Naviny ź Biełarusi
500 rabočych troch dyrektaraŭ źniali, biarucca za čaćviertaha
U Mahilovie rabotniki zavodu «Zenit» dajuć dychtu dyrektaru Novikavu. Reč u tym, što dyrekcyja sprabuje vykinuć svabodny prafsajuz z pradpryjemstva. A prafarhanizacyja na zavodzie bajavaja i adstojvaje intaresy rabočych pa-sapraŭdnamu. Užo 3 dyrektary źmianilisia, paśla taho jak suprać ich arhanizoŭvała kampaniju tutejšaja prafsupołka. Ale i čaćvierty dyrektar dziejničaŭ tymi ž metadami. U pryvatnaści, jon zahadaŭ vysielić ofis prafsajuzu z zavodu ŭ internat, jaki znachodzicca ŭ 2 km ad «Zenitu». Z hetym nie pahadzilisia rabočyja i pryjšli da kabinetu dyrektara ź pikietam. Było kala 120 čałaviek. Dyk dyrektar, zamiest razmovy ź ludźmi, abazvaŭ ich tupahałovymi, svabodny prafsajuz abvinavaciŭ u tym, što jon kormicca z amerykanskich dalaraŭ i hruknuŭ dźviaryma. Ale prafsajuz i tut nie sumieŭsia i ŭžo daŭ pozvu ŭ sud za abrazu, abiacaje i masavyja akcyi, i navat strajk. Rabočyja niezadavolenyja dyrektaram, niezadavolenyja haspadarčym stanam pradpryjemstva. U padtrymku lideraŭ užo składzieny zvarot, jaki padpisali pad 500 zavodzkich ludziej. Heta siła, i ź joj pryjdziecca ličycca. Dośvied źniaćcia dyrektaraŭ u prafsajuzu ŭžo vialiki.
Symon Hłazštejn
Byccam by Vińnikava
Vińnikava byccam by znajšłasia, ale jaje nichto nia bačyŭ, tolki čuli. Karespandent BBC Astalski, jaki rychtavaŭ ź joj interviju, sam jaje nia bačyŭ, tolki havaryŭ praz telefon. A daviedaŭsia jon pra jaje ad znajomych jahonych znajomcaŭ. Havaryła jana nie ŭžyvuju, a ŭ zapisie dziela pieraškodaŭ na linii.
Jana ŭžo dała interviju radyjam «Svabodzie» i «Racyi». Kaža jana ŭsiakaje. Tolki Karpienku ŭsio dziakuje, što jon jaje vyratavaŭ. Naš pasoł u Vialikaj Brytanii Ščasny śćviardžaje, što hetyja jaje zajavy zapisvalisia ŭ Maskvie daŭniej, a ciapier tolki prakručvajucca, a ci to jana sama ŭ słuchaŭku z žurnalistami havoryć, ci to heta chto inšy, taho spadar Ščasny nia viedaje. Choć byccam by jana sapraŭdy ŭ Londanie, dzie j jaje syn žyvie.
B.T.
Hančarenka zamiest Ciciankova
Ministra suviazi, byłoha načalnika mahiloŭskaj pošty Hančarenku, pryznačyli kiravać spravami prezydenta. Jon taki nievysočańki, vypić lubić, a kapitalistaŭ nia lubić.
Nadziei na Dzień Voli
15 śniežnia na Varvašeni 8 adbyłasia pres-kanferencyja, pryśviečanaja čarhovaj damovie miž Biełarusiaj i Rasiejaj z udziełam Vincuka Viačorki i Viačasłava Siŭčyka. Była padkreślenaja surjoznaść i niebiaśpieka hetaje damovy, jakaja, u adroźnieńnie ad raniejšych dakumentaŭ hetkaha kštałtu, daje realnyja pieradumovy dla stvareńnia adzinaje vajskovaje prastory i pašyreńnia absiahu dziejnaści rasiejskich specsłužbaŭ na dźvie krainy. A heta jašče j destabilizacyja stanovišča va ŭsim rehijonie (čaho vartaja, skažam, aficyjnaja zajava pra paklikanaść Biełarusi baranić prastoru «ad Ryhi da Kijeva»). Tamu pieršuju padziaku — za chutkuju i vostruju reakcyju — lidery Narodnaha Frontu skłali ŭradam mienavita hetych krainaŭ, jakija, razam z Zachodniaj Eŭropaj, zaniali «ćviorduju pazycyju» adnosna Rasiei. «Padpisańnie sajuznaje damovy stałasia svojeasablivaj lakmusavaj papierkaj, pa jakoj my vyznačajem, z kim nam varta mieć spravu, a z kim — nie», — adznačyŭ Viačorka. Hetkaj samaj lakmusavaj papierkaj staniecca jano, vidać, i dla Narodnaha Frontu, što maje pakazać, čaho jon varty. Asnoŭnyja nadziei Front źviazvaje z Dniom Voli-2000, jaki pavinien być adznačany masavymi demanstracyjami dy inšymi formami «cisku na režym». Meta — adstaŭka dziejnaha prezydenta i ŭradu. Pra heta raspavioŭ Viačasłaŭ Siŭčyk, jaki trapiŭ na pres-kanferencyju «z karabla na bal» (kali «karablom» ličyć zalu suda, dzie dajuć karu ŭ 217 młn. rubloŭ za vychad na prajeznuju častku).
Nie zastałosia pa-za ŭvahaj i pravaparušeńnie tydnia — źbićcio ŭ SIZA Andreja Klimava 13 śniežnia. Kiraŭnictva BNF vykazała nadzvyčajnaje abureńnie z hetaje nahody (darečy, na kanferencyi prysutničali maci i žonka deputata). Što da Klimava, jaki da źniavoleńnia nia mieŭ navat medyčnaje kartki pa miescy žycharstva, dyk ciapier jamu ŭparu davać invalidnaść. Što tut možna skazać pra pravaachoŭnuju systemu krainy?
Źjaŭleńniem T.Vińnikavaj frontaŭcy ŭściešanyja, choć i prahučała tumannaja fraza adnosna «roznych varyjantaŭ» raźvićcia padziejaŭ z namiokam na roznyja mahčymyja padaploki padziejaŭ.
A.S.
Kamientary