Z usioj krainy

Z usioj krainy

Padmanvajuć žančynaŭ

Dźvie žycharki Kryčava nanialisia ŭ Rasieju (Chimki, Maskoŭskaja vobł.) pracavać handlarkami na rečavym rynku, a apynulisia ŭ kapciuroch sutenioraŭ. Paru miesiacaŭ ich siłkom trymali ŭ Maskvie, prymušajučy pracavać prastytutkami i štodzień absłuhoŭvać pa niekalki dziasiatkaŭ klijentaŭ. A baba, jakaja ich najmała, abiacała nie pa-biełarusku vialikija zarobki, prymalnyja ŭmovy pracy i inšyja žyćciovyja vyhody… Niadaŭna dziaŭčatam paščaściła ŭciačy ad svaich kataŭ. Heta ŭžo druhi taki aficyjna zarehistravany vypadak z kryčaŭskimi žančynami za apošni hod.

Andrej Kuźmin, Kryčaŭ

Škoły začyniajucca, nastaŭnikaŭ zvalniajuć

Z 1 vieraśnia buduć začynienyja biełaruskija Tuškaŭskaja pačatkovaja škoła i Chamičynskaja škoła-sad. 6 nastaŭnikaŭ i 7 techničnych supracoŭnikaŭ zastanucca biaz pracy. Pa viedy čatyrom 6—7-hadovym dzieciam z Tuškava daviadziecca chadzić za 5 kilametraŭ u Horki ci jechać na kałhasnym aŭtobusie ŭ viosku Dobraja. A 22 chamičynskija vučni buduć štoranku jeździć aŭtobusam u susiednija Masłaki. Zakryćcio hetych škołaŭ dazvolić za vierasień—studzień 2002 h. aščadzić 6,5 młn. rubloŭ. U Horackim rajonie jość jašče try pačatkovyja škoły (u Nikulinie, Starasielli i Chodaraŭcy), dzie vučacca ad 18 da 34 vučniaŭ. Ale sioleta začyniać bolej ničoha nie płanujuć. Adno zvolniać 27—30 nastaŭnikaŭ i kala 190 pieraviaduć na niapoŭnuju staŭku.

Źniali dźviery

U baranavickaha pensijanera skrali… dźviery. Jany byli padvojnyja — dziela bolšaje biaśpieki. I, adamknuūšy niejak ranicaj unutranyja, dziadźka ūbačyū, što vonkavyja nočču niechta źniaū.

Novyja prajaznyja

Baranavicki aūtapark sa žniūnia ūvodzić novyja prajaznyja kvitki dla lhotnikaū. Ciapieraka, nabyvajučy ich, tre budzie pakazvać dakumenty na lhoty. Na veteranskim prajaznym budzie stajać litara “V”, proźvišča dy imia ūładalnika i numar paśviedčańnia. U školnikaū — litara “Š”, numar škoły, imia j proźvišča. Da prajaznoha tre budzie jašče daviedka sa škoły. Studenty j navučency atrymajuć kvitki ź litaraj “U”. Na ich taksama musiać być paznačanyja numar studenckaha, nazva VNU j proźvišča. Robicca heta, kab prajaznyja nie pieradavalisia inšym asobam.

Rusłan Raviaka, Baranavičy

Ulez u škodu

U Ivacevičach z pamiatnaha znaku, pastaŭlenaha ŭ pamiać achviaraŭ druhoj suśvietnaj vajny, źnikli piać plitaŭ ź imionami niabožčykaŭ. Skraŭ ich 23-hadovy biespracoŭny Źmicier Hryharkievič. Jon adździraŭ 25-kilahramovyja plity ŭnačy i nasiŭ pa adnoj dadomu. Dźvie pabiŭ na kavałki j zdaŭ skupščyku kalarovych metałaŭ za 23500 rubloŭ. Try astatnija, schavanyja la haražoŭ, źnikli.

Ciapier Źmicier musić adsiedzieć piać miesiacaŭ u viaźnicy j zapłacić kala dvuch miljonaŭ rubloŭ.

