Sud nad Kavalenkam: bałahan i drama

17.22

U sudzie abvieščany pierapynak da zaŭtra, 22 lutaha. Pasiedžańnie pačniecca a 14.00.

17.20

Sudździa začytała kopii karty vykliku pieršaj i druhoj bryhadaŭ «chutkaj dapamohi» da źniasilenaha haładoŭkaj Siarhieja Kavalenki. U ich jość roznačytańni. Kali miedyki pieršaj bryhady (doktar Dubakin) nie pabačyli istotnych źmienaŭ stanu zdaroŭja i rekamiendavali tolki nazirańnie pa miescy znachodžańnia, dyk lekary druhoj (doktar Fadziejeŭ) ličać, što padsudnamu pry paŭtornym zvarocie treba budzie ekstranaja miedycynskaja dapamoha.

Pakolki vyniki abśledavańnia roźniacca, sud skiravaŭ zvarot u miedyčnuju častku SIZA, kab tam da 14.00 zaŭtrašniaha dnia vyznačyli, ci moža Kavalenka znachodzicca ŭ sudzie. Abo jamu treba špitalizacyja. Kavalenku pavieźli ŭ SIZA.

16:45

Sudździa čakaje miedycynskaha zaklučeńnia. Kavalenku nikudy nie pavieźli, a trymajuć u pamiaškańni suda.

16:25

Abiedźvie bryhady chutkaj dapamohi pakinuli sud. Kavalenku vyvieli. Jon paśpieŭ paviedamić, što doktar skazaŭ pra nieabchodnaść špitalizacyi.

15:49

Druhuju bryhadu miedykaŭ usio-taki dapuścili da Kavalenki.

15:40

Ahlad Kavalenki praciahvajecca. Rodnyja vyklikali jašče adnu mašynu chutkaj dapamohi. Jany nie vierać u dyjahnaz, jaki pastaviła papiaredniaja bryhada. Kanvoj nie puskaje druhuju bryhadu da Kavalenki.

Doktar ź pieršaj bryhady vyjšaŭ chvilin 10 nazad i padniaŭsia na druhi pavierch.

15:08

Sudździa adchiliła advod Kavalenki samoj sabie.

Baćki Kavalenki padali chadajnictva ab paŭtornym miedahladzie syna. Znoŭ abvieščany pierapynak.

Pryjechała taja ž bryhada, što i pieršy raz. U ich niama bedžaŭ. Na pytańnie rodnych, dzie jany, adkazali, što bedžy adarvalisia.

14:44

Kavalenka vykazaŭ advod sudździ Žuk. Padstava — pieraduziataść, na dumku Kavalenki. Advakaty padtrymali chadajnictva. Prakuror suprać: pavodle jaho słovaŭ, padstavaŭ dla hetaha niama. Sudździa vyjšła ŭ daradčy pakoj, kab pryniać rašeńnie.

14.31

Adnaviŭsia praces. Novy pierakładčyk — Michajłaŭ. Jon vykładaje ŭ Viciebskim dziaržaŭnym univiersitecie imia Mašerava. Adkazvaje na pytańni pa-biełarusku.

Sudździa znajomić z kartaj miedycynskaha ahladu Kavalenki ŭ sudzie. Ahladaŭ urač Dubakin. Dyjahnaz — elemientarnaje źniasileńnie 1 stupieni, hastryt. Rekamiendavany miedycynski nahlad. I nie bolš za heta. I ŭ ekstrannaj miedycynskaj dapamozie nie maje patreby. Sudździa dapytvaje Kavalenku.

12.39

Mama Siarhieja Kavalenki, vydalenaja z zały suda, skazała prysutnym u kalidory žurnalistam, što tut joj znachodzicca praściej: «U zale serca razryvajecca hladzieć na syna».

12.38

Viarnuli ŭ zału Kavalenku. Viarnułasia i sudździa. Jana prosić maci Siarhieja Kavalenki pakinuć zału.

