Łukašenka prapanoŭvaje ŭmacoŭvać vajenny składnik ADKB

Pra nieabchodnaść umacoŭvać vajenny składnik ADKB z akcentam na raźvićcio vysokamabilnych sučasnych śpiecpadraździaleńniaŭ — kalektyŭnych sił chutkaha reahavańnia, apieratyŭnaha razhortvańnia, miratvorčaha kantynhientu

Biełaruś, pavodle słoŭ Łukašenki, taksama prapanuje pavysić biaśpieku krain ADKB ad teraryzmu, narkatrafiku, nielehalnaj mihracyi i vyklikaŭ u infarmacyjnaj śfiery. I ŭ hetym płanie mahčymaści dla pavyšeńnia efiektyŭnaści Arhanizacyi Dahavora ab kalektyŭnaj biaśpiecy daloka nie vyčarpany, adznačyŭ jon.

U najbližejšaj i siarednieterminovaj pierśpiektyvie, ličyć Łukašenka, dla dalejšaha ŭdaskanaleńnia i raźvićcia ADKB nieabchodna zrabić šerah zachadaŭ.

Kiraŭnik dziaržavy źviarnuŭ uvahu na toje, što Biełaruś zaŭsiody vystupała za ŭmacavańnie nadnacyjanalnych instytutaŭ, zaklikanych padtrymlivać biaśpieku i stabilnaść dla ŭsich krain u roŭnaj stupieni. «My zacikaŭleny ŭ kanstruktyŭnym dyjałohu ź mižnarodnymi arhanizacyjami, takimi jak AAN, ABSIE, NATO, i ŭ mirnym urehulavańni kanfliktnych situacyj», — zajaviŭ jon.

«Ale my suprać pustoj rytoryki, — dadaŭ Łukašenka. — Naša meta — heta ŭzajemadziejańnie, skiravanaje na dasiahnieńnie peŭnych i adčuvalnych vynikaŭ».

Biełaruski bok, pavodle jaho słoŭ, vystupaje za naładžvańnie ciesnaha ŭzajemavyhadnaha supracoŭnictva ź inšymi dziaržavami i mižnarodnymi ab`iadnańniami. «Pry hetym, na naš pohlad, nie varta abmiažoŭvacca tolki ŭzajemadziejańniem u śfiery biaśpieki. Kaardynacyja taksama pavinna ažyćciaŭlacca i z ekanamičnymi, i z palityčnymi strukturami. Asabliva dziejnymi na prastory byłoha SSSR», — zajaviŭ kiraŭnik Biełarusi.

Jašče adnoj zadačaj, jakuju, pavodle mierkavańnia Łukašenki, varta realizavać ADKB, ź`iaŭlajecca nieabchodnaść harmaničnaha ŭbudavańnia ŭ sučasnuju architekturu hłabalnaj i rehijanalnaj biaśpieki. «Dla paśpiachovaha vykanańnia pastaŭlenych met ADKB nie varta zamykacca ŭ samoj sabie. U XXI stahodździ nivodnaja rehijanalnaja arhanizacyja nie moža ŭ adzinočku supraćstajać usim vyklikam sučasnaści. Dyjałoh, roŭnyja partniorskija adnosiny, sumiesnyja prajekty i prahramy ź inšymi arhanizacyjami i krainami — heta załoh pośpiechu ŭ supraćstajańni transnacyjanalnym pahrozam», — ličyć Łukašenka.

Jon zapeŭniŭ, što Biełaruś budzie, jak i raniej, usialak spryjać jakasnamu raźvićciu ADKB, jaje ŭdaskanaleńniu, univiersalizacyi i harmaničnaj adaptacyi ŭ sučasnym śviecie.

Łukašenka adznačyŭ, što za nievialiki histaryčny pieryjad ADKB vyjšła daloka za miežy kłasičnaha abaronnaha błoka i na sučasnym etapie zdolnaja reahavać praktyčna na lubyja pahrozy. «I heta nie tolki našy acenki», — padkreśliŭ jon. «Vystupleńnie z ahulnych dla ŭsich nas pazicyj pa aktualnych pytańniach mižnarodnaha paradku dnia jasna demanstruje našym partnioram, što siońnia my adzinyja», — zajaviŭ kiraŭnik dziaržavy.

Pavodle vynikaŭ samitu lidary krain ADKB pryniali dekłaracyju ab ahulnym padychodzie da klučavych prablem mižnarodnaj biaśpieki. Jany vykazali zaniepakojenaść «tendencyjaj da siłavoha ŭmiašańnia ŭ kryzisnuju situacyju ŭ abchod normaŭ i pryncypaŭ mižnarodnaha prava» i padkreślili «važnaść vykarystańnia mirnych srodkaŭ va ŭrehulavańni kanfliktaŭ pry pavažańni pryncypu nieŭmiašańnia va ŭnutranyja spravy dziaržaŭ». U dekłaracyi adznačajecca hatoŭnaść supracoŭnictva z usimi mižnarodnymi strukturami, u tym liku AAN, NATO, ABSIE i ŠAS.

Nastupny samit ADKB adbudziecca ŭ kancy 2012 hoda ŭ Maskvie.

Ciapierašniaja pazačarhovaja siesija Savieta kalektyŭnaj biaśpieki ADKB była prymierkavana da 20-hodździa padpisańnia Dahavora ab kalektyŭnaj biaśpiecy i 10-hodździa stvareńnia ADKB.

• 0
• 0
• 0
• 0
• 0
• 0
• 0
• 0