Pierad vybarami, jak na Kupalle, zdarajucca cudy: u dvarach zaharajucca paśla trochhadovaha pierapynku lichtary, stypendyi rastuć, jak bulba na navinie, a žycharam asobnych rehijonaŭ prezydent doryć hazapravody. U apošnim vypadku my majem spravu z kambinacyjaj pavyšanaj chitraści. Ujavicie sabie, što vy płacicie 400 dalaraŭ, i ATS pravodzić vam telefon. Paśla čaho da vas u kvateru prychodzić načalnik ATS, trasie vam ruku i kaža: ja ž abiacaŭ vam, što telefon pryjdzie ŭ kožny dom. Telefonnaja suviaź darahaja, ale my budziem praciahvać zabiaśpiečvać vas joju, niahledziačy na stohny niepryjacielaŭ, i nijakaj destabilizacyi nie dapuścim. Voś tak i prezydent z hazapravodam, pabudavanym za ludzkija padatki.
Marazmy množacca. Ujavicie sabie, što Džordž Buš zaklikaŭ kiraŭnikoŭ uładnych strukturaŭ ZŠA «nia prosta vyjhrać vybary, abraŭšy 100 deputataŭ senatu ŭ pieršym tury, a kamień na kamieni nie pakinuć ad unutranaj i źniešniaj apazycyi». Jak vy dumajecie, kaho b vyklikała Łora Buš, pačuj jana takija słovy?
U biezdakornaj systemie kiravanaj demakratyi jość adzin maleńki niedachop: kožnyja piać hadoŭ musiać adbyvacca vybary. Inačaj upadzie demakratyčnaja šyrma. Ale pakul adbyvajucca vybary, datul jość niebiaśpieka, što adnojčy ludzi prahałasujuć suprać, i źjaŭlajucca niahodniki, jakija majuć nachabstva kinuć vyklik bloku biespartyjnych i ŁDPB. Tamu asoby, adkaznyja za zakonnaść u krainie, pačynajuć zahadzia atakavać systemu niezaležnaha nazirańnia. Pravakacyja! — kryčać jany. — Kałavur, tavaryšy! I što ž za pravakacyju vyjaviła biełaruskaja Kandaliza Rajs? Akazvajecca, kandydaty rychtujuć naziralnikaŭ za padlikam hałasoŭ. Ach, nizkija! Jany nie daviarajuć našaj vysokaduchoŭnaj Lidzii Jarmošynaj.
«Vidavočnaje imknieńnie zabiaśpiečyć umovy, pry jakich apazycyja zmoža nastojvać na paŭtornym padliku hałasoŭ», — pačuli my ad Hienadzia Niavyhłasa ŭ sieradu. Cikava-cikava. Ad čaho ž heta samaja sumlennaja ŭłada na śviecie baicca pierapadliku hałasoŭ? Chaj by pieraličyli, kali chočuć, chaj by pa śpisach pierapravieryli pracent udziełu. A to «palitolahi» — heta tak ciapier nazyvajecca na STV — «prahnazujuć vielmi vysokuju jaŭku vybarcaŭ — nia mienš za 90%».
Užo i Rasieja padtrymała prezydenta hazam, i Ameryka dabaviła jamu 10% hałasoŭ Aktam pra demakratyju, a naziralnikaŭ jon usio adno baicca, jak čort kryža.
U 1984 hodzie kraina študyjavała «Małuju ziamlu», stajała ŭ čerhach pa kiłbasu, chavała Karatkieviča, i chto moh padumać, što student-zavočnik Horackaj sielhasakademii praz 20 hadoŭ budzie panavać u Biełarusi. Kali vam zusim skrušna, na čarhovaj palitinfarmacyi pavodle «Histaryčnaha vybaru Biełarusi» dumajcie pra 2024 hod.
Barys Tumar
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu7
Kamientary