У Францыі праз вялікую колькасць медуз часова спыніла працу найбуйнейшая атамная электрастанцыя краіны Граўлін, якая знаходзіцца на ўзбярэжжы праліва Ла-Манш, піша Reuters.
Па інфармацыі кампаніі-аператара EDF, у нядзелю і панядзелак спынілі працу чатыры з шасці энергетычных блокаў. Гэта адбылося праз тое, што медузы трапілі ў сістэму астуджэння і заблакавалі фільтры на помпавых станцыях.
Блокі №2, №3 і №4 спыніліся ўначы з 10 на 11 жніўня, а блок №6 — раніцай 11 жніўня. Блокі №1 і №5 у той час ужо былі на планавым тэхнічным абслугоўванні.
EDF запэўнівае, што гэтая сітуацыя не стварала пагрозы ні для персаналу, ні для навакольнага асяроддзя, ні для ядзернай бяспекі. Цяпер працягваюцца работы па ачышчэнні сістэм і падрыхтоўцы да бяспечнага перазапуску энергаблокаў.
АЭС Граўлін мае магутнасць 5460 МВт і з’яўляецца адной з найбуйнейшых атамных станцый не толькі ў Францыі, але і ва ўсёй Еўропе. Яна забяспечвае значную частку электразабеспячэння на поўначы Францыі.
Каментары