«Zapłaciŭ za kvateru 6 hadoŭ tamu, a budaŭnictva jašče nie pačałosia»

Staličnych zabudoŭščykaŭ, jakija skančajuć damy ŭ termin, možna pieraličyć pa palcach. Kamuści pieraškodziŭ kryzis, kamuści — niesumlennyja padradčyki, ale najčaściej sapraŭdnaj pryčynaj stanovicca raschlabanaść budaŭnikoŭ, jakaja zastajecca biespakaranaj. Navasioły, atrymaŭšy klučy ad kvatery, nie iduć sudzicca — napieradzie pracajomki ramont. Voś tolki dačakacca hetaha momantu ŭdajecca nie ŭsim. U niekatorych vypadkach dolščyki čakajuć svaje kvatery hadami. «Naša Niva» daviedałasia, jak vyrašajecca situacyja na prablemnych abjektach.

Budoŭla tak i nie pačałasia

U try damy na praśpiekcie Niezaležnaści ŭ Minsku kala «Biełaruśfilma» dolščyki pavinny byli zasialacca ŭ kancy 2008 hoda. Prynamsi, takija terminy byli paznačanyja ŭ ich damovach.

Zapłaciŭšy dziasiatki tysiač dalaraŭ jašče ŭ 2005—2006 hadach (!), jany spačatku čakali svajho žylla, paśla — viartańnia svaich hrošaj, ciapier — choć niejkaj kampiensacyi. Zabudoŭščyk, kampanija «Pierśpiektyva-Inviest Bud», hod za hodam prasiła «troški pačakać». Ale i praz šeść hadoŭ paśla poŭnaj apłaty kvatery na miescy budaŭnictva pa-raniejšamu možna ŭbačyć niekalki zabitych svajaŭ u hihanckaj jamie. Ahułam u joj akazalisia pachavanyja $10 miljonaŭ.

«Paciarpiełych dolščykaŭ było pad 130 čałaviek. Niekalkim dziasiatkam udałosia praz sud viarnuć układzienyja ŭ budoŭlu hrošy.

Inicyjatyŭnaja hrupa dolščykaŭ tym časam viadzie pieramovy ź Minharvykankamam. Adzin z varyjantaŭ vyrašeńnia situacyi — stvareńnie kaapieratyva i samastojny pošuk inviestara.

Imidž zaminaje dabudoŭvać

Samaja hučnaja historyja, źviazanaja z machlarstvam zabudoŭščyka, zakruciłasia vakoł doma kala stancyi mietro «Kamiennaja Horka».

A što z samim domam i sapraŭdnymi dolščykami? Šeść padjezdaŭ-siekcyj ź dziesiaci ŭžo zdadzienyja ŭ ekspłuatacyju, i ŭ ich užo zasialilisia žylcy. A voś pra los astatnich padjezdaŭ ničoha aptymistyčna nie skažaš. «Maja kvatera jakraz znachodzicca ŭ nastupnym, siomym padjeździe. Ja zaklučaŭ damovu ŭ kancy 2009 hoda. Prajšło try hady, a my ŭsio jašče zastajomsia na zdymnym žylli, — narakaje dolščyk Vital. — Kali b zabudoŭščyk kinuŭ usie siły na naš padjezd, da kanca hoda možna było b dabudavać. Ale my iluzij nie majem. Vidać, jašče paŭhoda daviadziecca čakać. A voś z nastupnymi padjezdami situacyja našmat horšaja. Praz hučnuju kryminalnuju spravu ŭ zabudoŭščyka sfarmiravaŭsia kiepski imidž. Novyja dolščyki da nas nie iduć, a svabodnych hrošaj u «Tery» brakuje».

Niepavarotlivy «Minskbud»

Inšaja haračaja kropka na mapie Minska znachodzicca na skryžavańni praśpiekta Dziaržynskaha i vulicy Ščorsa.

Z tym, što terminy nie vykonvajucca, dolščyki byli hatovyja źmirycca. Adnak jurysty «Minskbuda» prapanavali im padpisać dadatkovaje pahadnieńnie, zhodna ź jakim košt kvadratnaha mietra vyrastaŭ da 8,5 miljona rubloŭ. U vyniku za dvuchpakajovuju kvateru tre było dapłacić amal $10 tysiač. «Minskbud» tłumačyŭ situacyju prosta: u kryzis usie budaŭniki ŭciakli pracavać u Rasiju, a materyjały istotna padaraželi, tamu hrošy na budaŭnictva i skončylisia. Mnohija dolščyki vyrašyli dapłacić, ale astatnija hatovyja zmahacca da apošniaha. Jany pišuć skarhi ŭ kantralujučyja struktury i kiraŭnictvu horada, navat zapisali videazvarot da Alaksandra Łukašenki. Kropka ŭ kanflikcie pakul nie pastaŭlenaja. Budaŭnictva adnaviłasia, ale ci daviadziecca płacić astatnim dolščykam, nieviadoma.

Spakusa z Kurhannaj

U siaredzinie 2010 hoda, jašče da pačatku valutnych skačkoŭ, litoŭski inviestar mieŭsia pabudavać za 8 miesiacaŭ kompleks žyłych damoŭ usiaho pa $910 za kvadratny mietr. Prapanova pryvabiła mnohich — unikalnyja skandynaŭskija technałohii budaŭnictva, biasšumnyja lifty, impartnyja prybory. I ŭsio heta jašče i pobač z vadajomam. Nie zasmučała navat miesca budaŭnictva — spalny rajon Malinaŭka — i toje, što, zhodna z damovaj, 100% cany kvatery treba było zapłacić adrazu ž.

Čas rasstaviŭ usio na svaje miescy. Prajšło dva hady, a ŭ dvuch pieršych damach jašče tolki ŭzvodziacca ścieny.

Dapamoha dla Biełteleradyjokampanii

Zatoje historyja z domam dla supracoŭnikaŭ Biełteleradyjokampanii blizkaja da svajho zaviaršeńnia. Dom «dla svaich» pačynaŭ budavacca za miesiac da prezidenckich vybaraŭ 2010 hoda. Kvadratny mietr kaštavaŭ usiaho $730 — značna tańniej za rynkavyja ličby. Voś tolki na budaŭnictva hrošaj u BT nie chapiła.

Tamu, kali ŭ kancy 2011 hoda sprava ledź nie dajšła da zamarožvańnia budoŭli, dom pierakłali na Upraŭleńnie kapitalnaha budaŭnictva (UKB) Frunzienskaha rajona Minska.

Televizijonščykam daviałosia pierazaklučać damovy, pryčym kvadratny mietr dla ich patańnieŭ až da $550!

BT abiacała zdać dom sioleta ŭ krasaviku, UKB aryjentavałasia na žnivień. Najchutčej, televizijonščyki atrymajuć klučy ad svaich kvateraŭ u kancy zimy. Zatoje pa lhotnaj canie i biez dapłat.

• 1
• 0
• 0
• 0
• 0
• 0
• 0
• 0