Jubileju — dastojnuju sustreču, abo Jak Biełaruś budzie słavić Čarhinca

«Čałaviek, asoba, tvorca» — tak nazyvajecca vystava, što adkryłasia hetymi dniami ŭ Nacyjanalnaj biblijatecy Biełarusi ŭ honar jubileju vydatnaha biełaruskaha piśmieńnika, hramadskaha i palityčnaha dziejača.

Vystava zajmaje dva stełažy. U adnaho stełaža svoj padzahałovak: «Ź vieraju ŭ dabro». Na hetym stełažy vystaŭleny knihi majstra słova — pačynajučy ad samych rańnich («Trievožnaja słužba», «Śledstvije prodołžajetsia» i «Finał Kraba») i zakančvajučy vydadzienymi zusim niadaŭna («Riskovannaja ihra» i «Tajna Ovalnoho kabinieta»).

Źviartaje ŭvahu toje, što dźvie knihi piśmieńnika vyjšli ŭ sieryi «Biblijateka Sajuza piśmieńnikaŭ Biełarusi». Dvuma tamami ŭ hetaj sieryi ŭhanaravany taksama Ivan Šamiakin, a knihi niekatorych litarataraŭ (naprykład, Janki Bryla, Vasila Bykava, Ivana Mieleža, Ivana Ptašnikava ci Viačasłava Adamčyka) za piać hadoŭ isnavańnia hetaj sieryi jašče nie vyjšli.

Jak i kožny znakamity piśmieńnik, naš jubilar nie moža nie vykazvacca na temy litaratury.

Pakolki ž naš jubilar jašče i hienierał, dyk intervju ź im u časopisie «Biełaruskaja dumka» maje zahałovak «Na pieriedovoj litieratury»,

Zrešty, časopis «Armija» raźmieščany na druhim stełažy, jaki maje deviz «Piśmieńnik, juryst, palityk». Nie moža nie ździŭlać šyrynia kruhahladu i zacikaŭleńniaŭ našaha jubilara.

Ź litaratury, vystaŭlenaj na hetym stełažy, možna daviedacca, što jon uvachodzić u redkalehii vydavieckich sieryjaŭ «Biełaruskaja proza XX stahodździa» i «Biełaruskaja paezija XX stahodździa», u redkalehii časopisa «Nioman» i encykłapiedyi «Kultura Biełarusi».

Choć ad času napisańnia dysiertacyi prajšło 35 hadoŭ, jaje tema i siońnia aktualnaja dla našaj krainy i navuki: «Administrativno-pravovyje problemy boŕby protiv ṕjanstva i ałkoholizma (Po matieriałam Biełorusskoj SSR)».

Jak palityk, naš jubilar byŭ sienataram Biełarusi, uvachodziŭ (ci jašče ŭvachodzić?) u Pastajanny kamitet Sajuznaj dziaržavy, Parłamiencki schod Sajuzu Biełarusi i Rasii. Ab jaho vysokim aŭtarytecie śviedčyć toje, što jon adkryvaŭ u červieni 2008 h. u Hielendžyku Mižnarodnuju kanfierencyju «Aktualnyja prablemy budaŭnictva i raźvićcia Sajuznaj dziaržavy» (a nam, śmiarotnym, dumajecca: jakija jašče mohuć być prablemy?).

Ciažka ŭ karotkaj zaciemcy pieraličyć usie aśpiekty dziejnaści hetaha vydatnaha dziejača našaj epochi, ale pra adzin abaviazkova treba skazać.

Prykra adno. Čamuści dahetul našy krytyki i asabliva litaraturaznaŭcy nie nadali naležnaj uvahi vyvučeńniu tvorčaści jubilara, asablivaściaŭ jaho počyrku, nie stvaryli nivodnaj manahrafii. A heta vielmi patrebna dla navučańnia tvorčaj moładzi, asabliva dla talentaŭ z hłybinki, pra jakich ščyra kłapocicca pryznany majstar słova.

I ŭsio ž toje, što vydaviectva «Mastackaja litaratura» pryśviaciła jamu salidny tom u «Ličnosť, vriemia, sud́ba» ŭ sieryi «Žyćcio znakamitych ludziej Biełarusi», vyśviečvaje maštab asoby piśmieńnika. Nahadaju, što ź bieletrystaŭ honaru być pradstaŭlenymi ŭ hetaj sieryi pakul što ŭdastoilisia tolki Janka Kupała, Maksim Bahdanovič, Uładzimir Karatkievič, Maksim Tank dy Ivan Šamiakin.

Ščyryja prychilniki talentu našaha jubilara ź nieciarpieńniem čakajuć 17 kastryčnika, kali jon u dzień svajho 75-hodździa budzie prymać šmatlikija vinšavańni i padarunki ad kaleh pa Sajuzu piśmieńnikaŭ Biełarusi, ad byłych kaleh pa Ministerstvu ŭnutranych spraŭ i «sienatu», hramadskich i palityčnych dziejačoŭ. U toj dzień stanie viadoma, jakaja vysokaja dziaržaŭnaja ŭznaharoda čakaje Mikałaja Čarhinca. Hałoŭnaje — napieradzie.

• 0
• 0
• 0
• 0
• 0
• 0
• 0
• 0