Prykolny seryjał «Dyktatura»

7 studzienia francuski časopis «Parade» nadrukavaŭ śpis dziesiaci najhoršych dyktataraŭ sučasnaści.

Dyktatary, jak skazana ŭ tekście, prajšli kastynh upłyvovych mižnarodnych pravaabarončych strukturaŭ. U čornym liście francuskaha časopisu Alaksandar Łukašenka zakryvaje dziasiatku, sastupajučy pryncu Abdułu, Tan Šve, Kim Čen Iru i inšym voraham čałaviectva.

Pieršaja dumka ad pračytanaha: nakolki prestyžnym ličycca trapić u dziasiatku «Parade» u asiarodździ dyktataraŭ? Naprykład, naš Łukašenka zaniaŭ dziasiataje miesca, vidavočna abahnaŭšy na niekalki punktaŭ inšaha kalehu, jaki pryjšoŭ adzinaccatym. Jakomu-niebudź afrykanskamu kniaźku z Tumby-Jumby nie chapiła pary zabaronienych prafsajuzaŭ, kab apynucca ŭ kampanii z samim Fidelem. A jaki byŭ šaniec!

Samaje śmiešnaje, što «Parade» — zvyčajny žoŭty papirus. Artykuł ab žudasnych dyktatarach nadrukavany pobač z natatkami ab tym, jak pryncesa Dyjana śpiavaje «Bitłz» u mahile, a Brytni Śpirs dzielić łožak z ben Ładenam. Čytajuć «Parade» zvyčajnyja chatnija haspadyni i pasažyry ekspresu TGV, kab zabić čas.

Baraćba za pravy čałavieka ŭ kapitalistyčnym śviecie stała zvyčajnym tavaram, nabyła svajo miesca na medyja-rynku, u systemie hustaŭ zachodniaha spažyŭca. Heta cikaviej, čym łoch-neskaja hadzina, ale nia tak prykolna, jak seksualnyja pryhody Dy Kapryjo. Jašče cikaviej toje (ab hetym śviedčyć rezanans, jaki mieŭ u Biełarusi artykuł z «Parade»), što husty spažyŭcoŭ zdolnyja ŭpłyvać na pavodziny palityčnych aktoraŭ u krainach kapitalistyčnaj peryferyi, u toj ža Biełarusi.

Baraćba za demakratyju ŭ Biełarusi ŭsprymajecca na Zachadzie jak doŭhi, ale dosyć prykolny seryjał «Dyktatura», dzie dobryja demakraty z «Narodnaj kaalicyi» biez kanca supraćstajać misteru «Zło» Łukašenku. Adnačasova seryjał retranślujuć na Ŭschod, dzie, jak vynik dyversyfykacyi pracesu hlabalizacyi, Łukašenka ŭsprymajecca stanoŭča, a apazycyjanery — admoŭna. U lubym vypadku na dyktaturu jość popyt.

Biełaruskija palityki nieśviadoma pavodziać siabie jak kulturny tavar na zachodnich i ŭschodnich medyja-rynkach, jak aktory seryjału. Ich pieršaje zadańnie nie vychodzić za ramki žanru «dobry suprać drennaha». Nieviasiołaje reziume — pakul čytaču «Parade» nie abrydnie čytać pry žachi dyktataraŭ, apošnija nikudy nia źniknuć.

Zatoje nas čakajuć zabojnyja «konkursy dyktataraŭ» — apošniaje słova ŭ šoŭ-biznesie. Z dobrym menedžeram i narmalnym sponsaram, naprykład «Nike» abo «Hazprom», imprezu možna arhanizavać vielmi vidoviščnuju. Vialiki choł. Masa žurnalistaŭ. Uvieś pravaabarončy bamond. Na podyjumie — defile achviaraŭ dyktataraŭ, jakija demanstrujuć siabram žury ślady katavańniaŭ. Konkurs kupalnikaŭ, bieły taniec z pravaabaroncami, karanacyja... Heta budzie kruciejšym za «Vialikaje myćcio».

Lolik Uškin

• 0
• 0
• 0
• 0
• 0
• 0
• 0
• 0