Vakoł hetaj darohi žyvie bolš za ŭsio minčukoŭ.
Miesiac tamu «Naša Niva» napisała pra hałoŭnyja budoŭli na «prezidenckaj trasie», minskim praśpiekcie Pieramožcaŭ. Ciapier padychodzić čarha nastupnaj mahistrali — toj, jakaja viadzie z centra horada ŭ bok Hrodna i Vilni.
Kolišni Rakaŭski trakt — hałoŭnaja daroha paŭmiljonnaha Frunzienskaha rajona stalicy. U im žyvuć bolš biełarusaŭ, čym u lubym z abłasnych centraŭ krainy!Heta robić rajon vielmi pierśpiektyŭnym dla arhanizacyj handlu i servisu. Takim čynam, što zmoža ŭbačyć hość stalicy, kali praź niekalki hadoŭ apyniecca na vulicach Kalvaryjskaj i Prytyckaha?
1. Chmaračos «Vietraź»
U «pieršy chmaračos Biełarusi» ŭkładziena ŭžo stolki hrošaj, što spynicca budoŭla nie moža. Ale tempy nie radujuć — voś užo hod kampanija «Iterabiełbud», filijał rasijskaj naftavaj «Itery», nie moža darabić apošnija try pavierchi 130-mietrovaha budynka. Prodažy iduć nie nadta paśpiachova, tamu niekalki pavierchaŭ chmaračosa mohuć addać pad hatelnyja numary.
2. Grand Fashion Mall
Pamiž «Vietraziem» i hipiermarkietam «Karona» patrochu budujecca handlova-zabaŭlalny kvartał z kramami, ofisami i restaranami. Chutkaści budaŭnictva pieraškadžaje abutkovaja fabryka « Pramień», jakaja nijak nie moža pierajechać za miežy Minska. Kvartał musić być darobleny da 2015 hoda.
Budaŭnictva viadziecca kampanijaj «Aŭtabiznes», jakaja ŭvachodzić u skład chołdynha «ABU Hrup» na čale ź biznesoŭcam Dźmitryjem Rozumam. Jon vałodaje handlovym centram «Padziemny horad», zajmajecca impartam aŭtamabilaŭ «Sitrajen» i vypuskaje niekalki aŭtamabilnych časopisaŭ.
3. Žyły kompleks «Kaskad»
Kala čyhunačnych šlachoŭ viadziecca budaŭnictva kvartała «Kaskad» — hałoŭnaha prajekta kampanii «Juniviest-M» na čale z Anatolem Tarnaŭskim. Nahadajem, suprać hetaj kampanii, u jakoj pracuje niaviestka kiraŭnika dziaržavy Hanna Łukašenka, uvioŭ sankcyi Jeŭrasajuz.
16 hiektaraŭ, na jakich budzie 125 tysiač kv.m žylla i bolš za 100 tysiač kvadrataŭ kamiercyjnaj nieruchomaści — taki razmach nabrała naftavaja kampanija. Adnak nazvać rajon prestyžnym składana. Aproč šumu ad čyhunki i raźviazki, jakaja budzie dabudavanaja praź niekalki hadoŭ, niavarta zabyvacca i pra aŭru — častka kompleksu budujecca na miescy byłoj turmy.
4. Hatel i ofisny centr
Nasuprać Kalvaryjskich mohiłak pačałosia budaŭnictva dzieviacipaviarchovaha hatela na 130 numaroŭ i ofisnaha centra. Zabudoŭščyk — biełaruska- polskaje pradpryjemstva «Strominviest-M», jakoje niekalki hadoŭ tamu stvaryła pa susiedstvie kompleks z čatyroch žyłych damoŭ. Spačatku mierkavałasia budavać tolki ofisny centr, ale Minharvykankam nastajaŭ jašče i na trochzorkavym hateli. Novy budynak budzie pafarbavany ŭ śvietła-aranžavy koler. Pracy skončacca da 2014 hoda.