Sudździa taksama vydaliła z zały hramadskaha dziejača Chrystafora Žalapava za zroblenyja im zaŭvahi.

Ludzi ź miescaŭ vyhukvajuć, aburajucca, patrabujuć vydalić z zały ahientaŭ u cyvilnym.

Sudździa ahučyła miedyčnaje zaklučeńnie: cisk narmalovy, kardyjahrama narmalovaja, padsudny moža ŭdzielničać u pracesie.

Abviaščajecca pierapynak da 14.30. Usie buduć abiedać. Usie, akramia samoha Kavalenki.

Kavalenka prakryčaŭ, što budzie dabivacca jašče adnaho miedahladu.

12.12

Doktar Dźmitryj Dubakin pastanaviŭ, što praces moža praciahvacca. Padstavaŭ dla špitalizacyi niama: padsudny ŭ prytomnaści, usie pakazčyki ŭ normie. Lekar ad kamientaroŭ pra stan zdaroŭja Kavalenki admoviŭsia, nie skazaŭ ničoha ni žurnalistam, ni rodnym Kavalenki.

11.52

Z zały ŭsich vyvieli. Zastalisia rodnyja. Miedyki tam praviaduć ahlad. Sudździa vyjšła. Maci kryčyć: «Jany jaho zabjuć! Nie adpušču, nie adpušču jaho ŭ SIZA». Svajaki płačuć.

Uvohule, sud momantami pieratvarajecca ŭ poŭny bałahan. Abodva baki stracili kantrol nad svaimi emocyjami, paviedamlaje reparcior «Našaj Nivy» z zały suda.

Praces farsavy, i sudździa niazdolnaja schavać hetuju farsavaść. Jana vydaliła try asoby z zały, u tym liku maci Kavalenki. To adchiliła advod pierakładčycy, to praz paru chvilin zadavoliła jaje samaadvod. Tym nie mienš, paradku nie dabaviłasia.

Heta niezvyčajnaje źmiašeńnie žanraŭ: drama Kavalenki, čałavieka, jaki trapiŭ u turmu za svaje pierakanańni, čałavieka, jaki prahaładaŭ 30 dzion. I bałahan «biełaruskaha» suda, dzie sudździa i prakuror nie mohuć pravieści praces nad biełaruskamoŭnym čałaviekam na biełaruskaj movie. Dzie ŭdzielniki suda razumiejuć palityčnuju podbiŭku pracesu i tamu sami nie ŭpeŭnienyja ŭ svaich dziejańniach. I tut ža sam Kavalenka — čałaviek na miažy zryvu, ź niestandartnym myśleńniem i pavodzinami. I jahonyja rodnyja, źniervavanyja ad pieražyvańniaŭ.

11.51

Kavalenka kaža, što da jaho pieršasnaje — ahlad daktarami. A paśla tolki chadajnictva pra videazdymki. U vyniku sudździa dazvalaje pravieści miedyčny ahlad. Kavalenku vyvodziać dla hetaha. Sudździa nie skazała, u jakim paradku pravodzić ahlad. Kanvoj sam pavinien vyrašać heta.

11.50

Kolkaść ludziej u zale dasiahnuła 60 čałaviek. Maci i žonka Kavalenki vyklikali chutkuju dapamohu. Mašyna pryjechała. Kanvoj nie puskaje daktaroŭ ahladzieć Siarhieja. Pravaabronca Levinaŭ hučna źviartaje ŭvahu, što parušajecca prava čałavieka na miedycynskuju dapamohu.

Tym časam sudździa zabaraniaje fota- i videazdymku ŭ zale. Maŭlaŭ, nichto nie chadajničaŭ pra taki dazvoł.

Siarhiej Kavalenka kaža, što maje chadajnictva da sudu, kab jaho ahledzieli daktary: «U mianie dystrafija, ja zhubiŭ 25 kiłahramaŭ».

