Top-7 biaspłatnych biełaruskich prahram dla iPhone i iPad

Kali «Naša Niva» składała rejtynh biełaruskich prahram dla smartfonaŭ na bazie apieracyjnaj sistemy Android (tut i tut ), ahułam nabrałasia bolš za 10 raznastajnych karysnych spasyłak. Situacyja z kankurujučaj apieracyjnaj sistemaj iOS vyhladaje nie tak pryvabna. Uładalniki ajfonaŭ i ajpadaŭ znajści stolki raznastajnych prahram naŭrad ci zmohuć. Ale i dla ich možna znajści niekalki cikavych spasyłak.

Takim čynam,

top-7 biaspłatnych prahram, jakija zrobiać žyćcio biełarusa, jaki maje smartfon ad Apple bolš zručnym.

Zrešty, ich možna vykarystoŭvać i na ajpadach.

1. «U nieskładovaje»

itunes.apple.com/us/app/u-neskladovae/id490196137

Na žal, ni ajfon, ni ajpad nie majuć biełaruskamoŭnaj raskładki. Litaru «i» možna znajści va ŭkrainskim ałfavicie, ale što rabić z «ŭ»? Hetaja prostaja biaspłatnaja prahrama źmiaščaje «u nieskładovaje» ŭ bufier abmiena. Ciapier, drukujučy post u sacyjalnych sietkach ci tekstavych redaktarach, možna pstryknuć na knopku «ŭstavić» i dadać litaru ŭ skaz.

2. Prahrama pieradač

http://itunes.apple.com/by/app/tv-guide-by/id479308760

Nastupnyja dźvie prahramy stvaryŭ raspracoŭščyk Uładzimir Niachaj. Pieršaja ź ich pakazvaje prahramu pieradač dziasiatkaŭ telekanałaŭ, uklučna z kabielnymi. Jana skačvajecca adnojčy ŭ tydzień i bolš nie patrabuje dostupa ŭ internet. Siarod dadatkovych funkcyj — mahčymaść nahadvańnia pra patrebnuju pieradaču.

3. Raskład ruchu

http://itunes.apple.com/by/app/transport-timetable-in-minsk/id448211231

U adroźnieńnie ad papularnaj prahramy TransPot na Androidach, ajfonaŭskaja viersija patrabuje złučeńnia ź internetam, kab spraŭdzić infarmacyju na sajcie «Minsktransa». Praŭda, niekalki «lubimych» prypynkaŭ možna zanieści ŭ raździeł «vybranaje». Tady prybyćcio transpartu na ich možna budzie ŭbačyć i biez padklučanaha internetu.

4. Kursy valut

http://itunes.apple.com/by/app/kursy-valut-v-minske/id495516322

Minimalistyčnaja prahrama z kursami abmienu dalara, jeŭra i rasijskaha rubla ŭ staličnych abmieńnikach. Pry adsutnaści internetu pakazvajucca apošnija zahružanyja ličby.

5. Telebačańnie

http://itunes.apple.com/by/app/3gtv-vy/id525245242

Prahrama 3G TV dazvalaje prahladać adzin z 12 kanałaŭ. Siarod ich rasijskaja i anhlijskaja viersii Euronews, «Viesti-24», «RIA Novosti» i navat cud ajčynnaj prapahandy «Biełaruś-TB». Raspracoŭščyki zajaŭlajuć, što prahrama pracuje tolki na terytoryi Biełarusi. Darečy, kab pašyryć śpis kanałaŭ, možna dadatkova ŭstanavić SPB TV (http://itunes.apple.com/by/app/spb-tv/id480952101)

6. Jandeks. Korki

http://itunes.apple.com/by/app/yandex.maps/id313877526

Papularnaja rasijskaja prahrama, jakaja dapamahaje aryjentavacca na miascovaści i adsočvać korki na darohach, pracuje i na androidach, i na ajfonach z ajpadami. U joj varta skarystacca mahčymaściu zahruzki mapy nasielenych punktaŭ. Pakul što ź biełaruskich haradoŭ pradstaŭleny tolki Minsk (jaho mapa važyć kala 80 miehabajtaŭ). Spampavaŭšy jaje zahadzia, možna nie kłapacicca, što prahrama sažre šmat trafiku. Ciapier praź internet pieradajecca tolki infarmacyja ab korkach.

7. Pošuk lekaŭ + baza aptek

http://itunes.apple.com/by/app/poisk-lekarstv-v-minske/id514099574

Košt miedycynskich preparataraŭ u roznych aptekach moža adroźnivacca ŭ 2—3 razy. Kab nie pierapłačvać lišnija hrošy, dy i prosta pahladzieć, dzie patrebnyja leki jość u najaŭnaści, možna ŭstanavić hetuju prahramu. Jana šukaje preparaty na sajcie 169.med.by. Atrymanyja dadzienyja buduć dastupnyja i biez dostupu ŭ internet. Aproč taho, u prahramie ŭtrymlivajecca infarmacyja pra ŭsie apteki Minska.

• 0
• 0
• 0
• 0
• 0
• 0
• 0
• 0