«Ckavańnie Daškieviča padpadaje pad kryminalny artykuł biez terminu daŭniny»

Chryścijanskija demakraty Biełarusi patrabujuć ad administracyi papraŭčaj kałonii № 20 Mazyra spynić ździeki ź lidara mižnarodnaj arhanizacyi «Małady front» (Čechija) Źmitra Daškieviča.

«26 vieraśnia źjaviłasia infarmacyja pra cisk na lidara Maładoha frontu, palitviaźnia Źmitra Daškieviča z boku administracyi Mazyrskaj papraŭčaj kałonii № 20 i asabista kiraŭnika jaje Juryja Zbaroŭskaha. U pryvatnaści, načalnik kałonii abraźliva vykazvaŭsia z nahody pratestanckich cerkvaŭ i viery Daškieviča, jamu pahražali hvałtam z boku inšych źniavolenych, usialak abražali i prynižali. U vyniku hetaha Daškievič byŭ vymušany abviaścić haładoŭku pratestu», — havorycca ŭ zajavie arhkamiteta pa stvareńni partyi «Biełaruskaja chryścijanskaja demakratyja».

Dziejańni Zbaroŭskaha, pa acency aŭtaraŭ zajavy, padpadajuć pad kryminalnaje złačynstva biez terminu daŭniny.

«Publičnaja źniavaha viernika chryścijanina ŭ krainie z tysiačahadovaj chryścijanskaj historyjaj — vyklik usim cerkvam Biełarusi, usiamu hramadstvu. Arhkamitet BCHD zaklikaje ŭsich ludziej dobraj voli padtrymać Źmitra Daškieviča, a Hienieralnuju prakuraturu abjektyŭna i ŭsiebakova rasśledavać padadzienyja fakty», — havorycca ŭ zajavie.

Arhkamitet BCHD patrabuje vyzvaleńnia Źmitra Daškieviča i inšych palitviaźniaŭ.

Źmicier Daškievič i jaho paplečnik pa «Maładym froncie» Eduard Łobaŭ byli zatrymanyja napiaredadni apošnich vybaraŭ prezidenta, 18 śniežnia 2010 hoda, pa abvinavačvańni ŭ źbićci dvuch mužčyn. Pradstaŭniki apazicyi i pravaabaroncy rascanili ich aryšt jak previentyŭnuju mieru pa «začystcy» hramadstva pierad vybarami. U sakaviku 2011 hoda sud pryhavaryŭ Daškieviča da dvuch hadoŭ pazbaŭleńnia voli ŭ kałonii ahulnaha režymu.

Lider «Maładoha frontu» adbyvaŭ pakarańnie ŭ VK-13 u horadzie Hłybokaje (Viciebskaja vobłaść). 28 žniŭnia Hłybocki rajonny sud na zakrytym vyjaznym pasiadžeńni ŭ kałonii pryznaŭ Daškieviča vinavatym u złosnym niepadparadkavańni patrabavańniam administracyi VK i prysudziŭ jaho da hoda pazbaŭleńnia voli. U termin pakarańnia ŭklučanyja čatyry miesiacy, jakija apazicyjanieru zastavałasia adbyć u kałonii pa pieršaj kryminalnaj spravie.

Pavodle infarmacyi pres-słužby «Maładoha frontu», 19 vieraśnia Daškievič pastupiŭ u VK-20 Mazyra, a 21-ha — abviaściŭ haładoŭku ŭ suviazi z «niečałaviečym pavodzinami administracyi kałonii, u tym liku jaje načalnika Juryja Zbaroŭskaha».

Pra situacyju z Daškievičam prainfarmavanyja Jeŭraparłamient, šerah ministerstvaŭ zamiežnych spraŭ krain ES, śpiecdakładčyk Parłamienckaj asamblei Rady Jeŭropy pa Biełarusi Andres Chierkiel i specdakładčyk AAN pa pytańniach katavańniaŭ Chuan Miendes.

Ciapier Daškievič utrymlivajecca ŭ štrafnym izalatary VK-20.

Mižnarodnyja pravaabarončyja arhanizacyi pryznali jaho palityčnym viaźniem.

• 0
• 0
• 0
• 0
• 0
• 0
• 0
• 0