5. «Hulivier»
«Hulivier» — prykład jašče adnaho kłasičnaha handlova-zabaŭlalnaha centra z restaranami, bucikami, načnym kłubam, centralnym hipiermarkietam i navat šaścipaviarchovym parkinham. Kompleks budzie naležyć kampanii «Aresa-Servis», adnamu z najbujniejšych zabudoŭščykaŭ Minska na čale ź biznesoŭcam Siarhiejem Kareńkam. Pracy, jakija jašče faktyčna nie pačynalisia, majuć skončycca da 2015 hoda.
6. «Civali»
Taki kompleks pačało budavać AAT «Fiestyvalny centr». Finansavańnie ofisnaha centra i trochzorkavaha hatela na 146 numaroŭ musiła ažyćciaŭlacca dolevym sposabam, adnak pamiaškańni popytam nie karystalisia. Siem pavierchaŭ užo pabudavanyja. Pracy musiać skončycca ŭ 2013 hodzie.
7. Hipiermarkiet «Skała»
U płanach litoŭskaj inviestycyjnaj kampanii «Rapa» budaŭnictva hipiermarkietaŭ u Viciebsku Salihorsku i ŭ Minsku, na vulicy Piatra Hlebki. Trochpaviarchovy kompleks budzie kaštavać kala 40 miljonaŭ jeŭra. Miarkujecca, što jaho zdaduć u ekspłuatacyju ŭ studzieni 2013 hoda.
8. Supiermarkiet «Ałmi»
Na miescy aŭtastajanki pamiž damami №91 i №97 źjavicca supiermarkiet sietki «Ałmi» miljaniera Alaksandra Zarybki. Jon zrabiŭ svoj biznes u Rasii, choć i naradziŭsia ŭ Pinsku Tut budzie krama, fitnescentr, spa-sałon, boŭlinh, a taksama dźvie kaviarni. Kab kampiensavać stajanku, inviestary pabudujuć haściavuju parkoŭku na 310 miescaŭ a taksama parkinh na 500 miescaŭ.
9. Hipiermarkiet i hatel Juryja Čyža
Handlova-zabaŭlalny kompleks kala stancyi mietro «Kamiennaja Horka» buduje kampanija miljaniera Juryja Čyža, jaki stała prapisaŭsia ŭ śpisie sankcyj Jeŭrasajuza. Adnak kankretna «Mahnus-hrupy» ŭ čornym śpisie niama, što dazvalaje joj ščylna supracoŭničać ź litoŭcami. Prajekt raźličany ažno da 2018 hoda, ale spačatku budzie pabudavany 22-paviarchovy ofisna-hatelny centr.
10. Stadyjon SKVIČ
Nie na vulicy Prytyckaha, ale za kiłamietr ad jaje, u rajonie Kamiennaja Horka źjavicca hihancki kompleks futbolnaha kłuba SKVIČ biznesmena Viktara Paŭłava. U jaho ŭvojduć stadyjon na 6 tysiač miescaŭ, futbolny maniež, handlovy centr, hatel i miedycynski centr ahulnym koštam 200 miljonaŭ jeŭra. Dla realizacyi prajekta kampanija šukaje zamiežnaha inviestara. Aproč taho, SKVIČ buduje žyłyja damy ŭ toj samaj Kamiennaj Horcy i niepadaloku ad stancyi mietro «Spartyŭnaja».
Što jašče?
11. 16-paviarchovy trochzorkavy hatel na hrošy češskaha inviestara.
12. 19-paviarchovy ofisny budynak «Biełarusnafty» z zapraŭkaj i kramaj «Asobina».
13. 50-paviarchovaja (!) ofisnaja i žyłaja vieža na miescy stajanki. Budaŭnictva małavierahodnaje.
14. Žyły dom «TeraBudInviest», jaki nie moža dabudavacca ŭžo piać hadoŭ.
15. Hipiermarkiet «Prastor» na skryžavańni Prytyckaha i MKAD.
Ciapier čytajuć
«Dyjalekt padazrony». Śpiavak Siaroha pryjšoŭ na rasijskaje realici i sabraŭ usich chejtaraŭ6
Kamientary