Мінсельгасхарч пацвердзіў перавышэнне паставак харчавання ў Расію

У Міністэрстве сельскай гаспадаркі і харчавання Беларусі прызнаюць, што перавышэнне паставак у Расію беларускага харчавання па некаторых пазіцыях сапраўды мае месца.

«Ёсць перавышэнне па некаторых пазіцыях», — сказала БелаПАН прэс-сакратар Мінсельгасхарча Вольга Сраднёва на просьбу пракаментаваць учарашнюю заяву намесніка міністра сельскай гаспадаркі РФ Іллі Шастакова.

У той жа час яна не стала канкрэтызаваць, якія менавіта групы тавараў пастаўляюцца ў аб’ёме, які перавышае двухбаковыя дамоўленасці.

25 снежня ў Маскве намеснік міністра сельскай гаспадаркі РФ заявіў журналістам, што расійскі бок занепакоены значным перавышэннем узгодненага аб’ёму паставак некаторых груп харчавання з Беларусі, у той час як Мінск просіць аб павелічэнні аб’ёмаў увозу сваіх тавараў у Расію.

Мінсельгас Расіі гатовы ў чымсьці пайсці насустрач, аднак настойвае на выкананні дамоўленасцяў з боку краіны-партнёра, адзначыў Шастакоў. «Нашу занепакоенасць выклікае істотнае перавышэнне ўзгодненых аб’ёмаў паставак малочнай і мясной прадукцыі з Беларусі», — заявіў прадстаўнік Мінсельгаса.

Паводле яго слоў, пры вызначаным на 2012 год аб’ёме ўвозу малочнай прадукцыі 3,7 млн. тон (у пераліку на малако) фактычны аб’ём паставак складзе, згодна з прагнозам Мінсельгаса РФ, 4,1 млн. тон, да таго ж назіраецца «частковы дэмпінг».

Мінсельгас РФ таксама адзначае, што пастаўкі мяса пры ўзгодненым аб’ёме 170 тыс. ужо склалі 332 тыс. тон. Аб’ём увозу мяса птушкі перавышае ўзгоднены аб’ём у шэсць разоў, свініны — у 2,5 разу, у значным аб’ёме ўвозяцца мясапрадукты. Пры гэтым расійскі бок сумняваецца, што ўсё мяса, якое ўвозіцца з краіны, мае беларускае паходжанне.

«З аднаго боку, Беларусь просіць павялічыць ім імпартныя квоты на пастаўкі мяса з трэціх краін. З другога боку, мы бачым, што гэтае мяса або шляхам замяшчэння, або транзітам ідзе да нас. І мы чулі заявы неафіцыйных асоб, што ім гэта вельмі выгадна», — заявіў Шастакоў.

Паводле яго слоў, Мінск прапаноўвае на наступны год павялічыць для Беларусі аб’ёмы паставак мяса і малака ў Расію: прычым, павялічыць не проста адносна ўзгодненых на 2012 год аб’ёмаў, а фактычных аб’ёмаў паставак, і на «дзясяткі працэнтаў».

«Але тут будзем адстойваць пазіцыю расійскіх вытворцаў. Мы не супраць павелічэння паставак, але, па-першае, яно не павінна ісці такімі тэмпамі, а па-другое, нашы партнёры павінны ісці ў рамках узгодненых аб’ёмаў, каб наш рынак мог разумець, якія дадатковыя аб’ёмы паступаюць на расійскі рынак», — падкрэсліў намеснік кіраўніка Мінсельгаса РФ.

Трэба адзначыць, што на мінулым тыдні ў Маскве прайшла сустрэча міністра сельскай гаспадаркі Расіі Мікалая Фёдарава з міністрам сельскай гаспадаркі і харчавання Беларусі Леанідам Зайцам. У афіцыйным прэс-рэлізе па выніках перамоў паведамлялася, што бакі абмеркавалі перспектывы ўзаемнага гандлю, а таксама праблемныя пытанні, звязаныя з гэтым.

• 0
• 0
• 0
• 0
• 0
• 0
• 0
• 0