Mientalnyja partniory: «Minsk-Kryštal» i «Nemiroff» prezientavali pahadnieńnie i napoi

13 listapada «Minsk-Kryštal» i «Nemiroff» zładzili pres-kanfierencyju, dzie abviaścili pra zaklučeńnie licenzijnaha pahadnieńnia. U Minsku buduć vypuskać liniejku harełak: «Niamiraŭskaja pšanica ŭkrainskaja adbornaja», «Niamiraŭskaja «Limon», «Niamiraŭskaja asablivaja «Bruśničny list» i «Niamiraŭskaja «Miadovyja sucharyki».

Mientalnyja partniory

Na pres-kanfieryncyi, jakaja prajšła ŭ hateli «Crowne Plaza», kiraŭniki «Minsk-Kryštal» i «Nemiroff» rabili adzin adnamu kamplimienty. Hučali słovy pra sajuz «roŭnych i mocnych», pra toje, što było šmat «haračych sprečak», ale ŭ vyniku my stali «nie prosta kampańjonami», ale «mientalnymi partniorami».

Staršynia rady dyrektaraŭ Nemiroff Holding Limited Jakaŭ Hrybaŭ ahučyŭ try asnoŭnyja punkty, na jakich budzie hruntavacca supracoŭnictva ź minskim partnioram.

Pieršaje. «Minsk-Kryštal» pačynaje vypusk restajlinhavaj pradukcyi «Nemiroff» dla patrebaŭ biełaruskaha rynka.

Druhoje. «Nemiroff» biare na siabie abaviazak ekspartavać raźlituju ŭ Biełarusi harełku za miežy krainy. U tym liku i ŭłasnyja brendy minskaha partniora.

Treciaje. U I kvartale 2013 hoda ŭkrainski partnior inviestuje ŭ vytvorčaść paŭmiljona dalaraŭ.

14 miljonaŭ plašak pa 0,5

Pavodle pahadnieńnia, u Biełarusi «Nemiroff» maje vypuścić kala 700 tysiač dał harełki, što składaje kala 14 miljonaŭ paŭlitrovych plašak. Siaredni roźničny košt plaški raźlitaj u nas niamiraŭskaj harełki składzie kala 47 tysiač rubloŭ.

«Dyk i nie nadta doraha!» — prahučała replika z boku žurnalistaŭ. Adnak, kiraŭnik «Nemiroff» mienš aptymistyčny. Na jaho dumku, z takoj canoj treba budzie mocna pastaracca, kab vykanać płany pa zavajovie 7-10% harełačnaha rynka Biełarusi.

Hiendyrektar «Minsk-Kryštal» Stanisłaŭ Iodzis bačyć u pašyreńni liniejki adnosna darahich harełak pazityŭny momant, zdolny palepšyć zdaroŭje nacyi.

«Ja naradziŭsia ŭ SSSR»

Jakava Hrybava nie pałochaje toj fakt, što Biełaruś ustupiła ŭ mytny sajuz z Rasijaj i Kazachstanam. Najpierš jon pryznaŭsia, što asabista vitaje taki krok i zusim nie suprać, kab da hetaj kampanii dałučyłasia Ukraina. Jon dahetul ličyć SSSR vialikaj dziaržavaj i vitaje sproby abjadnacca jaje byłych krain-udzielnic.

Rynak Kazachstana Jakaŭ Hrybaŭ aceńvaje, jak vielmi pierśpiektyŭny. Kampanija ŭžo zaraz raspracoŭvaje płany vychadu na harełačny rynak hetaj krainy za košt biełaruskich i rasijskich pradstaŭnictvaŭ.

«Možacie kryŭdzicca, ale Biełaruś — heta aazis»

Bolšuju častku inviestycyj u Minsku «Nemiroff» nakiruje na abaronu ad padrobak u Rasii.

«Možacie kryŭdzicca, možacie nie kryŭdzicca, ale Biełaruś dla mianie — sapraŭdny aazis zakonapasłuchmianaści», — ščyravaŭ Jakaŭ Hrybaŭ.

Jon nie pieražyvaje za toje, što jakaść jahonaj pradukcyi z časam moža źnizicca, na što namiaknuŭ adzin z pradstaŭnikoŭ presy. «Zabudźciesia na tyja časy, kali takoje zdarałasia. Ciapier čas kankurencyi, a tamu nie treba kala kožnaha technołaha stavić kantralora. Bo kožny vydatna razumieje — upaduć prodažy, upadzie i zarobak».

U svaju čarhu, Stanisłaŭ Iodzis nie adnojčy ciaham pres-kanfierencyi zapeŭniŭ svaich partnioraŭ, što im zusim nie varta pieražyvać za jakaść harełki.

* * *

«Minsk-Kryštal» — u červieni nastupnaha hoda adznačyć 120-hodździe pracy. Adzin z najbujniejšych vytvorcaŭ vina-harełačnaj pradukcyi. Ekspartuje harełku ŭ 34 krainy śvietu, siarod jakich Pieru, Iran i Daminikanskaja Respublika. U płanach — zavajova rynkaŭ Aŭstralii i Novaj Ziełandyi.

«Nemiroff» — 20 hadoŭ na rynku. Pradaje harełku ŭ 75 krain śvietu. Na Ukrainie vałodaje 17% rynku pavodle abjomaŭ vypusku pradukcyi i 21% u hrašovym ekvivalencie.

• 0
• 0
• 0
• 0
• 0
• 0
• 0
• 0