Vaładzimier Cybulko: “Nivodnaja kraina ad tranzytu nia straciła”

Vaładzimier Cybulko:
“Nivodnaja kraina ad tranzytu nia straciła”

Hazapravodnyja intaresy Biełarusi i Ŭkrainy sutyknulisia. Jakim budzie vyrašeńnie hetaha kanfliktu? Hetkaje pytańnie my zadali daradcu premjer-ministra Ŭkrainy Vaładzimieru Cybulku, viadomamu svajoj prychilnaściu da biełaruska-ŭkrainskaha stratehičnaha zbližeńnia.

— Rasieja, nakolki nam viadoma, chacieła b pavialičyć ekspart hazu ŭ Eŭropu na 50%. Ukrainskaja nitka hazapravodu zdolnaja pavialičyć propusk hazu na 30—50% užo ciapier. Ź inšaha boku, na pabudovu novaha hazapravodu ŭ Rasiei niama dastatkova srodkaŭ. Jość i inšy aspekt: apošnija hady zdabyča hazu ŭ samoj Rasiei štohod skaračałasia amal na 10% i, kab zachavać ekspartny patencyjał, Rasieja pieravodziła ŭłasnych spažyŭcoŭ z hazu na mazut i vuhal. Heta vymušaje mianie trochi sumniavacca ŭ realnaści planaŭ pabudovy novaha hazapravodu.

— Biełaruś, pa-Vašamu, nabudzie ci stracić, kali hazapravod pralaža pa jaje terytoryi?

— Ad tranzytu jašče nivodnaja kraina nia straciła. Tranzyt – adnaznačny resurs. Usio zaležyć ad taho, jak jon vykarystoŭvajecca. Ci jon budzie nabytkam usiaje nacyi, ci tolki hrupy ludziej. Ale, adnojčy pabudavany, hazapravod užo z terytoryi krainy nikudy nia źniknie i budzie krynicaju ŭzbahačeńnia biełarusaŭ u lubym razie.

— Dźmitry Karčynski, były unsoviec i viečny pravakatar, źbirajecca ździejśnić revalucyju ŭ Biełarusi. Praŭda, jon dbaje nie pra biełaruskuju demakratyju, a pra ŭkrainski dabrabyt. Revalucyjny chaos u Biełarusi raspužaje investaraŭ, spadziajecca jon. Kaštavać revalucyja budzie, pavodle jahonych padlikaŭ, 250 tysiačaŭ dalaraŭ. Jahonyja napaleonaŭskija plany ciešać biełaruskija ŭłady, inačaj by Karčynskaha nie zaprasili vystupić u subotniaj “Panaramie”. Nakolki jahonyja zajavy i plany adlustroŭvajuć realnyja nastroi ŭkrainskich haspadarčych i palityčnych elitaŭ?

— U kožnaj krainy jość intaresy ŭ susiedniaj krainie. Karčynski – nia rupar uradu abo parlamenckich palityčnych siłaŭ. Heta prosta prykład taho, što pravakacyja, zdarovaja ci niezdarovaja, moža być madellu palityčnaha isnavańnia. Heta pazycyja jahonaha asiarodździa. Choć dumka pra Ŭkrainu jak pra rehijanalnaha lidera chodzić u hałovach ukrainskaj elity. Dakładniej, nia dumka, a mara. Heta mara ŭ perspektyvie. Usio zaležyć ad ekanamičnaha rostu. A rost VUP sioleta ŭva Ŭkrainie skłaŭ 5%.

— Jakaja kraina budzie stabilniejšaju ŭ perspektyvie, Ukraina ci Biełaruś?

— Unutrana stabilniejšaju jość Ukraina: u nas jość planavyja padstavy dla efektyŭnaha i realnaha ekanamičnaha rostu. U nas u ziamli jość realny ŭłaśnik, heta 6 młn. hramadzian. I jany za svaju ziamlu atrymlivajuć realnyja pai, jakija sioleta składali 50 dalaraŭ u miesiac – chto hrašyma, chto cukram, chto zbožžam. Sioleta ŭpieršyniu vyras abjom sielskahaspadarčaj pradukcyi i ŭpieršyniu dziaržava pierastała vydzialać miljard dalaraŭ na datacyi kałhasam. Narešcie, na 36% źmienšyŭsia raschod paliva i zmazki padčas pasiaŭnoj – toje, što ŭ kałhasach prosta raskradałasia! Biudžetnyja pastupleńni sioleta vyraśli na 48%. Voś jany – realii ekanamičnaha azdaraŭleńnia. Užo ciapier siaredni ŭkrainiec žyvie lepš, čym siaredni rasiejec.

My ŭžo prajšli peŭny etap, jaki Biełarusi jašče treba prajści.

Hutaryŭ B.T.

Vaładzimier Cybulko – paet, prazaik, aŭtar knihi “Anioły j mity” (1998), menedžer kultury (byŭ pradjuseram šerahu pop-vykanaŭcaŭ, u tym liku kultavaha Alaksandra Panamarova), imidžmejkier (reklamnaja kampanija partyi “Reformy i paradak” u 1997 h.). Z 2000 h. – z pryznačeńniem refarmatara V.Juščanki premjeram – daradca premjer-ministra.