Viestki ź Litvy
Našych nie zaprašali
U minuły čaćvier u Vilenskim universytecie była padpisanaja deklaracyja pra ŭtvareńnie Kalehijumu Ściapana Batury. Hety Kalehijum stanie supolnaj sietkaju ŭniversytetaŭ Centralna-Ŭschodniaj Eŭropy. Na ŭračystaje padpisańnie aktu pryjechali rektary z 9 universytetaŭ ź Litvy, Polščy, Čechii, Słavaččyny, Vuhorščyny, Rasiei. La vytokaŭ hetaha prajektu stajaŭ Ježy Hiedrojc, jaki bačyŭ va ŭtvareńni adzinaj adukacyjnaj prastory nia tolki akademičnuju karyść. Jon šmatkroć kazaŭ, što maryć pra supolnuju budučyniu narodaŭ hetaje častki Eŭropy, jak supolnaju była ich minuŭščyna. Nievypadkova dla padpisańnia hetaha dakumentu byŭ abrany Vilenski ŭniversytet, zakładzieny 420 hadoŭ tamu samim Ściapanam Baturam, vuhorskim kniaziem, jaki byŭ abrany vaładarom našaj staražytnaj dziaržavy. Biełaruskija ŭniversytety da ŭdziełu nie zaprašalisia.
Viaskovy turyzm na Vilenščynie
Dniami ŭbačyła śviet novaja kniha, pryśviečanaja cikavostkam Vilenščyny — «Atrakcje architektoniczne na turystycznych szlakach Wilenszczyzny», jakaja była padrychtavanaja studentami Vyšejšaj Sielskahaspadarčaj Škoły ŭ Biełaj Vacy, što pad Vilniaju, pad kiraŭnictvam vykładčykaŭ sp. Pšychodnia j Biesalskaha. Jaje pryznačeńnie — być turystyčnym daviednikam dla tych, kaho cikavić viaskovy turyzm, šlachi jakoha źbiahajuć ad tłumnych haradoŭ dy šumnych daroh. U knizie pišacca pra krajavidy, pryrodnyja, archiealahičnyja dy architekturnyja pomniki, da hetaje pary małaviadomyja šyrejšamu kołu ludziej. U pradmovie ŭkładalniki napisali: «Vilenščyna — heta kraina maraŭ dla turysta. U lubuju paru hodu tut dastatkova nie spatykanych raniej uražańniaŭ i estetyčnych pieražyvańniaŭ. Tym, chto padarožničaje, zdajecca ŭvieś čas, što jany majuć dačynieńnie sa śvietam, uziatym prosta z epičnych krajavidaŭ Ferdynanda Ruščyca». Što praŭda, Ruščyc, bahata malavaŭ na Vilenščynie, tolki dalej na poŭdzień: na Smarhonščynie, Ašmianščynie dy Vałožynščynie.
Harełku viazuć kanistrami
Najbolšaj papularnaściu ŭ Vilni dy vakolicach karystajecca biełaruskaja harełka «Panski dom». Jaje vyrablajuć na Ščučynščynie, u kałhasie «Mažejkava». Sioleta hety napoj atrymaŭ na mižnarodnaj vystavie ŭ Sočy załaty medal. Aproč taho, «Mažejkava» tamaka ž atrymała medali za jašče dva mocnyja napoi. Hetkim čynam kałhas abyšoŭ navat papularnuju marku mienskaha «Kryštalu», pra što napisali i ŭ litoŭskaj presie, sa ździŭleńniem adznačajučy, što litoŭskija pradpryjemstvy vyhladajuć našmat ściplej.
Nia dziva, što absalutnaja bolšaść kantrabandnaj harełki ŭ Litvie — hety samy «Panski dom». Kamendant palicyi padvilenskich Salečnikaŭ Jan Mackievič pryvioŭ źviestki, što tolki za vierasień było kanfiskavana 1272 butelki biełaruskaj harełki. Ale heta mizer ad taho, što ŭsio ž traplaje ŭ Litvu. Rekord na minułym tydni, naprykład, pastaviŭ žychar Ejšyšak, jaki daŭmieŭsia pieravieźci cieraź miažu furmanku, naładavanuju 1047 plaškami. A ŭ minuły aŭtorak užo žychar Bieraścia zdoleŭ pieravieźci ŭ pryčepie MAZu try tony harełki, pieralitaj u admysłovyja kanistry!
Lićvin
Kamientary