Pad Navahrudkam raźbiŭsia vajskovy samalot. Piłot zahinuŭ

Hladzi taksama: Historyja avijakatastrof biełaruskaj vajskovaj avijacyi

Siońnia pry vykanańni płanavych palotaŭ u rajonie avijacyjnaha palihona ŭ Navahrudskim rajonie adbyłosia krušeńnie samalota Su-25116-j šturmavoj avijacyjnaj bazy. «Padčas palotu adpracoŭvałasia technika piłatavańnia i pavietranaj navihacyi na małych i hranična małych vyšyniach», — paviedamili ŭ Minabarony.

Paśla vykanańnia zadańnia kala 15.35 na vyšyni 200 m samalot pačaŭ hublać kiravańnie.

Kiraŭnik palotu daŭ lotčyku kamandu katapultavacca. Lotčyk zdoleŭ advieści mašynu ad vioski Naviny Navahrudskaha rajona. Za dva kiłamietry ad hetaj vioski samalot upaŭ.

Dla vyśviatleńnia pryčyn zdareńnia stvoranaja kamisija Ministerstva abarony. Rasśledavańnie hibieli samalota daručana hałoŭnamu śledčamu ŭpraŭleńniu Śledčaha kamiteta. Raspačata sprava pa častcy 1 art. 465 KK (parušeńnie praviłaŭ palotaŭ abo padrychtoŭki da ich).

Ekśpiert: Avijakatastrofy pačaścilisia z-za stareńnia lotnaha parka

Na prośbu radyjo «Svaboda» katastrofu pad Navahrudkam prakamientavaŭ vajskovy ahladalnik haziety «Biełarusy i rynak» Alaksandr Alesin.

Jon adznačyŭ, što kaliści ŭ Biełarusi katastrofy vajskovych samalotaŭ byli nadzvyčajnaj redkaściu, jon pryhadaŭ tolki hibiel pieršaha Hieroja Biełarusi Uładzimira Karvata ŭ 1996 hodzie. Adnak apošnim časam hetyja katastrofy stali čaściejšymi. Ekśpiert nie bačyć pryčyny hetaha ŭ małoj kolkaści lotnych praktykavańniaŭ piłotaŭ, Biełaruś zakupiła va Ukrainie naležnuju kolkaść vučebnych samalotaŭ, jość avijatrenažory, tak što sprava nie ŭ kvalifikacyi lotčykaŭ, a ŭ stareńni lotnaha parku.

Samaloty ramantujuć, navat madernizujuć, ale kardynalnaha adnaŭleńnia avijaparku VPS nie adbyvajecca — padkreśliŭ Alaksandr Alesin.

Pryčyna vielmi prostaja — niedachop hrošaj. Bajavyja samaloty — adna z samych darahich vajskovych mašyn, i ŭ vajskovym biudžecie na zakupku ich hrošaj niama. Niahledziačy na ščylnyja stasunki z Rasiejaj, pryčym asabliva ŭ vajskovaj śfiery, Rasieja ŭsio ž nie źbirajecca prosta pieradavać novyja bajavyja samaloty svajmu sajuźniku.

U vyniku padvyšajecca imaviernaść avaryj i niepaładak, i kolkaść adpaviednych vypadkaŭ. Alaksandr Alesin pryhadaŭ hibiel dvuch biełaruskich lotčykaŭ-pilotaŭSu-27 u žniŭni 2009 hodu na avijašoŭ u polskim Radamie.

Ekśpiert prahnazuje, što z pryčyny stareńnia avijaparku častata padobnych katastrof, na žal, budzie pavialičvacca.

Su-25 — saviecki braniavany dahukavy šturmavik, pryznačany dla niepasrednaj padtrymki suchaputnych vojskaŭ nad polem boju ŭ luby čas sutak pry pramoj bačnaści celi, a taksama dla źniščeńnia abjektaŭ z zadadzienymi kaardynatami kruhłasutačna ŭ lubych mieteaŭmovach. U rasijskich vojskach maje nieaficyjnuju nazvu «Hrak», pa viersii NATA — «Žabinaja łapka» (Frogfoot).

TTCH Su-25

Razmach kryła-14,4 m

Daŭžynia samalota — 15,3 m

Vyšynia samalota — 5,2 m

Masa — 16,5–19,5 t

Stola vyšyni — 10 km

Maksimalnaja chutkaść — 950 km/h

Ekipaž — 1 čałaviek, u pary — 2

Dalnaść palota — 1250 km.

• 0
• 0
• 0
• 0
• 0
• 0
• 0
• 0