Śledstva pa spravie ab źniknieńni Juryja Zacharanki čarhovy raz praciahnuta

Śledstva pa spravie ab źniknieńni byłoha ministra ŭnutranych spraŭ Biełarusi, hienierał-majora Juryja Zacharanki čarhovy raz praciahnuta da 24 śniežnia. Ab hetym paviedamiŭ pravaabaronca Aleh Vołčak, jaki aficyjny pradstaŭlaje intaresy siamji Juryja Zacharanki.

Pavodle słoŭ Vołčaka, paviedamleńnie ab praciahu spravy jon atrymaŭ sa Śledčaha kamiteta.

«Heta standartnaja pracedura — śledstva praciahvajecca kožnyja try miesiacy z času raspačynańnia kryminalnaj spravy pa źniknieńni Zacharanki», — adznačyŭ Vołčak.

Pavodle jaho słoŭ, hetaja situacyja budzie praciahvacca jašče dva hady, da zakančeńnia terminaŭ daŭniny pa hetym artykule. «Jany vyznačajucca starym Kryminalnym kodeksam — da 15 hadoŭ. U vieraśni było 13 hadoŭ.

Tamu jašče 2 hady jana moža praciahvacca», — skazaŭ Vołčak.

Jon nie spadziajecca, što sprava za hetyja 2 hady budzie rasśledavana. «Potym spravu abo źniščać pry śviedkach, abo zasakreciać i pieradaduć u archiŭ, abo jana dzieści «zhubicca», — miarkuje Vołčak.

«Adnak sa źmienaj ułady ŭ Biełarusi možna budzie znoŭ adnavić rasśledavańnie hetaj spravy pry znoŭ adkrytych abstavinach. Uličvajučy, što rasśledavańnie za 13 hadoŭ nie zrušyłasia ź miortvaj kropki, to, vierahodniej za ŭsio, daviadziecca pačynać rasśledavańnie „s nula“, paralelna vyśviatlajučy, chto i jak jaho rasśledavaŭ. Ja dumaju, z hetym prablem nie budzie, bo jość uskosnyja śviedčańni, žyvyja śviedki, jakija nikudy nie dzielisia», — ličyć Vołčak.

***

Hienierał-major Juryj Zacharanka źnik 7 maja 1999 hoda pry niavyśvietlenych abstavinach. Padčas vybaraŭ pieršaha prezidenta Biełarusi jon uvachodziŭ u kamandu Alaksandra Łukašenki, a ŭ 1994–1996 hadach zajmaŭ pasadu ministra ŭnutranych spraŭ.

Pajšoŭšy ŭ apazicyju, u 1998 hodzie Zacharanka staŭ členam «cieniavoha ŭrada», dzie ŭznačaliŭ kamitet pa biaśpiecy. Viasnoj 1999 hoda hienierał aktyŭna ŭdzielničaŭ u arhanizavanaj apazicyjaj kampanii pa vybarach prezidenta. Jon uvajšoŭ u kamandu eks-premjera Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.

Karystajučysia aŭtarytetam siarod supracoŭnikaŭ MUS, Zacharanka stvaryŭ alternatyŭny sajuz aficeraŭ. Pa adnoj ź viersij, mienavita heta i stała asnoŭnaj pryčynaj raptoŭnaha źniknieńnia byłoha ministra. Jaho vykrali viečaram 7 maja ŭ rajonie vulicy Mahiloŭskaj u Minsku pa darozie damoŭ. Nieŭzabavie siamja Zacharanki atrymała palityčnaje prystanišča ŭ Hiermanii.

• 0
• 0
• 0
• 0
• 0
• 0
• 0
• 0