Aleś Łaŭraniuk, Ivacevičy

Albom hurtu “Vierasień”

Horacki folk-hurt “Vierasień” zapisaŭ pieršy kampakt-dysk. U jaho ŭvajšli 10 biełaruskich narodnych piesień i niekalki aŭtarskich tvoraŭ. Maniera vykanańnia — liryčnaja, ź miakkim humaram. Zaviecca albom “Staronka”.

Natalla Kirajenkava, Horki

Šachmatny turnir
u Baraŭlanach

U pasiołku Lasny braty Viktar i Kastuś Marozy zładzili šachmatny turnir. Udzieł u im uziali 11 čałaviek. Usie hulcy, zhodna ź biełaruskaj tradycyjaj, vystupali pad imionami, a nie pad proźviščami. Atmasfera na spabornictvach panavała siabroŭskaja — usie byli zadavolenyja: i chto vyjhraŭ, i chto prajhraŭ. Adzinaja dziaŭčyna, Julija, pieramahła amal usich mužčynaŭ i zaniała pryzavoje druhoje miesca. Hulni vyrašana zrabić tradycyjnymi. Było b dobra, kab i ŭ inšych miastečkach i vioskach padtrymali hetuju inicyjatyvu.

Valer Badun, Lasny

“Veterany Adradžeńnia”
ŭ Luboničach

7 lipienia ŭ Babrujsku siabry abłasnoj supołki hramadzianskaj inicyjatyvy “Veterany adradžeńnia” zładzili vyjezd u viosku Luboničy. Veterany naviedali miesca, dzie kaliści stajaŭ chram Božaj Maci “Žyvanosnaja krynica”, razrabavany ŭ časy kalektyvizacyi, naviedali majsterniu viaskovaha mastaka Ŭładzimiera Aŭsianika. Zaviaršyŭsia vyjezd kupańniem u rečcy i harbataj u viaskovaj chacie, za jakoj abmiarkoŭvalisia plany dalejšaje dziejnaści.

Viktar Kačan, Babrujsk

Kapajuć Hłuski zamak

Praciahvajucca raskopki Hłuskaha zamku, pabudavanaha bolš za 300 hod tamu. U svoj čas jon naležaŭ maršałku Vialikaha Kniastva Litoŭckaha Alaksandru Pałubinskamu, potym Radziviłam. Kaliści na jaho terytoryi byŭ vializny kaścioł. Čas i ludzi nie pakinuli ad zamku anijakich śladoŭ: ciapier na tym miescy stadyjon, atočany ziemlanymi vałami. Ale pad ziamloj reštki staradaŭnich umacavańniaŭ zachavalisia. Ich i daśleduje ŭžo šosty hod archieolah ź Instytutu historyi Iryna Hanieckaja. Sioleta kapajuć u pravaj častcy zamčyšča. Nie staje pracoŭnaj siły: školniki, ab jakich papiarednie damovilisia z kiraŭnictvam adździełu kultury rajvykankamu, nie byli hatovyja da pačatku raskopak. Davodzicca šukać dobraachvotnikaŭ siarod miascovych žycharoŭ.

Ihar Kiryn, Hłusk

adjezd tydnia

Biełaruski stracili šanavalnika

Bernar Faśje, pasoł Francyi, pakinuŭ krainu ŭ suviazi sa skančeńniem terminu paŭnamoctvaŭ. Treci ŭ historyi dyplamatyčnych adnosinaŭ pasoł Francyi ŭ Biełarusi zapomniŭsia vykštałconymi kamplimentami. “Biełaruś najbahaciejšaja kraina, bo ni ŭ jakaj inšaj niama stolki hožych žančyn”, — niastomna paŭtaraŭ jon u svaich interviju.

Šejman padbiraje kadry pad siabie

Namieśnik hieneralnaha prakurora Biełarusi Michał Śniahir pieraviedzieny na pasadu prakurora Mienskaj vobłaści. Kolišni prakuror Mienščyny pajšoŭ na pensiju. Raniej prakuror Miensku Mikoła Kupryjanaŭ byŭ pryznačany namieśnikam hienprakurora, a jahonaje miesca zaniaŭ Mikoła Kulik, jaki adkazvaŭ u prakuratury za ŭnutranuju biaśpieku. Pieratvaryŭšy prakuraturu ŭ adnu z samych upłyvovych strukturaŭ krainy, Šejman farmuje pad siabie i aparat.

B.T.