Udzieł u akcyi suprać admieny lhotaŭ kaštavaŭ studentu BDU hutarki z supracoŭnikam KDB.
Na praciahu viasny studenta fakulteta radyjofizyki BDU Jaŭhiena Piatlickaha vysielili ź internatu za nalepki, zatrymali za ŭdzieł u akcyi suprać admieny lhotaŭ, a ciapier voś sprabujuć naviazać supracoŭnictva z kamitetam dziaržbiaśpieki.
Pierad sioletnim Čarnobylskim šlacham internat BDU №3 zakidali nalepkami z zaklikami iści na akcyju. Administracyja internatu źvinavaciła ŭ «paškodžańni majomaści» studenta fakulteta radyjofizyki Jaŭhiena Piatlickaha, u jakoha znajšli niekalki nalepak. U vyniku chłopca nie zasielać u nastupnym navučalnym hodzie ŭ internat.
Padčas akcyi suprać admieny lhotaŭ Jaŭhien byŭ zatrymany i paśla pierapisu asabistych źviestak byŭ adpuščany. Praź niekatory čas jaho vyklikaŭ namieśnik dekana, paviedamiŭšy, što ź im choča parazmaŭlać supracoŭnik KDB. Supracoŭnika cikaviła, ci jość jašče na fakultecie biełaruskamoŭnyja, jakija nastroi siarod adnakurśnikaŭ i susiedziaŭ pa internacie, ci ŭdzielničaje Jaŭhien u akcyjach apazycyi, jak sumiaščaje svaju aktyŭnaść z vučobaj, ci nia maje prablemaŭ z paśpiachovaściu, ci vyrašyŭ pytańnie ź internatam. Pavodle słovaŭ studenta, jon adkazvaŭ, što ničoha nia viedaje pra nastroi studentaŭ i dumki susiedziaŭ. Naprykancy hutarki kadebešnik prapanavaŭ pakinuć svoj telefon, zaznačyŭšy, što sam jašče patelefanuje.
***
Vypadak ź Jaŭhienam Piatlickim kamentuje pravaabaronca Valancin Stefanovič.
«Sytuacyja typovaja ŭ apošni čas — pravaabarončyja arhanizacyi štotydzień fiksujuć takija vypadki. Supracoŭniki dziaržbiaśpieki stali aktyŭna praktykavać takija metady, vyšukvajučy tych studentaŭ, što praz palityku majuć prablemy z vučobaj abo ŭ internacie.
Zakon dazvalaje im rabić heta, ale tolki sa zhody čałavieka, jakoha jany schilajuć da supracoŭnictva. Supracoŭnik, jaki sprabuje z vami sustrecca dla hutarki, musić abaviazkova pradstavicca, bo jon pradstaŭlaje dziaržustanovu. U advarotnym vypadku možna śmieła admović jamu ŭ sustrečy.
Kali vam dajuć pozvu, to ŭ joj pavinna być dakładna paznačana, u jakaści kaho vas zaprašajuć na hutarku. Kali dla davańnia niejkich tłumačeńniaŭ, to možna ich nie davać, zakon heta dazvalaje.
Na hutarku z supracoŭnikam KDB možna iści z advakatam, što harantujecca art. 62 Kanstytucyi.
Kali čałaviek naahuł nie žadaje supracoŭničać, jamu varta źviarnucca ŭ ŚMI, raspaŭsiudzić infarmacyju pra verboŭku siarod znajomych. Heta zrobić jaho niepryvabnym dla dalejšaha supracoŭnictva z KDB.
Treba pa mahčymaści abmiežavać kolkaść kantaktaŭ z supracoŭnikami specsłužbaŭ, bo zaciahvańnie pryvodzić da sumnych vynikaŭ».
* * *
Kamentar Redakcyi. «Specsłužby dziejničajuć u kožnaj krainie. Što vy ad nas chočacie?» — tak zvyčajna apraŭdvajuć svaje dziejańni rabotniki biełaruskich specsłužbaŭ. Heta tak. Ale čamu ŭdzieł studenta ŭ akcyi suprać skasavańnia lhotaŭ robicca kłopatam KDB? Ci vykazvać svajo mierkavańnie pa hetym pytańni zabaraniajuć biełaruskija zakony? Ci heta ekstremizm? Čamu supracoŭnik KDB dazvalaje sabie raspytvać pra biełaruskamoŭnych? Pa jakim pravie specsłužby cikaviacca tymi, chto razmaŭlaje na rodnaj movie? Sama takaja pastanoŭka pytańniaŭ źnievažalnaja dla luboha hramadzianina i biełarusa. Ničoha dziŭnaha, što takija specsłužby (dzie, pa niejkim dziŭnym supadzieńni, nie pracuje nivodzin biełaruskamoŭny) nabyvajuć reputacyju antybiełaruskich strukturaŭ.
Ciapier čytajuć
«Źviažyciesia z nami»: Prakopjeŭ napisaŭ kałonku dla «NN», u jakoj abhruntoŭvaje znachodžańnie Cichanoŭskaha ŭ Štatach i prosić hrošaj66
«Źviažyciesia z nami»: Prakopjeŭ napisaŭ kałonku dla «NN», u jakoj abhruntoŭvaje znachodžańnie Cichanoŭskaha ŭ Štatach i prosić hrošaj
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1515
Kamientary