Сурыкаў прасіў у Генпракуратуры аб вызваленні Баўмгертнера
У Генеральнай пракуратуры 27 жніўня на сустрэчы з выканаўцам абавязкаў генпракурора Мікалаем Куклісам пасол Расіі Аляксандр Сурыкаў выказаў сумненне ў законнасці затрымання грамадзяніна РФ Уладзіслава Баўмгертнера і хадайнічаў пра яго вызваленнез-пад варты ці пра змену яму меры стрымання, паведамілі БелаПАН у Генпракуратуры.
Кукліс растлумачыў расійскаму дыпламату падставы распачынання крымінальнай справы і затрымання Баўмгертнера, а таксама сказаў, што хадайніцтва пасла будзе разгледжана Генеральнай пракуратурай ва ўстаноўленым законам парадку.
Пасольства Расіі будзе інфармавана пра вынікі разгляду хадайніцтва.
Пра затрыманне Уладзіслава Баўмгертнера паведаміў 26 жніўня Следчы камітэт Беларусі. У дачыненні да гендырэктара «Уралкалія», які з’яўляецца старшынёй назіральнага савета ЗАТ «Беларуская калійная кампанія», а таксама члена назіральнага савета ЗАТ «БКК» Алега Пятрова, першага намесніка гендырэктара Канстанціна Саладоўнікава, намесніка гендырэктара па фінансах Ігара Яўстратава, начальніка фрахтовага аддзела Дзмітрыя Самойлава і іншых асоб распачаты справы на падставе ч. 3 арт. 424 Крымінальнага кодэкса (злоўжыванне ўладай і службовымі паўнамоцтвамі). Падставай для гэтага сталі матэрыялы пра ўчыненне імі яўных злоўжыванняў службовымі паўнамоцтвамі ў карыслівых мэтах, якія пацягнулі нанясенне значнага ўрону дзяржаўным і грамадскім інтарэсам краіны, а таксама нанясенне ўрону ў асабліва буйным памеры ААТ «Беларуськалій» і ЗАТ «БКК».
Учора высветлілася, што Баўмгертнер знаходзіўся ў Беларусі паводле запрашэння кіраўніка беларускага ўрада. Начальнік упраўлення па сувязях з грамадскасцю «Уралкалія» Аляксандр Бабінскі паведаміў, што акрамя Уладзіслава Баўмгертнера ў Мінск запрашаліся старшыня савета дырэктараў «Уралкалія» Аляксандр Валошын і акцыянер кампаніі Сулейман Керымаў. Беларускі бок прапанаваў разгледзець пытанні, звязаныя з працай ЗАТ «БКК». Валошын і Керымаў прыехаць на сустрэчу не змаглі.
Затрыманне Баўмгертнера, якое адбылося ўжо пасля перамоў, ва «Уралкаліі» расцэньваюць як «грубую правакацыю», заявіў Бабінскі.
Цяпер чытаюць
«Лукашэнка мне сказаў: «Хочаш — можаш адказаць нам, ударыць па Мазыры, па заводзе» — Зяленскі29
Каментары