«Mižnarodnaja amnistyja» nazvała Biełaruś «apošnim katam» u Jeŭropie

U apublikavanym siońnia štohadovym dakładzie ab situacyi z pravami čałavieka ŭ śviecie ŭ 2011 hodzie pravaabarončaja arhanizacyja «Mižnarodnaja amnistyja» (Amnesty International) zaznačaje, što ŭ Biełarusi naziralisia paharšeńnie ekanamičnaha stanovišča, rost napružanaści ŭ hramadstvie i, jak vynik, jašče bolšaje abmiežavańnie ŭładami svabody.

«Abmiežavańnie svabody słova, schodaŭ i asacyjacyj pavialičvałasia na praciahu hoda. Urad praciahvaŭ prymianieńnie śmiarotnaj kary. Viaźni sumleńnia zastavalisia ŭ źniavoleńni i źviedvali katavańni i žorstkaje abychodžańnie. Prava na spraviadlivy sud taksama było abmiežavana», — havorycca ŭ dakumiencie.

Zaznačajecca, u pryvatnaści, što ŭ 2011 hodzie ŭ Biełarusi byli pakarany śmierciu dva čałavieki — Aleh Hryškaŭcoŭ i Andrej Burdyka, pryhavoranyja da śmiarotnaj kary za zabojstvy. Prysudy byli pryviedzieny ŭ vykanańnie, niahledziačy na toje što Kamitet AAN pa pravach čałavieka nakiravaŭ Biełarusi aficyjnuju prośbu adkłaści śmiarotnuju karu, pakul u kamitecie idzie razhlad skarhaŭ, kanstatujuć pravaabaroncy. U suviazi z prymianieńniem vyšejšaj miery pakarańnia arhanizacyja nazyvaje Biełaruś «apošnim katam» u rehijonie.

U dakładzie zaznačajecca, što ŭ Biełarusi adsutničaje niezaležny manitorynh miescaŭ źniavoleńnia, usie skarhi na žorstkaje abychodžańnie abo prymianieńnie katavańniaŭ z boku supracoŭnikaŭ pravaachoŭnych orhanaŭ adchilajucca prakurorami.

Śviedčańni pra katavańni prahučali ad eks-kandydata ŭ prezidenty Alesia Michaleviča, jaki śćviardžaŭ, što katavańni i žorstkaje abychodžańnie źviedvaŭ jak jon sam, hetak i inšyja ludzi, zatrymanyja paśla akcyi pratestu 19 śniežnia 2010 hoda, kanstatujuć aŭtary dakumienta.

«Mižnarodnaja amnistyja» zaznačaje, što na kaniec 2011 hoda ŭ Biełarusi było šeść palitviaźniaŭ:

U dakładzie adznačana, što ŭ žniŭni 2011 hoda byŭ aryštavany pravaabaronca Aleś Bialacki, jaki taksama pryznany viaźniem sumleńnia.

Na praciahu ŭsiaho 2011 hoda pieraśled źviedvali jak zarehistravanyja, hetak i niezarehistravanyja pravaabarončyja arhanizacyi, zaznačaje «Mižnarodnaja amnistyja». Aprača taho, byli pryniaty papraŭki ŭ zakanadaŭstva ab hramadskich abjadnańniach, što istotna pahoršyli ŭmovy ich dziejnaści, i novy zakon «Ab masavych mierapryjemstvach», jaki zrabiŭ jašče bolš žorstkim paradak ich praviadzieńnia.

Havoračy pra situacyju sa svabodaj słova, «Mižnarodnaja amnistyja» nahadvaje ab pryhavory, vyniesienym sudom žurnalistu i błohieru Andreju Pačobutu za «abrazu prezidenta», — try hady pazbaŭleńnia voli ŭmoŭna.

U dakładzie pravaabarončaj arhanizacyi taksama zaznačana, što šerah advakataŭ, jakija abaraniali abvinavačanych pa spravie ab biesparadkach 19 śniežnia 2010 hoda ŭ Minsku, byli pazbaŭleny licenzii.

• 0
• 0
• 0
• 0
• 0
• 0
• 0
• 0