziena niezaležnaja acenka koštu pradpryjemstva i nazvany 5 młrd. dołaraŭ ZŠA. «Za 2,5 młrd. užo pradali častku», — nahadaŭ Siamaška. Jon taksama padkreśliŭ, što

kali raniej Rasija kazała, što košt zavyšany, to zaraz nie stavić pad sumnieńnie nazvanyja sumy.

Siamaška taksama padkreśliŭ, što ŭsie dakumienty, jakija buduć padpisany 25 listapada, vyhadnyja abodvum bakam. «Da rašeńnia išli doŭha, hod vialisia pieramovy. Pytańnie było vyrašana, kali Alaksiej Miler (kiraŭnik „Hazproma“. — BiełaPAN.) paśla našych šmatmiesiačnych pieramoŭ paviedamiŭ našu pazicyju Pucinu, jaki zatym abmierkavaŭ heta z našym prezidentam. Dva miesiacy pajšli na kančatkovaje ŭzhadnieńnie», — skazaŭ Siamaška. Pavodle jaho słoŭ, usie dakumienty ŭžo prajšli ŭnutrydziaržaŭnyja ŭzhadnieńni va ŭsich zacikaŭlenych ministerstvach i viedamstvach.

***

Nahadajem, pra toje, što ŭ 2012 hodzie cana rasijskaha hazu dla Biełarusi moža skłaści krychu bolš za 150 dołaraŭ za tysiaču kubamietraŭ, paviedamiła 22 listapada rasijskaja hazieta «Viedomosti». «U 2012 h. rasijski haz moža patańnieć dla susiedziaŭ amal udvaja, a z 2013 h. jaho cana budzie pryviazana da ŭnutryrasijskaj», — piša hazieta.

Pavodle źviestak vydańnia, košt syraviny budzie padličvacca pa formule, jakaja ŭličvaje canu ŭ adnym z rehijonaŭ Rasii. Usio heta płanujecca da padpisańnia na ŭzroŭni mižuradavych pahadnieńniaŭ i kantraktaŭ z «Hazpromam», zajavili «Viedomostiam» dva čynoŭniki va ŭradzie RF i «Hazpromie», znajomyja z chodam pieramoŭ.

Cana na 2012 hod — krychu bolš za 150 dołaraŭ za tysiaču kubamietraŭ. «Jašče paru tydniaŭ tamu» abmiarkoŭvaŭsia dyjapazon u 150–190 dołaraŭ, zaznačyŭ supracoŭnik hrupy «Hazprom». Prahnoz siaredniaj cany ŭ Rasii na hety hod — prykładna 99 dołaraŭ biez PDK, na 2012-y — 106–107. Jaki rehijon Rasii budzie ŭličvacca ŭ formule z 2013 hoda, krynicy «Viedomostiej» nie raskryvajuć, tolki ŭdakładniajuć, što heta nie Smalenskaja vobłaść, na jakuju chacieŭ aryjentavacca Minsk. Da nazvanaj cany buduć dadavacca raschody «Hazproma» na transpart, zachoŭvańnie i realizacyju, a ŭ nastupnyja hady — indeksacyja, naprykład, na ŭzrovień inflacyi, paviedamili krynicy. Pa sutnaści, heta budzie novaja cenavaja zona Rasii, zaznačyŭ adzin ź ich.

• 0
• 0
• 0
• 0
• 0
• 0
• 0
• 0