11.45

Sudździa začytvaje prośbu pierakładčycy pra samadvod i pastanaŭlaje, što pierakładčyca vyzvalajecca ad dalejšaj prysutnaści na sudzie.

11.43

Na pracesie prysutničaje Janis Rupeiks, vice-konsuł Łatvii ŭ Viciebsku, paviedamlaje ŭ svaim vyčarpalnym anłajn-repartažy radyjo «Svaboda».

11.35

U dzień suda spyniŭsia dostup da samaha papularnaha niezaležnaha internet-resursu Viciebska: Narodnych navin Viciebska.

11.34

Kavalenku znoŭ vyvieli, pakul sud na naradzie. «Pi vadu, inakš pamreš da ranicy!» — kryčyć maci synu naŭzdahon.

11.32

Sapraŭdnaja kamiedyja ź pierakładam u sudzie. Pierakładčyca Šuchto znoŭ pierakładaje, ale źbivajecca, Siarhiej jaje papraŭlaje: «Nie padlažyć, a padlahaje, nie abasnavańnie, a abhruntavańnie. Advod!»

Pierakładčyca padaje chadajnictva pra samaadvod. Prakuror kaža, što treba zaprasić novaha pierakładčyka. Sudździa znoŭ vyjšła, kab pryniać rašeńnie.

11.31

Pierakładčyca Šuchto pryznaje, što, mahčyma nie maje patrebnych viedaŭ dla pierakładu. Bo nie prysutničała raniej na sudovych pracesach. Žančyna prysutničała na papiarednim śledstvie. Ale kaža, što tady amal nie davodziłasia pierakładać.

11.24

Paŭhadziny railisia, i advod pierakładčycy adchilili.

11.20

Karystajučysia tym, što Kavalenku pryviali ź pierapynku nazad, a sudździa jašče nie viarnułasia, Jury Bieleńki z zały zaklikaje Kavalenku spynić haładoŭku, raskazvaje pra reakcyju Jeŭropy na haładoŭku i praces. Siarhiej adkazvaje, što pryncypova nie budzie vychodzić z haładoŭki. Kaža, što haładaŭ 30 dzion. Paśla pačałosia prymusovaje karmleńnie.

U zale havorka idzie pra palityku. Ludzi hukajuć, što ŭ situacyju z palitviaźniami i movaj vinavaty asabista Łukašenka.

Maci Siarhieja hałosić: «Jak mnie ciažka i baluča! Ja ciapier adčuła, jak ciažka inšym palitviaźniam i ich rodnym. Ja ciapier ich razumieju».

10.51

Sud vyjšaŭ raicca dla pryniaćcia rašeńnia pa advodzie Kavalenki pierakładčycy.

10.49

Na pracesie prysutničajuć i pravaabaroncy-viasnoŭcy Valancin Stefanovič i Uładź Łabkovič.

10.48

Adzin z mužčynaŭ zrabiŭ zaŭvahu da jakaści pierakładu. Jaho vydalili z zały. Kavalenka zajaviŭ advod pierakładčyku — prosić jaje zamianić. Taksama Kavalenka prosić nie vydalać ludziej bolš.

Imia vydalenaha — Leanid Aŭtuchoŭ. Nasamreč, žančyna pierakładaje na trasianku bolš, čym na biełaruskuju movu.

10.46

Sudździa papiaredziła Kavalenku ab niedapuščalnaści jaho replik, jakija nie tyčacca spravy. Siarhiej zajaviŭ, što jaho sprava sfabrykavana. Jon maje chadajnictva. Ale jano budzie padadziena paźniej.

10.40

U jakaści śviedkaŭ prachodziać brat Vital Kavalenka i žonka Alena. Prakuror — Łutaŭ.

Pačaŭsia dopyt Siarhieja. Jon adkazvaje pa-biełarusku.

10.40

Kavalenka admaŭlajecca siadać. «Nasiadzieŭsia». Staić. Sudździa tłumačyć padsudnamu jahonyja pravy.

