Zabytaja miełodyja dla handboła (fota)

Kamanda Juryja Šaŭcova narešcie damahłasia znakavaj pieramohi. U vyrašalnym matčy handbolnaja zbornaja Biełarusi zrynuła na parkiet minskaha Pałaca sportu Rumyniju — 28:23 (15:12).

Chłapčukom ja zaśpieŭ tyja słaŭnyja časy, kali biełarusy ŭ handbole byli napieradzie płaniety ŭsioj. Spartak Miranovič stvaryŭ sapraŭdnuju drym-cim, jakaja trojčy zavajavała Kubak jeŭrapiejskich čempijonaŭ i pakłała ŭ svaju skarbonku jašče mnostva trafiejaŭ.

Asnoŭnymi kankurentami minskaha SKA na mižnarodnaj arenie tady byli jakraz rumyny. Pamiać da hetaha času zachoŭvaje finał hałoŭnaha kłubnaha turniru siezona 1988/89: tady biełarusy nie pakinuli kamnia na kamni ad hroznaj Bucharesckaj «Ściaŭa» — 30:34, 37:23.

U dzievianostyja naš handboł pačaŭ pastupova dehradavać. I voś paśla dvuch dziesiacihodździaŭ zaniapadu los znoŭ źvioŭ biełarusaŭ z rumynami — hetym razam na ŭzroŭni zbornych u adboračnym turniry čempijanatu śvietu-2013.

Žerabia hetaje było niepryjemnaje. Rumyny, viadoma, taksama šmat u čym stracili były aŭtarytet, ale z mahčymych supiernikaŭ na dadzienaj stadyi biełarusam trapiŭsia samy niepryjemny. Paŭtara hoda tamu handbalisty z krainy Drakuły siensacyjna pieramahli ŭ adbory na ČS-2011 ambicyjnych rasijcaŭ. Tak što boj za adzinuju pucioŭku ŭ płej-of budučaha čempijanatu śvietu abiacaŭ być haračym.

Ale dla biełarusaŭ usio mahło skončycca daterminova i vielmi niepryjemna. Trecim u našu adboračnuju hrupu trapiŭ zapisny aŭtsajdar — Luksiemburh. Biez prablem spraviŭšysia z «karlikam» u Mahilovie — 37:19, zbornaja Biełarusi źviedała kałasalnyja składanaści na vyjeździe. U kancy matča padapiečnyja Juryja Šaŭcova «hareli» ź likam 30:32. Ale ŭsio ž zubami vyrvali pieramohu — 33:32. U advarotnym vypadku rumyny mahli b zabiaśpiečyć sabie pieršaje miesca ŭ hrupie, prosta vyjhraŭšy doma ŭ biełarusaŭ ź lubym likam.

Što jany i zrabili. Ale pakolki da vyrašalnych matčaŭ Biełaruś i Rumynija padyšli z adnolkavaj kolkaściu nabranych ačkoŭ, to lik užo mieŭ vielizarnaje značeńnie. Haściavy projhryš z roźnicaj u 3 miačy pakidaŭ našym niadrennyja šancy na ahulny pośpiech u supraćstajańni. Doma treba było vyjhrać ź nie mienšym adryvam.

Zrešty, bitvie z rumynami papiaredničała abstrukcyja, jakoj zbornuju padvierhli paśla druhoj hulni ź Luksiemburham i zaŭziatary, i śpiecyjalisty. Lehiendarny hulec minskaha SKA źviarnuŭsia da nacyjanalnaj kamandy z zaklikam: «Mnie baluča nazirać za tym, što adbyvajecca z kamandaj. Dla mianie i maich adnahodkaŭ-handbalistaŭ hulnia za radzimu (chaj jana i nazyvałasia tady inakš) była spačatku zapavietnaj maraj, a potym i najvialikšym honaram. Hałoŭnaha svajho praviła — zastavacca mužykami — handboł nie admianiaŭ i nie admienić nikoli. Nu dyk vykonvajcie ž hetaje praviła! Nie addavajcie nas…»

Kryk dušy Karšakieviča byŭ pačuty. 15 studzienia Alaksandr Uładzimiravič mieŭ usie padstavy być zadavolenym.

