Dzie vy, «Rok-adkryćci»?

Los pieramožcaŭ u naminacyi «Adkryćcio hodu» adnolkavy: paśla atrymańnia «rok-menzurki» muzyki niekudy źnikajuć i na nastupnych karanacyjach zaśviečvajucca redka. Z usich adkryćciaŭ minułych «Rok-karonaŭ» na bujnych kancertach siońnia pabačyš tolki dvuch-troch.

Siarod tych dvuch-troch — «The Stokes», pieramožca 1997 h. Jon značna źmianiŭ stylistyku, pierajšoŭšy ad rytm-end-bluzu da pop-roku. Niadaŭna muzyki źniali niebłahi klip na pieśniu «Mieždu Minskom i Rimom», źjaŭlalisia na BT, brali ŭdzieł u kancercie suprać vajny ŭ Iraku.

Adkryćcio-2001 «Bieź bileta» sioleta naminujucca na «Klip hodu» z malavanym videarolikam «Stop-biznes». Paśla debiutnaha albomu «Na nieba», supolnaj pracy ź Finbierham nad pieśniaj «Maja kraina — Biełaruś» adnosiny ŭ hurcie razładzilisia. Tolki niadaŭna «Bieź bileta» stabilizavalisia ŭ novym składzie. Muzyki zapisvajuć pa častkach albom, vystupajuć pa mienskich klubach (niadaŭna adyhrali ŭ «NC»), źbirajucca ŭletku na festyval «Maładečna-2003», zrabili ŭłasny sajt www.bezbileta.com.

Adkryćciom minułaj karanacyi byŭ hurt «Impet». Vakalistka Dana abiacaje, što pry kancy leta kamanda vydaść narešcie svoj debiutny dysk. U 2002 h. «Impetu» dali ŭznaharodu ŭ sukupnaści: za pieramohu na «Basoviščy» i za pieśniu «Zusim niaprosta», jakaja paŭhodu kruciłasia na FM-stancyjach. Paśla pryznańnia «Impet» krychu prapaŭ: niešmatlikija klubnyja vystupy, adsutnaść novaha hitu kalibru «Zusim niaprosta», prablemy z składam (hitaryst Maksim Lipski źjechaŭ na niapeŭny čas u Izrail).

U 2000 h. muzyčnyja žurnalisty adznačyli adrazu dvuch debiutantaŭ: «Exist» i «TT-34». Jak paviedamiŭ dyrektar «TT-34» Siarhiej Połaŭcaŭ, hurt ciapier pracuje nad synhłam z čatyroch pieśniaŭ, a pad vosień abiacaje zrabić albom. Kancertuje pakul u rodnym Homieli, ale, majučy na rukach zapis, planuje raspačać turne pa maskoŭskich klubach. «Heta nia značyć, što my aryjentujemsia tolki na Maskvu, peŭnych vektaraŭ my dla siabie nie vyznačajem», — kaža jon. Svoj styl muzyki akreślivajuć jak «sučasnaja ciažkaja muzyka, narodžanaja asiarodździem, u jakim my žyviom». To bok tym samym Homielem.

Takoj muzyki, jak u «Exist», tut na toj čas nichto nia hraŭ. Usie najnoŭšyja modnyja płyni, ad noise da hardkoru, syntezavalisia ŭ tvorčaści Jurasia (Chobita) Kuprašova i Andreja (Endru) Vosipčyka. A voś ź inšymi muzykami była prablema. Jakija tolki bubnačy ź imi ni jhrali! Byŭ navat Źmicier Charytanovič, były ŭdzielnik «Hasta La Fillsta» i «Zet», jaki ciapier «bubnić» u «Leprykonsach». «Exist» pieramoh na «Basoviščy», vydaŭ synhł «Pamyliŭsia», ale pastajannyja prablemy z składam vyklikali raspad hurtu. «Exist» adnaŭlaŭsia na čas pieradvybarnych kancertaŭ, ale ŭžo biaz Chobita, z pop-śpievakom Charli ŭ jakaści vakalista. Sam Chobit źjechaŭ u Irlandyju — zarabić hrošaj. Jak kaža Endru, na radzimie «U2» Jurasia apanavali novyja muzyčnyja idei, jon abiacaje chutka viarnucca i adradzić prajekt.

Niadoŭha praisnavała j «Hasta La Fillsta» — adno z karanacyjnych adkryćciaŭ. Vakalistka vyjechała ŭ Belhiju, pra bubnača my ŭžo zhadvali, a hitaryst i basist hrajuć u «Krambambuli» z Volskim.

Cikavy los u hurtu «Happy Face», pieramožcy-99. Jon byŭ uspryniaty na «ŭra» pry kancy 90-ch — u čas asablivaj papularnaści hrandžu, kali navat Volski vykarystoŭvaŭ aluzii z Kurta Kabejna. Maładačanskija chłopcy vydali anhielskamoŭny albom «Grunge?!», adznačylisia šeraham skandalnych kancertaŭ, prydumali sami vyznačeńnie svajmu stylu — posthrandž. Paśla ŭšanavańnia «rok-karonkaj» stylu chłopcy nie źmianili — jak u muzycy, tak i ŭ pavodzinach. Asabliva heta vyjaviłasia na adnym z «Basoviščaŭ»: viadučy Alaksandar Pamidoraŭ navat nie chacieŭ vypuskać hurt na scenu. Paśla było nudysckaje kupańnie ŭ miescy aktyŭnaha adpačynku žycharoŭ Haradku, strata hitary, katańnie na polskim «macyklecie z kalaskaj» i inšyja čysta kabejnaŭskija prykoły. Paśla moda na hrandž pastupova syšła. A «Happy Face» zastaŭsia. Siońnia ich možna pačuć na niešmatludnych klubnych viečarynach pamiaci Kurta.

Jašče adzin anhielskamoŭny prajekt, jaki byŭ laŭreatam, — «Thank you Jesus» («Dziakuj bohu», kali pierakłaści advolna). Karaniami hetaja kamanda siahaje da inšaha adkryćcia — hodu 1995-ha. Tady žury adznačyła debiut anhielskamoŭnaha hurtu «Why Not». Amal adrazu paśla cyrymonii jaho lider Andrej Kraŭčanka źjechaŭ u Londan, astatnija ž dałučylisia da hurtu «Buržuazija», vycisnuŭšy raniejšych muzykaŭ. Tyja «vycisnutyja» i ŭtvaryli «Thank you Jesus», što hraŭ uzorny mejnstrym-rok. Chłopcy ździejśnili paśpiachovuju vyłazku ŭ Niamieččynu, u vyniku źjaviŭsia ci nia samy jakasna zapisany albom ajčynnaha roku «Between No Distance». Hurt tak i zastaŭsia «prajektam adnaho albomu», choć kolki razoŭ muzyki jašče źbiralisia razam. Paśla bubnač źjechaŭ u Ameryku, hitaryst syšoŭ u «Pieśniary». Adziny albom staŭsia rarytetam, pieśni «Thank you Jesus» možna skačać chiba na sajcie www.mp3.com.

«Adkryćcio hodu» — vialikaje vyprabavańnie dla maładoj kamandy. Tyja samyja «miednyja truby», jakija mohuć zahubić. Heta nie apošni, a tolki pieršy krok da pryznańnia, za jakim musiać być nastupnyja. A toj, chto spyniajecca na hetaj prystupcy, — hinie.

Siarhiej Budkin

• 0
• 0
• 0
• 0
• 0
• 0
• 0
• 0