Śviedki na praces vyklikany na 22 i 23 lutaha. U zale prysutničaje pierakładčyk — nastaŭnica biełaruskaj movy Alena Šuchto. U Kavalenki dva advakaty — Alaksandr Halijeŭ ź Minska i viciebčuk Piatro Kavalenka.

10.39

Pierad pačatkam suda Kavalenka raskazaŭ prysutnym žurnalistam, što jaho 20 dzion prymusova karmili. Pahražali, što adpraviać na «dziaviatku», h.zn. u Viciebskuju psichušku. Kaža, što paśla hetaha pieryjadu prymusovaha karmleńnia pačaŭ jeści sam, i tady jamu nakładali trajnuju procyju, kab jon adnaviŭ vahu. Narakaje, što paśla haładoŭki ŭ jaho žyvot puch. Pierad sudom jon try dni ŭžo trymaje suchuju haładoŭku. Kaža, što ŭčora da jaho pryjazdžaŭ psichijatr. Kavalenka havoryć irvana, hołas u jaho sipłavaty, ale badziory. Kaža, što trymaje suchuju haładoŭku dla taho, kab u vypadku, kali jaho zabiaruć daktary, ubačyli sapraŭdnuju situacyju ź jaho zdaroŭjem. Kaža, što ŭ SIZA jaho abkołvali, kab daktary nie ŭbačyli jaho sapraŭdny stan.

Kab pakazać, jak jon schudnieŭ, Kavalenka prosta ŭ kletcy źniaŭ kašulu.

Ład dumak u Kavalenki śpiecyfičny, jon taki byŭ i da suda. Turma tolki abvastryła hetuju niestandartnaść myśleńnia.

10.30

U zału suda zajšło 25 čałaviek. Bolš za dziesiać zastałosia za dźviaryma, nie źmiaścilisia ŭ zału. Za dźviaryma staić i žonka Siarhieja Kavalenki. Jana śviedka na pracesie i musić čakać za dźviaryma, pakul jaje vykličuć. Zazirnuŭšy ŭ zału, jana skazała, što Siarhiej vyhladaje vielmi drenna. U zale suda praciahvaje hałasić maci Kavalenki.

Siarod prysutnych zaŭvažnyja asoby ŭ cyvilnym — siadziać, paśmichajucca.

10.27

Siarhiej Kavalenka zusim schudnieły. Kali zajšli ludzi ŭ zału, jon vyhuknuŭ: «Žyvie Biełaruś!» I zaśpiavaŭ «My vyjdziem ščylnymi radami».

Voś, chto nie čuŭ, zapis nacyjanalnaha himna ŭ zapisie choru «Unija»:

10.25

Uviali Kavalenku. La ŭvachodu ŭ zału suda hałosić jaho maci: «Da čaho daviali majho syna!»

10.18

Jak paviedamiła Nasta Pałažanka, siońnia ranicaj na ŭjeździe ŭ Viciebsk spynili aŭto z maładafrontaŭcami, jakija kiravalisia na praces. Spyniała DAI, paśla padjechaŭ śpiecnaz. U mašynie byli žurnalist Pavał Sitnik i maładafrontaŭcy Uładzimir Jaromienak, Michaił Muski, Raman Vasiljeŭ, Źmicier Kramianiecki. Dzie jany ciapier znachodziacca — nieviadoma.

10.17

Nahadajem, što staršynia Jeŭraparłamienta Marcin Šulc zaklikaŭ ułady Biełarusi vyzvalić Siarhieja Kavalenku. «Kali jon pamre, ruki biełaruskich uładaŭ buduć u kryvi», — havorycca ŭ zajavie.