Paśla pieršych piaci chvilin hulni biełarusy viali ź likam 2:0. Ale nieŭzabavie sudździ pakinuli haspadaroŭ učatyroch suprać šaściarych rumynaŭ, a zatym uznaharodzili kamandu Juryja Šaŭcova jašče adnym vydaleńniem. Kolkasnaja pieravaha stała dla haściej vyratavalnym kruham, jaki dazvoliŭ zraŭniać lik.

U siaredzinie čatyry hały zapar dazvolili našym adarvacca ad supiernikaŭ — 9:5. Ale rumyny taksama pryjechali ŭ Minsk nie draniki jeści. Nieŭzabavie jany skaracili razryŭ u liku da minimumu.

Finał pieršaj pałovy zastaŭsia za haspadarami. Kali kamandy sychodzili na adpačynak, tabło pakazvali 15:12 na karyść zbornaj Biełarusi.

Pierapynak vyjhraŭ Juryj Šaŭcoŭ. Jaho vizavi Vasile Stynha byŭ łakaničny, adpraviŭšy svaich padapiečnych na placoŭku ŭžo ŭ siaredzinie antraktu. A voś hałoŭnakamandujučy biełaruskaj zbornaj byŭ našmat bolš krasamoŭny. Adpuščany na paŭzu čas užo vyjšaŭ, a našy handbalisty ŭsio jašče zastavalisia ŭ raspranalni.

I, jak vyśvietliłasia, nie darma. Start i siaredzina druhoha tajma byli całkam za biełarusami. Ich adryŭ ad rumynaŭ pačaŭ raści jak na draždžach. Naroščvańniu pieravahi nie pieraškodzili i vydaleńni ŭ haspadaroŭ, jakija — jak pad kapirku — znoŭ u niejki momant zastalisia ŭčatyroch suprać poŭnaha składu haściej.

Bliskuča adyhraŭ hety matč kipier biełarusaŭ Kazimir Katlinski, jaki paśla pierapynku zastavaŭsia suchim dzieviać z pałovaj chvilin. Dy i paśla vyratoŭvaŭ kamandu nie raz i nie dva. A napieradzie bušavaŭ kapitan zbornaj Siarhiej Rutenka, jaki ŭžo da 44-j chviliny zabiŭ 11 miačoŭ.

Skončycca hetaja historyja mahła, čym zaŭhodna, ale na padmohu pryjšoŭ druhi vartaŭnik bramy našaj zbornaj Vital Čarapieńka. Na placoŭku jon vychodziŭ tolki pad siamimietrovymi, zatoje jak! Vital paryravaŭ try z troch handbolnych pienalci — apošni na 56-j chvilinie.

Nu, a zusim spakojna biełaruskija zaŭziatary zmahli ŭzdychnuć tolki na apošnim abarocie siekundnaj strełki, kali Maksim Babičaŭ ustalavaŭ kančatkovy lik — 28:23. Pucioŭka ŭ płej-of adboru na čempijanat śvietu dastajecca našym.

— Usie siońnia zasłužyli kamplimient ad mianie, choć ja rablu ich vielmi redka. Hałoŭnaje, što vykanali zadaču, pra jakuju ja kazaŭ pierad matčam: zaŭziatary i hulcy źlilisia ŭ adzinaje cełaje i zmahli pieramahčy, — kanstatavaŭ paśla matču Juryj Šaŭcoŭ.

Budziem spadziavacca, što heta pačatak reniesansu biełaruskaha handboła. Praciah budzie letam. Matčy raunda płej-of, u jakich vyśvietlicca, chto pajedzie na čempijanat śvietu, adbuducca 9–10 i 16–17 červienia.

• 0
• 0
• 0
• 0
• 0
• 0
• 0
• 0