Siarhiej Hryc: Udaryli kułakom u pravaje voka, raźbili akulary
Fatohraf Associated Press raskazaŭ pra siońniašni chapun kala ŭniviersama «Frunzienski».
«Ja atrymaŭ udar kułakom u pravaje voka, pry hetym mnie raźbili akulary», — raskazaŭ «NN» fatohraf Associated Press Siarhiej Hryc, jaki razam z kalehami byŭ žorstka zatrymany siońnia na pikiecie aktyvistaŭ moładzievaha kryła «Zmiena» («Havary praŭdu!»).
«Vielmi hruba vałakli ŭ aŭtobus. Usich — aktyvistaŭ i presu. Vyryvali z ruk aparaturu. Pry hetym žorstka abryvali ŭsie sproby vyśvietlić, chto jany takija, i čamu zatrymlivajuć žurnalistaŭ», — kaža fotakarespandent.Pa jaho słovach, u aŭtobusie nieviadomyja ŭ cyvilnym adrazu ž adbirali telefony ŭ tych, chto sprabavaŭ telefanavać. U adździaleńni milicyi ŭsich zatrymanych pamiaścili ŭ aktavaj zali, rassadziŭšy ich na adlehłaści adzin ad adnaho. Aparaturu adabrali adrazu ž i skłali jaje na adnym sa stałoŭ.
«Ja pravioŭ dźvie hadziny ŭ roznych kabinietach. U mianie ničoha nichto nie pytaŭ. Zabrali pašpart i, vidavočna, sami daviedalisia, chto ja taki».
Žurnalist kaža, što jaho z kalehami adpuścili biez składańnia pratakołaŭ. Aparaturu jamu viarnuli, ale zdymki z akcyi byli vydalenyja.
Ciapier Siarhiej Hryc vyrašaje, jak budzie reahavać na siońniašnija padziei i ci budzie zdymać paboi. «Mnie treba paraicca z kiraŭnictvam».
***
Nahadajem, što siońnia apoŭdni la ŭniviersama «Frunzienski» ŭ Minsku padčas pikietu, ładžanaha moładzievym kryłom kampanii «Havary praŭdu!» — «Zmena» byli zatrymanyja teleapieratar Alaksandr Barazienka, fotakarespandenty Siarhiej Hryc (Associated Press), Vasil Fiadosienka (Reuters), Taćciana Ziankovič (EPA) i Pavieł Padabied (BiełaPAN), a taksama aktyvisty «Zmieny» Alaksandr Arcybašaŭ i Pavieł Vinahradaŭ.
Padčas pikieta aktyvisty «Zmena» mielisia zładzić simvaličnuju razdaču baršču.
Paśla pačatku pikieta da ŭdzielnikaŭ i žurnalistaŭ padbiehli nieviadomyja, pačali źbivać i zatrymlivać usich prysutnych. Dźvie hadziny z žurnalistami nie było suviazi, kiraŭnictva minskaj milicyi admaŭlała fakt zatrymańnia.
Ciapier čytajuć
Źnikły Kotaŭ vyjechaŭ z Turcyi moram — mahčyma, u bok Rasii17
Kamientary