Daterminovyja vybary ŭ pałatku

Daterminovyja vybary ŭ pałatku

Biełaruś nia maje lehitymnaha parlamentu. Kaliści krainy volnaha śvietu pryznavali takim Viarchoŭny Saviet XIII sklikańnia, ale z kanca minułaha hodu Zachad pierastaŭ i jaho ličyć za pravamocny. Nacyjanalnaha schodu Zachad taksama za parlament nie pryznaje. A ci stała b biełaruskaja apazycyja spaborničać za miescy ŭ nacyjanalnym schodzie, kali b vybary ŭ jaho byli praviedzieny daterminova?

Stanisłaŭ Šuškievič, kiraŭnik Biełaruskaj sacyjał-demakratyčnaj hramady: Heta było b absalutna biessensoŭna, bo “pałatka” nia maje nijakaj zakanadaŭčaj ułady. Jana lalečnaja, pryšpilenaja da prezydenckich dekretaŭ i ŭkazaŭ. Tamu zajmacca hetaj spravaj — absalutnaje hłupstva.

Nina Stužynskaja, “Narodnaja hramada”: Sama ja pryniała b abaviazkova ŭdzieł i raiła b svaim siabram. Vybary — heta mahčymaść pracavać siarod ludziej.

Alaksandar Dabravolski, Abjadnanaja hramadzianskaja partyja: Musić, nie pryniaŭ by. Kali b źmianiłasia palityčnaja sytuacyja, a tak... Pry tych paŭnamoctvach, jakija maje pałata, naŭrad ci ad vybaraŭ budzie niejkaja karyść.

Siarhiej Vysocki, kiraŭnik niezarehistravanaj Biełaruskaj partyi svabody: Udzieł u vybarach moh by dać efekt u planie prapahandy našych idejaŭ. Ale navat kali b za Vysockaha prahałasavali 100% vybarcaŭ, to ŭ vyniku było b abvieščana, što 100% hałasavali suprać jaho. Ja nia vieru ŭ sumlennaść uładaŭ.

Stanisłaŭ Bahdankievič, AHP: U ciapierašnich umovach ja b nia braŭ udziełu ŭ vybarach. Voś kab źmianiŭsia režym ułady, kab parlament mieŭ paŭnamoctvy, kab było pahadnieńnie miž apazycyjaj i ŭładaj... Ale, kali b chtości ź inšych maich kalehaŭ, maładziejšych, bolš enerhičnych, hatovych žorstka adstojvać intaresy demakratyi, pajšoŭ na vybary, ja b heta vitaŭ.

Siarhiej Hajdukievič, kiraŭnik Liberalna-demakratyčnaj partyi Biełarusi: My biarom udzieł va ŭsich vybarach.

My i inšym partyjam raili ŭdzielničać, ale tolki ciapier Anatol Labiedźka i Vincuk Viačorka heta zrazumieli. Siedziačy ŭ ofisach, ničoha nia źmieniš...

Ivan Paškievič, deputat pałaty pradstaŭnikoŭ: Ja, jašče kali byŭ namieśnikam kiraŭnika administracyi prezydenta, prapanoŭvaŭ pravieści daterminovyja vybary parlamentu, bo pieršaja pałata pradstaŭnikoŭ była stvorana nia tak, jak treba. Maja prapanova vyklikała ŭ deputataŭ buru emocyj. Paśla vybaraŭ u pałatu pradstaŭnikoŭ 2-ha sklikańnia razmova ŭžo idzie pra nielehitymnaść parlamentu, abranaha z parušeńniami vybarčaha zakanadaŭstva. Ciapier, kali raspuskać parlament, to novyja vybary treba pravodzić pa novym vybarčym kodeksie, z udziełam palityčnych partyj. Ja za takija vybary. Kab parlament byŭ pluralistyčny. Siońniašni ž vybarčy kodeks pravieści takija vybary nie dazvalaje, tamu treba pačynać mienavita ź jaho.

Słavamir Adamovič, paet, były palitviazień: Nie, absalutna. I razvažać nia budu.

Alaksiej Karol, sacyjał-demakratyčnaja partyja, što stvarajecca: Na inšych umovach možna paŭdzielničać, ale na hetych — padumaŭ by. Biezumoŭna, kali dobra i razam uziacca za pracu, moža atrymacca, i kandydaty projduć. Asabliva kali vystupić kaalicyjna, uzhodniena.

Jury Bieleńki, Kanservatyŭna-chryścijanskaja partyja BNF: Nie, bo heta prafanacyja. Pałata pradstaŭnikoŭ nia jość vyšejšym zakanadaŭčym pradstaŭničym orhanam krainy, jakim pavinien być pa Kanstytucyi parlament. Jak možna bačyć z presy, jany sami narakajuć, što ničoha nia mohuć zrabić. Tamu ŭdzieł u vybarach — heta sadziejničańnie ŭmacavańniu antybiełaruskaha režymu.

Pavał Kazłoŭski, były ministar abarony Biełarusi: Ja moh by. Ja da hetaha hatovy, kali buduć novyja praviły hulni. Kali parlamenckija paŭnamoctvy buduć pierahledžanyja. Naahuł, ja liču, što treba brać udzieł va ŭsich vybarach. I zmahacca tam, kab źmianić praviły hulni.

Siarhiej Kaścian, deputat pałaty pradstaŭnikoŭ, kiraŭnik medyja-chołdynhu “Litaratura i mastactva”: Ja na hetaje pytańnie adkazvać nia budu. Heta nadumanaja tema.

Zapisaŭ Aleh Tačony