Kim: Listy varta pisać zaŭsiody

«NN»: Ty byŭ u liku tych, chto paśla chvali represij u kancy 2010 źjechaŭ za miažu. Padstavy sapraŭdy byli važkimi?

Andrej Kim: Adnaznačna. Ja niekalki razoŭ śviadoma admaŭlaŭsia ad pracy i vučoby za miažoj. Dla mianie znachodžańnie ŭ Biełarusi — kaštoŭnaść. Tady, u śniežni 2010, kali mianie pasadzili na sutki za Płošču, milicejskaje načalstva skazała, što na mianie zaviaduć kryminalnuju spravu. A vypuścili z sutak, napeŭna, praź biurakratyčnuju pamyłku. Bo ŭžo na nastupny dzień u maich baćkoŭ praviali vobšuk — mianie šukali.

«NN»: Ale dziasiatki ludziej zastajucca za miažoj. Što dla Biełarusi možna rabić tam?

AK: Kali niechta dumaje, što ich misija — być pasłami Biełarusi za miažoj, heta ich sprava. Tut nielha ahułam usich aceńvać. Ja viedaju ludziej, jaki źjechali absalutna biespadstaŭna. A Natalla Radzina ci Aleś Michalevič pakinuli krainu pad ciažaram peŭnych abstavinaŭ.

«NN»: Jak były palitviazień skažy, što dla asudžanych samaje važnaje ŭ jakaści padtrymki: listy, vuličnyja akcyi salidarnaści?

AK: Listy varta pisać zaŭsiody [Zaraz za kratami znachodzicca 13 palitviaźniaŭ]. Kožny list sa słovami padtrymki daje siły na niekalki dzion. Vuličnyja akcyi salidarnaści, miarkuju, ciapier nie patrebnyja. U nas niama mahčymaściaŭ, kab rabić ich. A pa sabie viedaju, što było b lepš, kab tyja 50 čałaviek napisali listy, čym kab jany vyjšli na vulicu i ich tam pabili. A tak vychodzić, što tyja, chto ładziŭ akcyi, mnie nie pisali. Dla palitviaźniaŭ važna ŭśviedamlać, što imi nie handlujecca Zachad z Łukašenkam, a što jany jość takim kamieniem na šyi ŭ režymu.

«NN»: Siońnia cisk na režym Łukašenki moža pryvieści da vyzvaleńnia ŭsich palitviaźniaŭ, ci heta spracoŭvaje zusim naadvarot?

AK: Adzinaja meta Łu­kašenki — zachavańnie ŭłady. Jon uśviedamlaje, što hałoŭnaja niebiaśpieka sychodzić ad Uładzimira Pucina. Jeŭrapiejcy pavinny pierakanać Łuka­šenku, što kali toj nie pačnie libieralizacyju, to jeŭrapiejskaje pole dla palityčnaha manieŭra pamiž Rasijaj i ES źniknie. I ŭ takim vypadku jon zastaniecca z Rasijaj adzin na adzin. A heta toje, čaho jon sam baicca bolš za ŭsio.

***

Andrej Kim naradziŭsia ŭ 1986 u Minsku. U 2008 h. aryštavany za ŭdzieł u akcyi pratestu pradprymalnikaŭ u Minsku —«sprava čatyrnaccaci». Asudžany na 1,5 hoda za nibyta źbićcio milicyjanta. Vyzvaleny praz vosiem miesiacaŭ pa zahadzie Łukašenki. Paśla razhonu Płoščy-­2010 paŭhoda pravioŭ za miažoj.

Adrasy palitviaźniaŭ, zaraz ich 13

Ihar Alinievič, 211440, Viciebskaja vobł., h. Navapołack, vuł. Techničnaja, 8, PK № 10;

Mikałaj Aŭtuchovič, 230023, h. Hrodna, vuł. Kirava, 1, turma № 1.

Aleś Bialacki, Vypraŭlenčaja kałonija № 2, 213 800, Mahiloŭskaja vobł., h. Babrujsk, vuł. Sikorskaha, 1.

Jaŭhien Vaśkovič, 212011, h. Mahiloŭ, vuł. Krupskaj, 99 a, turma № 4;

Źmicier Daškievič, 211791, Viciebskaja vobł., h. Hłybokaje, vuł. Savieckaja, 205, PK № 13;

Mikałaj Dziadok, 212013, h. Mahiloŭ, Słaŭharadskaja šaša, 183. PK № 15;

Siarhiej Kavalenka, Respublikanski centr psichičnaha zdaroŭja ŭ Navinkach;

Eduard Łobaŭ, 225295, Bresckaja vobł., h. Ivacevičy, «Voŭčyja nory», a/s 20, PK № 22;

Arciom Prakapienka, 213004, Mahiloŭskaja vobł., h. Škłoŭ, PK № 17;

Pavieł Sieviaryniec, 225143, Bresckaja vobł., Pružanski r-n, v. Kuplin, PUAT-7;

Mikoła Statkievič, h. Mahiloŭ, vuł. Krupskaj, 99a, turma № 4;

Pavał Syramłotaŭ, 213030, h. Mahiloŭ, Słaŭharadckaja šaša, 3 km, PK № 19;

Alaksandr Franckievič, 225295, Bresckaja vobł., h. Ivacevičy, «Voŭčyja nory», a/s 20, PK № 22

• 0
• 0
• 0
• 0
• 0
• 0
• 0
• 0