10.13

U zału suda pakul nie puskajuć. Pracesu čakajuć piatnaccać čałaviek. Siarod prysutnych — byłaja palitźniavolenaja Nasta Pałažanka i pravaabaronca Pavał Levinaŭ, kiraŭniki Kansiervatyŭna-chryścijanskaj partyi BNF Jury Bieleńki i Valer Bujvał. Miery biaśpieki zvyčajnyja, nie ŭzmocnienyja, jak było na palityčnych pracesach u Minsku ŭ 2011-m.

10.00

Sud nad Siarhiejem Kavalenkam maje raspačacca ŭ 10.30.

Našy reparciory vypravilisia ŭ Viciebsk, znachodziacca kala suda. Čakajcie našy foty i videa.

Siarhiej Kavalenka znachodzicca ŭ SIZA ad 22 śniežnia.

19 śniežnia na znak pratestu suprać źniavoleńnia i kryminalnaha abvinavačańnia Kavalenka raspačaŭ haładoŭku.

Kavalenku vinavaciać, što jon parušyŭ režym adbyvańnia «chatniaj chimii», prysudžanaj jamu ŭ 2010 h. za vyviešany na haradckoj navahodniaj jalinie bieł-čyrvona-bieły ściah.

Na čas śledctva Siarhieja Kavalenku źmiaścili pad vartu — spačatku ŭ izalatar časovaha ŭtrymańnia, potym u viciebski SIZA-2.

Žonka źniavolenaha, Alena Kavalenka, jakaja bačyła muža 17 lutaha, ličyć, što Siarhiej u krytyčnym stanie i što jamu nieadkładna patrabujecca dapamoha miedykaŭ. Adnak

namieśnik načalnika viciebskaha SIZA padpałkoŭnik Dubko zajaviŭ učora pravaabaroncu Paŭłu Levinavu, što stan zdaroŭja Kavalenki dazvalaje ŭdzielničać u sudovym pracesie.

Ranicaj u Viciebsku junaki ŭ znak salidarnaści z Kaavalenkam vyviesili bieł-čyrvona-bieły ściah. Heta praciah abvieščanaj na minułym tydni akcyi salidarnaści. Pałotnišča źjaviłasia ŭ samym centry horada — u rajonie płoščy Pieramohi. Jon byŭ vyviešany kala kramy «Viesta» ŭ samym pačatku vulicy Lenina. Jaho bačyli dziasiatki ludziej.

Heta nie pieršaja akcyja salidarnaści ŭ Viciebsku. Ščymlivaja historyja adbyłasia z zatrymańniem jahonaj žonki i niaviestki. Žančyn zatrymali za raspaŭsiud ulotak ź infarmacyjaj pra palitviaźnia Siarhieja, jaki znachodzicca pad aryštam u SIZA: «Heta ŭlotki, na jakich vyjava jołki z bieł-čyrvona-biełym ściaham na vieršalinie, jaki 7 studzienia 2010 hodu paviesiŭ Siarhiej. Tam jość i jahony partret, i źviestki pra toje, što jon znachodzicca ŭ źniavoleńni, što z 19 śniežnia trymaje haładoŭku pratestu suprać kryminalnaha abvinavačańnia i što jaho prymusova kormiać praz zond. Napisana tam taksama, što siamju Siarhieja, dzie vychoŭvajucca dvoje małych dziaciej, pakinuli biaz srodkaŭ da isnavańnia», — raskazvaŭ jahony rodny brat.

Ulotki ŭ padtrymku Siarhieja Kavalenki ŭ Viciebsku źjaŭlajucca nie ŭpieršyniu.

Bieł-čyrvona-biełyja ściahi taksama źjaŭlajucca ŭ Viciebsku ŭvieś čas, kolki Kavalenka siadzić. Da adnaho ź ich była pryčeplena cydułka: «Hani bykoŭ! Viarniecca vola! Słava hierojam! Słava Biełarusi! Jaś — syn Mirona».

U Kavalenki dvoje dziaciej, a žonka siadzić udoma z paŭhadovaj dačkoj.

• 0
• 0
• 0
• 0
• 0
• 0
• 0
• 0