Soras — suprać karupcyi
Viadomy finansist Džordž Soras vystupiŭ z antykarupcyjnaj inicyjatyvaj. Jon prapanavaŭ abaviazać kampanii, što zajmajucca zdabyčaj pryrodnych resursaŭ, raskryvać poŭnuju infarmacyju pra vypłaty roznym uradam i čynoŭnikam.
Miljarder sumiesna z 30 mižnarodnymi arhanizacyjami (u tym liku pravaabarončaj “Amnesty International” i “prociadmyŭnaj” “Transparency International”) prapanavaŭ arhanizacyjam — rehulataram fondavaha rynku zrabić bolš žorstkimi praviły raźmiaščeńnia kaštoŭnych papier na biržach. Heta dapamoža kantralavać transnacyjanalnyja kampanii, jakija zajmajucca raspracoŭkaj pryrodnych resursaŭ, u pieršuju čarhu nafty.
Havorka idzie pra toje, kab takija kampanii, jak “BP” i “Shell”, raskryvali infarmacyju pra roznyja vypłaty ŭradam za prava zdabyčy nafty i hazu — padatki, adličeńni i prosta chabar. Pavodle Sorasavych źviestak, takija vypłaty prynosiać uładam naftanosnych krainaŭ miljardy dalaraŭ. “Hrošy, jakija mahli b być vykarystanyja dla źmianšeńnia ŭzroŭniu halečy i dla chutkaha ekanamičnaha rostu, zamiest hetaha raskradajucca”, — kaža Soras u interviju brytanskaj hazecie “Financial Times”. Pavodle jahonych słovaŭ, kala 90% dziaržaŭnaha biudžetu Anhoły składajuć dachody ad prodažu nafty. Usiaho biudžet składaje 6—7 młrd. dalaraŭ, i “prynamsi miljard z hetych dachodaŭ sioleta niekudy źnik”, — padličyŭ Soras.
Pravaabarončyja arhanizacyi taksama padazrajuć, što ŭ Anhole hrošy, atrymanyja ad prodažu licenzijaŭ na raspracoŭku naftavych i ałmaznych radoviščaŭ, čaściakom iduć na viadzieńnie vajennych dziejańniaŭ. Pytańni ŭ Sorasa vyklikajuć i inšyja krainy Afryki, a taksama Łacinskaj Ameryki i Kaśpijskaha rehijonu (u pieršuju čarhu Kazachstan i Turkmenistan).
Pradstaŭniki bujnych mižnarodnych naftavych i hazavych kampanijaŭ, apytanyja zachodnimi ŚMI, zbolšaha admaŭlalisia kamentavać Sorasavu inicyjatyvu, spasyłajučysia na toje, što hetaje pytańnie musić abmiarkoŭvacca finansystami i biržavikami. U kampanijach pry hetym adznačali, što jany, biezumoŭna, chočuć zrabicca bolš prazrystymi, ale sačyć za tym, jak roznyja ŭrady traciać svaje hrošy, — nia ichny kłopat.
S.P.
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii13
Kamientary