Na Navahrudčynie adstrelvajuć dzikoŭ. Vietsłužba kaža: trychinieloz. Palaŭničyja: afrykanskaja čuma
U adstrele zadziejničanyja palaŭničyja ź niekalkich rajonaŭ.
Jak paviedamiŭ «Našaj Nivie» palaŭničy, u Navahrudskim rajonie pravodzicca masavy adstreł dzikoŭ. U im udzielničajuć jak navahrudskija palaŭničyja, tak i ich kalehi z susiednich rajonaŭ. «Źbirajuć hrupy palaŭničych dla adstrełu dzikoŭ. Ciapier kala voziera Śviciaź asnoŭnyja padziei adbyvajucca», — raskazaŭ surazmoŭca.
Pa słovach palaŭničaha, masavy adstreł nibyta naładzili paśla taho, jak vyjavili dzika, chvoraha na afrykanskuju čumu.
U navahrudskim rajonnym adździaleńni Biełaruskaha tavarystva palaŭničych i rybałovaŭ (BTPiR) paćvierdzili infarmacyju pra adstreł dzikoŭ, ale pryčyny nazvali inšyja:
«Pravodzicca manitorynh trychinielozu pa pradpisańni vietsłužbaŭ», kažuć u BTPiR.Tušy zabitych dzikoŭ advoziać u łabaratoryi Navahrudka, Hrodna i Minska. «Naša sprava — adstreł, usio astatniaje vyśviatlać vieterynary».
«Manitorynh trychinielozu — heta tolki adna z pryčynaŭ», — patłumačyli karespandentu «NN» u Navahrudskaj rajonnaj vieterynarnaj stancyi.«Akramia hetaha, treba ŭličvać niespryjalnuju epizaatyčnuju situacyju ŭ susiednich krainach — Ukrainie, Rasii. A taksama rezki rost papulacyi dzikoŭ u rehijonie. Dzikoŭ šmat i jany škodu robiać, najpierš u kukuruzie i bulbie».
Słovy palaŭničych pra zaražeńnie dzikoŭ afrykanskaj čumoj u vietstancyi kateharyčna abvierhli.
Nahadajem, što ŭ lutym hetaha hoda ŭ Navahrudskim rajonie ŭ vioscy Niaznanava vietsłužby kanfiskavali ŭ miascovych žycharoŭ śviniej, zabili ich i spalili. Infarmacyja trapiła ŭ presu, źjavilisia čutki pra ŭspyšku afrykanskaj čumy śviniej.
Aficyjna dziejańni vietsłužby ŭ Niaznanavie nazvali «rehijanalnymi vučeńniami ŭ režymie maksimalna nabližanaj da realnych umoŭ abstanoŭki, z prymianieńniem efiektu niečakanaści i adpracoŭkaj ŭsich kankretnych dziejańniaŭ i prafiłaktyčnych mierapryjemstvaŭ». Vypadak u Niaznanavie mieŭ šyroki rozhałas u krainie.
«NN» paraŭnała apisanyja viaskoŭcami dziejańni sanepidemstancyi z patrabavańniami adpaviednych praviłaŭ i pryjšła da vysnovy, što ŭ Niaznanavie mahli pravodzicca nie vučeńni, a abmiežavalnyja miery pry padazreńni na AČS.
Trychiniloz — parazitarnaje zachvorvańnie, jakoje vyklikajuć kruhłyja červi trychinieły. Čałavieku pieradajecca ź miasam svojskaj śvińni abo dzika, a taksama pry apracoŭcy žyviolnaj skury. Vyjavić chvarobu možna z dapamohaj analizu kryvi i myšačnaj bijapsii.
Kab paźbiehnuć zaražeńnia, dosyć trymacca praviłaŭ apracoŭki miasa.Hatavać jaho pry ŭnutranaj tempieratury praduktu nie nižejšaj za 74 hradusy. Možna vymarazić miasa: pry tempieratury -20 hradusaŭ dastatkova 3 dni, pry -15 — nie mienš za 20 dzion.
Afrykanskaja čuma śviniej čałavieku nie škodzić. Ale jana vielmi zaraznaja: kosić śvinstva padčystuju, dzie tolki zaviadziecca.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ1
Kamientary